Vodhën 14 banesa me çelësa të klonuar në Tiranë, arrestohet ‘skifteri’ i dënuar për vrasje, në kërkim bashkëpunëtori

Vidhnin në banesa duke përdorur çelësa të klonuar në Tiranë, arrestohet një person dhe shpallet në kërkim bashkëpunëtori i tij.

Policia bën me dije se janë zbardhur dhe dokumentohen 14 raste të vjedhjes së banesave, me anë të çelësave të klonua dhe u arrestua Agron Goxhaj 45 vjeç, banues në Tiranë, i dënuar më parë për veprën penale “Vrasje me paramendim”.

“Sekuestrohen çelësa të ndryshëm, pajisje alumini që shërbejnë për veshjen e çelësave, dy aparate celulare, një bajonetë, një përforcues grushti, veshje si dhe dy automjete që autorët dyshohet se e përdornin gjatë kryerjes së vjedhjeve.

Shërbimet e Komisariatit të Policisë Nr. 2, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve përpara përgjegjësisë ligjore, pas një pune të mirëfilltë hetimore, kanë organizuar dhe finalizuar me sukses operacionin policor të koduar “Smart keys”.

Në kuadër të këtij operacioni u bë arrestimi i shtetasit Agron Goxhaj 45 vjeç, banues në Tiranë, i dënuar më parë për veprën penale “Vrasje me paramendim”.

Gjithashtu u shpall në kërkim shtetasi Gezim Kau 48 vjeç, i dënuar më parë për të njejtën veprimtari kriminale, në shtetin gjerman.

Nga hetimet e kryera ka rezultuar se këta shtetas, në bashkëpunim me njëri-tjetrin, gjatë vitit të kaluar dhe këtij viti, me anë të çelësave të klonuar, kanë vjedhur shuma parash dhe sende me vlerë, në 14 banesa në zona të ndryshme të Tiranës.

Në vijim të veprimeve, gjatë kontrollit të ushtruar në një subjekt në pronësi të bashkëshortes së shtetasit A. G., të cilin dy autorët e dyshuar e përdornin për të fshehur sendet e vjedhura dhe mjetet që përdornin gjatë vjedhjeve, u gjetën dhe sekuestruan çelësa të ndryshëm, pajisje alumini që shërbejnë për veshjen e çelësave, dy aparate celulare, një bajonetë, një përforcues grushti, dhe veshje të ndryshme të përdorura gjatë vjedhjeve.

Gjithashtu u sekuestruan dhe dy automjetet e autorëve të cilët i përdornin gjatë kësaj veprimtarie kriminale.

Vijon puna për kapjen e shtetasit G. K., si dhe dokumentimin e rasteve të tjera të vjedhjes që mund të jenë kryer nga këta shtetas”, bën me dije policia.

Materialet i kaluan Prokurorisë pranë Gjykatës së Rrethit Gjyqësor të Juridiksionit të Përgjithshëm Tiranë, për veprime të mëtejshme procedurale.