Flash News

E-TJERA

Vlerësimi i Dvoranit/ Ngjela: Goditje ndaj Metës; presidenca: Ramaforma ka thirrur në ndihmë Taku Çmendarakun

Vlerësimi i Dvoranit/ Ngjela: Goditje ndaj Metës; presidenca:

Avokati Spartak Ngjela e ka cilësuar vlerësimin e DASH për ish kreun e KED, Ardian Dvorani si goditje me forcë e politikës amerikane ndaj presidentit Ilir Meta.

Në një status në rrjetet sociale, Ngjela shkruan se ky vlerësim ishte goditje e rëndë për të gjithë ata që e luftuan Dvoranin, mes tyre kreun e shtetit Meta.

“Departamenti i Shtetit amerikan goditi sot rëndë korrupsionin e lartë shtetëror në Tiranë, duke i dhënë vlerë të veçantë gjyqtarit Ardian Dvoranit, si një figurë antikorrupsion në Shqipëri dhe si model ndërkombëtar.

Kjo ishte një goditje e rëndë për të gjithë ata që e luftuan Dvoranin.

Ilir Meta ra brenda plotësisht me këtë çështje. Dvorani ishte i vetmi gjyqtar që nuk votoi për lirimin e Metës në Gjykatën e Lartë me akuzën për korrupsionin, dhe tani ky merr medalje amerikane si figurë e pastër, ndërkombëtarisht, për luftën e tij kundër korrupsionit .

Por ishte pikërisht Meta që e pushoi si gjyqtar.

Departamenti i Shtetit amerikan tha sot me shumë kuptim, që, kaq ishte mbretërimi i të korruptuarve të mëdhenj në Tiranë.

Por, çështja me më shumë rëndësi në këtë rast është fakti që politika amerikane e rinisi procesin e antikorrupsionit në Shqipëri, duke goditura me tepër forcë Ilir Metën.

Po të tjerët?

Në fakt, nërkohë, dosjet i ka nëpër duar SPAK-u.

Por, a do të veprojë SPAK në këto kohë?

Duke u nisur nga kjo që dëgjuam sot, SPAK-u kuptohet se paska filluar punë me temp të fuqishëm.

Kurse Shqiptarët po presin konkreten...”, shkruan Ngjela.

Në replikë me Ngjelën, ka reaguar zëdhënësi i presidentit, Tedi Blushi, sipas të cilit ka vetëm një përgjigje: Referendumi i 25 prillit është dita e ndarjes me racën tuaj, që për interesa të armiqve të kombit, kërkon të marrë peng Shqipërinë.

Në mungesë të personaliteteve të jurisprudencës, që e njohin Kushtetutën, ligjin dhe autoritetin e Komisionit të Venecias, Ramaforma ka thirrur në ndihmë edhe Taku Çmendarakun, të nominuarin për çmimin "Guinness", si i vetmi jurist që nuk ka fituar një gjyq në jetën dhe karrierën e tij!

Nuk ja ka vlejtur asnjëherë një përgjigje për Taku Çmendarakun, të vetëshpallur "Avokat të FBI", por për të dhe për të gjithë sivllezërit e tij, skllevër të partisë-shtet, që vranë Nako Spirun për llogari të Jugosllavisë, për këdo spiun burgu që shitet për disident, për çdo gjakprishur, për çdo kone-lehës, për çdo shpirtshitur, për çdo përshesh-ngrënës dhe sharës me pagesë dhe për çdo zar të Kryezarit dhe Kryeoligarkut, ka vetëm një përgjigje:

Referendumi i 25 prillit është dita e ndarjes me racën tuaj, që për interesa të armiqve të kombit, kërkon të marrë peng Shqipërinë.

Më 25 prill 2021, Shqipëria do jetë e shqiptarëve dhe jo më e oligarkëve dhe e mafies ndërkombëtare.

SHQIPËRIA E PARA DHE E PAMPOSHTUR!”, shkruan Blushi.

 

Ditari politik

Të fundit