Video/ Nga “policët barkderra”, te “më fal, nuk e dija’ si sillet Pjerin Ndreu para policisë shqiptare dhe asaj serbe

Tre efektivë të Policisë së Shtetit kanë kallëzuar penalisht në Prokurori kryebashkiakun socialist të Lezhës, Pjerin Ndreun, pasi pretendojnë se ky i fundit i ka penguar të ushtrojnë detyrën.

Ngjarja ka ndodhur mbrëmjen e së enjtes në zonën turistike të Shëngjinit, jashtë ambienteve të një hoteli në vijën e parë të bregdetit.

Rreth orës 23:15 të mbrëmjes patrulla e policisë ka konstatuar se gjenerohej muzike me volum të lartë tek hoteli në fjalë në kundërshtim të masave anticovid. Në këto kushte punonjësit e policisë kanë kërkuar ndërprerjen e muzikës dhe mbylljen e lokalit, por kanë hasur në kundërshtinë e pronarit të subjektit.

Në ndihmë të patrullës së Shëngjinit kanë shkuar dhe forca e posaçme “Shqiponja”, të cilët në debat e sipër kanë tentuar të shoqërojnë në Komisariat pronarin e hotelit, por referuar kallëzimit penal, në ato momente ka dalë nga lokali kryebashkiaku i Lezhës, Pjerin Ndreu, duke i penguar që të ushtrojnë detyrën, me pretendimin se ligjin e bënte ai.

Edhe pse ora kishte tejkaluar nga 23:00, mësohet se ndaj dy efektivëve të patrullës së Shëngjinit ka nisur hetim disiplinor nga eprorët e tyre për “Shkelje të rëndë të atributeve e kompetencave të Policisë”, me argumentin se në subjektin ku kishte muzikë në shkelje të ligjit, po zhvillohej një aktivitet i Bashkisë Lezhë, ku ishin të pranishëm edhe përfaqësues të huaj.

Dëshmia e një prej efektivëve në Prokurori:

Aktualisht punoj si punonjës Policie pranë Drejtorisë Vendorë Lezhë, oficer i Patrullës së Përgjithshme, Stacioni i Policisë Shëngjin. Mbrëmë, më datë 24.06.2021, rreth orës 22:00, kam marrë shërbimin. Kam qenë duke patrulluar me kolegun tim. Kemi qenë në makinë, me mjetin e Policisë, në shëtitoren e re.

Te lokal “F…” kemi dëgjuar muzikë. Ora ka qenë 23:14 dhe muzika pas kësaj ore, në bazë të aktit normativ, nuk lejohet. Kemi hapur krahun, kemi ndaluar makinën, kemi zbritur dhe kemi shkuar tek lokal “F…”. Kemi kontaktuar me një nga kamerierët e lokalit dhe i kemi kërkuar që të na thërriste pronarin. Pas 5 minutash ka dalë pronari V. Gj. Në vend që ai të fliste me etikë ndaj nesh, ai na është drejtuar duke na thënë fjalë banale si: “Nuk e rruaj për ju, jeni legena, nuk ju pyes”.

Ne kemi komunikuar duke i thënë se arsyeja se pse kemi ardhur këtu është se ti ke shkelur aktin normativ të qeverisë për ndalimin e muzikës, e cila duhej të ishte fikur në orën 22:00 dhe se kishte një numër të lartë njerëzish brenda në lokal, në verandë. Ai na ka thënë se po e bezdisnim, se në lokal kishte ambasador, kryetarin e bashkisë, “kush jeni ju që më fikni muzikën?”

Pas këtij komunikimi është tërhequr dhe është futur në lokal dhe muzika ka vazhduar. Ne kemi njoftuar menjëherë në radio për problemin sallën operative Lezhë 50, sallën operative Shëngjin 70, shefin e Stacionit Shëngjin 396 dhe shefin e Komisariatit 395, duke iu thënë se shtetasi V.Gj. nuk e fik muzikën dhe kërkojmë ndihmë, forca të tjera. Pas pak ka ardhur një patrullë “Shqiponja”. Jemi afruar të dy patrullat te lokali, kemi marrë kontakt me pronarin V.Gj. dhe i kemi bërë të ditur se do ta shoqëronim në Komisariat.

