Ushtria në ishullin përballë Himarës? Ish-komandanti i Flotës Detare tregon prapaskenat: Pse duhet të tërheqim paktin për ndarjen e kufirit me gjyq

Greqia ka vendosur për herë të parë trupa ushtarake në ishujt afër ujërave territoriale shqiptarë, në dy ishujt e vegjël Gavdo dhe Othono.

Lajmin e ka bërë të ditur gazeta greke ‘Ta Nea’, ku thuhet se është pjesë e strategjisë së Ministrisë së Mbrojtjes dhe Shtabit të Përgjithshëm grek.

“Ne jemi kudo për atdheun!” thuhet në një parullë të ushtrisë greke.

Ish-komandanti i Flotës Detare, Vladimir Beja, në një intervistë për gazetën “Panorama” tregon domethënien e kësaj lëvizje të mundshme nga Athina zyrtare dhe çfarë impakti mund të ketë në rajon, në një kohë kur vendet kanë pak javë që u dakordësuan për t’iu drejtuar Gjykatës Ndërkombëtare për ndarjen e kufirit detar.

Beja e cilëson këtë akt nga qeveria greke si një tentativë për t’u rritur artificialisht peshën disa ishujve të vegjël në Veri të detit Jon dhe një mundësi për të ndezur tensione në një zonë, ku nuk ka pasur deri më tani.

Më tej ish-ushtaraku i lartë i Flotës Detare të Ushtrisë Shqiptare sqaron se pretendimi për të ruajtur banorët e këtij mikroishulli nuk qëndron, pasi asnjëherë nuk ka pasur kërcënime as nga Shqipëria dhe as nga Italia dhe në ditët e sotme, një gjë e tillë as nuk mund të imagjinohet.

Për Vladimir Bejën, tentativa e qeverisë greke për të barazuar pozitat e Othonoit me ato të Gavdos(në Mesdhe përballë Kretës), nuk ndihmojnë aspak në fuqizimin e marrëdhënieve të fqinjësisë së mirë mes dy vendeve, pasi në rast se mes Greqisë dhe Turqisë ka një konflikt të hapur prej disa kohësh, mes shtetit shqiptar dhe shtetit grek nuk ka probleme të tilla.

Gjithashtu, ish-komandanti i Flotës Detare sugjeron se në rast se Greqia do e konkretizojë atë çka shkruhej në artikullin e gazetës “Tanea”, Shqipëria duhet të tërhiqet nga dhënia e dakordësisë për të zgjidhur kufirin detar në Gjykatën Ndërkombëtare.

“Rritjen e prezencës ushtarake në Fanos (Othonoi) dhe Erikuza nuk e justifikon asnjë rrezik aktual apo i pritshëm! Është thjesht përpjekje për të ngritur artificialisht “peshën” apo rëndësinë e këtyre ishujve! Burimet energjike, për më tepër në Jon nuk i kërcënon askush! Ato do të ndahen në proporcion me sipërfaqet detare që kanë të ndarë juridikisht, Greqia-Italia-Shqipëria! Kuptohet që bëhet fjalë për zonat që mund të jenë të shtrira në hapësirat e të tre shteteve!

Parlamenti grek nuk duhet të miratoje Ligjin për Zgjerimin e Detit Territorial nga 6-12 milje. Të jem i qartë, ky zgjerim nuk duhet të bëhet për Ishujt Fanos dhe Erikuza, pasi prek rendë padrejtësisht interesat kufitare të Shtetit Shqiptar! Shpresat që Gjykata Ndërkombëtare do t’i trajtojë ishujt e mësipërm njëlloj si Kontinentin, janë së paku naive! Gjykata Ndërkombëtare e Hamburgut, në gjykimet e deritanishme nuk ka dhënë asnjë vendim për t’u trajtuar ishujt barabartë me tokën kontinentale! Rastet e deritanishme flasin nga 0-33%,50%,70% dhe në asnjë rast në masën 100%.

Po cili duhet të jetë qëndrimi i qeverisë shqiptare, pasi vlen të theksojmë se behët fjalë për dy vende aleate nën ombrellën e NATOS-s.

Qeveria shqiptare të tërheqë “mirëkuptimin” e dhënë për ta çuar çështjen në Gjykatën Ndërkombëtare, pasi s’ka arsye ta bëjë! Në këtë rast, le ta bëjë vetëm Greqia po të dojë”, thotë ish-komandanti i Flotës Detare.