“Amerika po ndërhyn në çështjet e brendshme”, Manjani: ‘Non grata', arsyet pse Berisha duhet mbështetur edhe nga PS

Ish-ministri i Drejtësisë, Ylli Manjani ka folur për çështjen “non grata” të Sali Berishës, duke renditur edhe disa arsye se përse mendon që është ndërhyrje e pastër në politikën e brendshme shqiptare.

Manjani nënvizon se Berisha nuk u konstatua duke kryer veprimtari të jashtëligjshme në SHBA, ndërsa shton se shpallja “non grata” lidhet me rolin e tij politik në Shqipëri.

“Ndalimi i hyrjes së Tij në SHBA nuk erdhi si pasojë e ndonjë agresioni personal ndaj Amerikës. As Berisha dhe asnjë nga familja Berisha nuk u kap duke vjedhur në amerikë, duke financuar ndonjë fushatë presidenciale atje, duke dhunuar një ligj Amerikan apo qoftë edhe duke kundërshtuar politikën Amerikane.

Atëhere, përse iu ndalua hyrja, dmth përse shpallet nongrata?! Qartësisht, po kristal e qartë, shpallja e tij nongrata ka të bëjë me rolin politik të Tij në Republikën e Shqipërisë. Sali Berisha (unë vetë skam lënë llaf pa i thënë) është një politikan me ndikim në jetën politike në vend. Pavarësisht posteve politike apo ekzekutive, qënies në pozitë apo opozitë, Ai kishte dhe ende ka rol në jetën politike. Na pëlqen apo jo është çështje tjetër, por fakti duhet pranuar siç është”, shkruan Manjani.

Ndërsa thotë se është ndërhyrje në politikën e brendshme shqiptare, ai thotë se qëllimi është dobësimi i autoritetit të Berishës në funksion të fuqizimit të Edi Ramës.

“Është ndërhyrje e pastër politike në politikën e brendshme shqiptare. Qëllimi është i qartë: dobësim i autoritetit publik të Berishës në funksion të rritjes artificiale të autoritetit publik të Ramës. Përse e bën politika Amerikane këtë? Sdi ta them. As dua tja di përse në fakt.

Ajo që bën quhet ndërhyrje, në jetën politike të një vendi tjetër. Emër tjetër kjo nuk ka. A bën mirë, apo bën keq edhe kjo është çështje tjetër, por që ndërhyn kjo është e qartë. Dhe që përcaktimi i Berishës nongrata është për motive politike Shqiptare kjo është e dukshme.

Natyrisht, është zhgënjyese për cilindo që ka patur një respekt apo vokacion Amerikan të shohë se si shteti më i madh politik i botës të katandiset në pislliqe të vogla të politikës së kënetës këtu. Por kështu është”, shton më tej ish-ministri.

Ky i fundit thekson se Berisha nuk ka përse ta ketë personale këtë çështje, duke nënvizuar se duhet ballfaqim me qëllimet e vërteta të kësaj goditjeje që mori kryedemokrati. Ish-ministri nënvizon se Berisha duhet mbështetur nga e gjithë politika, për të shmangur ndërhyrjet në çështjet e brendshme.

“Tani, përse Berisha duhet ta ketë personale këtë betejë, kur sulmi nuk i bëhet për çështje personale por thjesht politike?! Jo or jo, duhet të jemi të sinqertë dhe të ballafaqohemi me të vërtetën. Politika e një shteti tjetër ndërhyn dhe përpiqet të imponohet në politikën e vendit tonë. Kjo është çështja!

PD e para duhet të jetë me Berishën në betejën për këtë standard politik dhe, jo për hallin e Berishës. Ky i fundit nuk ka asnjë hall. Një politikë normale, përfshi edhe socialistët shqiptarë, duhet të ishte në unison e Berishën, dmth jo me personin por me ndalimin e ndërhyrjes së huaj në jetën e brendshme.

Pa dyshim që kjo është çështje politike, kryepolitike madje!  Sot luajnë me Berishën, nesër me një tjetër, edhe me vetë Ramën i cili sot duket sikur përfiton. Por kjo nuk quhet politike! Aq më tepër një politikë që pranon të diktohet nga cilido zyrtar i huaj dhe nuk pranon të japë llogari para popullit të vet që e voton në fund të fundit.Këtu është edhe fillesa e shkatërrimit demokratik të vendit. Ndaj çështja Berisha është politike dhe meriton mbështetje politike”, thekson Manjani.