Virozat e stinës, paralajmëron Brataj: Kulmi pritet të arrijë në fund të janarit

Shefi i Urgjencës Kombëtare, Skënder Brataj foli për situatën aktuale të krijuar nga virozat e stinës.

Në një komunikim për emisionin “Kjo Javë” në News24, Brataj u shpreh se kulmi i virozave pritet të arrijë në fund të muajit janar, ndërsa shtoi Urgjenca merr rreth 1800-2000 thirrje brenda 24-orëve.

Pjesë nga intervista:

Brataj: Ky është viti i dytë që po dominohet nga gripi. Jemi drejt kulmit të tij. Kështu ndodh edhe në vendet e tjera evropiane dhe perëndimore. Kulmi i virozave pritet të arrijë në fund të muajit janar.

Nëse themi që është sezoni, nuk ka rritje në krahasim me sezonin e kaluar?

Brataj: Jo, nuk ka një rritje nëse bëjmë një krahasim. Nëse krahasojmë këtë vit me vitin 2021, kemi një rënie te rasteve. Në këtë muaj rritja është në proporcion të drejtë me gripin, të ftohtin.

Nëse do kishim më shumë të vaksinuar për gripin, do ishim në këtë situatë?

Brataj: Vaksinimi është i këshillueshëm për fëmijët moshat e treta dhe ata me imunitete të dobët. Shifrat këtë vit janë më të këta edhe për shkak të vaksinave të covid-19.

Qarkullon më Covid-19?

Brataj: Sigurisht që qarkullon, nuk është se ka ikur ndonjëherë. Gripi ka përqindjen e vetë dhe pasojat e rënda.

Sa telefonata merr Urgjenca për 24 orë?

Brataj: Janë rreth 1800-2000 thirrje në ditë. Janë rreth 340 vizita në ditë, një pjesë janë bërë edhe online. Alarm nuk besoj të ketë dhe nuk ka pse të ketë.

Simptomat që konsiderohen shqetësuese, cilat janë?

Brataj: Dua të theksoj se nëse rishfaqen temperaturat, vështirësia në frymëmarrjeje, ose janë të përgjumur duhet drejtuar te mjeku.