Në këtë moment ka ndërhyrë duke na penguar në punën tonë kryetari i Bashkisë Lezhë, Pjerin Ndreu, si dhe stafi i lokalit, kamerierët, të cilët na kanë kundërshtuar me forcë.

Kur ne po përpiqeshim për të shoqëruar në Komisariat V.Gj., ata na kanë mbajtur për krahu dhe na kanë shtyrë duke na penguar që ta shoqëronim. Meqenëse përballë nesh u fut kryetari i Bashkisë, i cili na tha se: “Ligjet i bëj unë dhe i vendos unë…”, për të mos krijuar një situatë më të rëndë, ne jemi tërhequr duke njoftuar me radio sallën operative dhe eprorët tanë. Ata nuk ndërmorën asnjë veprim dhe na thanë në telefon: “Lëreni mos u merrni më, largohuni prej aty”, thuhet në dëshminë e policit.

Reagon Ndreu: Police barkderre qe kapercejne kompetencat

Pas kallëzimit penal në Prokurori të tre efektivëve, ka reaguar Ndreu. Në një postim në rrjetet sociale, Ndreu i quan “policë barkderrë”, efektivët që e kanë paditur penalisht në prokurori dhe sipas tij, ata kanë kanë kapërcyer kompetencat dhe kanë kryer veprime në kundërshtim me ligjin.

“Kallzim penal nga police barkderre, qe kapercejne kompetencat dhe kryejne veprime ne kundershtim me ligjin?!

-Qe nderhyjne ne nje darke zyrtare me prezencen e 15 kryetarve te komunave te Kosoves, me veprime te dhunshme, kur mund te shkruanin gjoben sipas ligjit qe eshte deryra qe duhet te benin ne keto raste!

-Me e keqja eshte se ndersa kryenin veprime te dhunshme ne nje darke zyrtare, shumica e lokaleve te Shengjinit ishin hapur, apo rrine hapur cdo nate deri ne oren 02, gje qe vertetohet me hapjen e kamerave lehtesisht.

– Pretendimi qe jane fyer eshte menyre per te shmange tejkalimin e kompetencave, veprimet e dhunshme ne nje darke zyrtare dhe shperdorimin e detyres duke mos vepruar ne lokalet e tjera qe ishin hapur pothuaj te gjitha”, shkruan Ndreu ndër të tjera.
Por, një situatë përplasjeje, Ndreu ka patur edhe me policinë serbe trfe vjet më parë.

Video u bë publike nga mediat serbe, asokohe Ndreu ishte deputet i PS, por sjellja e tij është krejt tjetër përballë serbëve, madje këtyre të fundit u kërkon falje.

Ai është gjendur i rrethuar nga policia serbe, kur dy bashkëpunëtorë të tij të Partisë Socialiste gjatë një vizite në Beograd, iu lindi ideja të kryqëzojnë gishtat për një foto. Kaq u desh dhe u thirr policia, që i kërkonte llogari  Pjerin Ndreut duke krijuar një situatë të sikletshme për deputetin shqiptar. Qytetari serb:"Këta dy persona po shkojnë drejt kishës, po i kryqëzojnë duart duke bërë shqiponjën... Ky është një provokim, jo ti, por njerëzit e tu."

Fillimisht Pjerin Ndreu ka dashur të mbrojë veprimin e bashkudhëtarëve të tij.

Pjerin Ndreu: Mos u mërzit për këtë, vetëm një foto po bëjnë. Nuk ka asgjë për tu shqetësuar. Por kur ka parë se policët janë shtuar, kanë fshirë fotot për të dalë nga situata...

Pjerin Ndreu: Ku shkoni i bëni këto mor burrë? No mor burr no! Si e bëni atë para parlamentit! Më fal, nuk e dija! Video e publikuar ne rrjetet sociale përfundon me policin serb që i fik makinën deputetit shqiptar, megjithatë pas fshirjes së fotove gjithçka është mbyllur.