Vrasja e Gjovalin Prendit, Lala: I biri ishte i përfshirë në disa atentate mafioze me shumë viktima

Gazetarja Klodiana Lala zbardhi detaje mbi pistat ku po heton lidhur me vrasjen e Gjovalin Prendit, babait të Roan Brahimit.

E ftuar në MCN ajo tha se njëra pistë lidhet me përplasjen me grupin kriminal të Ervis Martinajt, pas atentatit në Fushë-Krujë ku u vra Brilant Martinaj , ndaj prej asaj kohe familja e Roanit kishte marrë kërcënime për shuarjen e gjithë fisit.

Një tjetër pistë ku po përqendrohen hetimet është konflikti me grupin e Tepelenës të drejtuar nga Arlenato Muska, i njohur si “Reno i Vogël”. Ky konflikt sipas saj dyshohet të ketë lidhje me trafikun e drogës, dhe policia po e verifikon si një nga pistat kryesore të ngjarjes.

“Gjovalin Prendi, 64 vjeç u vra përpara biznesit të tij në zonën e Pllanës në Lezhë, sigurisht bëhet fjalë për gjakmarrje për shkak se djali i tij i vetëm, Roan Brahimi, sepse emrin e ka të ndryshuar, emri i tij i lindjes është Sidorel Prendi dhe e ka ndryshuar në Roan Brahimi- ishte i përfshirë në shumë atentate mafioze me shumë viktima.

Sa i përket mekanizmit të ngjarjes, paraprakisht sipas këqyrjes së kamerave të sigurisë, por edhe sipas dëshmitarëve në vendin e ngjarjes rezulton se automjeti i përdorur nga autorët që është një automjet i vjedhur, ka ardhur nga zona e Milotit dhe është afruar tek biznesi i familjes.

Prendi aty, babai i Roan Brahimit, Gjovalin Prendi, ka qenë duke konsumuar një kafe në prani të një personi tjetër.

Kanë dalë dy persona të maskuar me kallashnikovë, dhe vetëm njëri prej tyre ka qëlluar në drejtim të Gjovalin Prendit, duke i marrë atij jeta, dhe më pas automjeti ka ndjekur të njëjtën rrugë të largimit, pra në drejtim të Milotit dhe është gjetur i djegur thuajse tërësisht të nesërmen e ngjarjes në Fushë Gjormë.

Roan Brahimi u ekspozua për herë të parë nga policia e shtetit në atentatin e ndodhur tek mbikalimi i Fushë-Krujës, ku viktimë mbeti Brilant Martinaj, kushëriri i parë i Ervis Martinajt dhe dy miqtë e tij, Besmir Hoxha dhe Dikler Vatha.

Në atë kohë, njëri nga personat e dyshuar si pjesëmarrës në këtë atentat ishte edhe Roan Brahimi dhe që nga ai moment, policia ka patur të dhëna që grupi kundërshtar, pra grupi i Martinajt, ishte përbetuar që do ta shkatërronte dhe do ta shuante të gjithë familjen dhe po të shikosh në vitin 2024, pra dy vite më vonë, Roan Brahimi u ekzekutua në një atentat mafioz në Athinë në sy të gruas së dytë.

Në sa i përket sagës së përplasjeve, Roan Brahimi është dyshuar edhe për ngjarje të tjera të rënda, si atentati ndaj Ardian Gjeloshit me një të plagosur dhe një të vrarë, pra u vra ekonomisti i shoqërisë Ardian Gjeloshi, ndërkohë që Gjeloshi mbeti i plagosur. Është dyshuar për atentatin ndaj Ylli Ibrahimit ose Brahjas, të cilin e kishte edhe kushëri të bashkëshortes së parë sepse e konsideronte si një person që e kishte tradhtuar tek Martinajt dhe në atë ngjarje mbeti gabimisht i vrarë.

Ishte po ashtu i dyshuar bashkë me kunatin e tij për ngjarjen e vrasjes së Gentian Betjas në Larush të Fushë-Krujës, ndërkohë ka patur edhe ngjarje të tjera, por këto janë ngjarjet më të rënda.

Ka patur dhe një konflikt me një grup të Tepelenës, i drejtuar nga ai që njihet si “Reno i Vogël”, Arlenato Muska që kishte të bënte me trafikun e drogës, por policia është duke e verifikuar këtë pistë.

Ndërkohë që familja, prindi duhet thënë që herë pas here ka marrë edhe mesazhe, nëse mund ta them kështu, kërcënuese që pas atentatit tek mbikalimi i Fushë-Krujës, që kjo familje ishte në shënjestër dhe që sigurisht do të shkonte puna deri aty sa do të shuhej e gjitha.

Policia ka kërkuar identifikimin e shasisë së automjetit dhe e ka dërguar jashtë vendit për shkak edhe të pushimit të Pashkëve, nuk ka marrë ende përgjigje se ku është vjedhur kjo makinë.

Nëse ka ardhur nga jashtë apo është vjedhur në Shqipëri, pavarësisht të aludimeve që ka patur gjatë ditës së sotme në lidhje me këtë aspekt.

Pistat kryesore ku policia po heton janë: Ervis Martinaj që dyshohet në mënyrë direkte, pra ishte familja, nëse mund ta them kështu, grupi kriminal Martinaj.

Ylli Brahja, Ardian Gjeloshi dhe Gentian Bejtja, këto ishin përplasje që ai kishte të hapura dhe që ishte pyetur ose ishte shpallur në kërkim policor në lidhje me këto ngjarje.

Ndërkohë ka patur kontrolle, përveçse këtyre familjeve që unë përmenda, ka patur kontrolle edhe në banesat e fisit Reçi në Mirditë.

Sepse sipas të dhënave, Roan Brahimi ishte në përplasje me këtë grupim në zonën e Mirditës për sa kohë që djemtë e familjes Reçi ishin në një aleancë me djalin e Ardian Gjeloshit, të cilin sipas policisë, Roan Brahimi tentoi ta eliminonte.

Pra, këto janë pak a shumë pista, dhe pista tjetër çështja e përplasjeve në trafikun e drogës me atë që njihet si Reno i Vogël dhe këtu është përqëndruar policia."