Vrasja e Pashko Ujkës/ Familja e ish-deputetit ofron 25 mijë euro shpërblim për këdo që jep informacion

Familja e ish-deputetit Pashko Ujka të vrarë në Shkodër më 29 Nëntor të vitit të kaluar, kanë vendosur të ofrojnë 25 mijë euro shpërblim për këdo që jep informacion ose të dhëna rreth autorit ose autorëve të ngjarjes.

Lajmin e ka konfirmuar vajza e Ujkës, Ledisia Ujka për emisionin Uniko në Klan Tv. Vajza e ish-deputetit u shpreh se ka vendosur në dispozicion numrin e familjes dhe jo atë të policisë, pasi nuk kanë besim tek autoritetet.

Ledisia tha se çështja e ish-deputetit do t’iu  shtrohet shumë shpejt edhe autoriteteve italiane, konkretisht në Varese, aty ku Pashko Ujka ishte rezident. Vajza e ish-deputetit sqaroi se dosja penale me të gjitha provat për vrasjen e të atit është dërguar për t’u përkthyer dhe më pas çështja do t’iu drejtohet autoriteteve  italiane për shqyrtim.

Vajza e Ujkës u shpreh se kanë kërkuar mbrojtje si familje pas vrasjes së të atit, kërkesë që është bërë pranë drejtorit të Policisë së Shkodrës, por sipas saj ai iu ka thënë se nuk janë të rrezikuar. Ajo shprehet se familjarëve iu është kërkuar të mos flasin.

Pjesë nga biseda:

Spartak Koka: Përse keni vendosur si familje të jepni një shpërblim financiar për ata që do t’ju ndihmojnë për zbardhjen e kësaj ngjarje dhe a mund të na jepni konkretisht më shumë detaje për këtë shpërblim financiar që keni vendosur si familje? Dhe përse vendosët ju dhe nuk e bëri policia dhe institucionet ligjzbatuese?

Ledisia Ujka: E kemi nga halli sepse ne kemi kërkuar drejtësi, por e kemi parë që drejtësia nuk është duke u bërë për gjakun e babit tim dhe për këtë arsye ne kemi vendosur të flasim që të zgjidhim këtë çështje që të zbardhet kjo vrasje. Deri sot nuk është bërë asnjë gjë për të gjetur vrasësin e babit tim. Ne si familje do mundohemi t’i shkojmë deri në fund kësaj drejtësie për të gjetur drejtësi për gjakun e tij.

Spartak Koka: Si do t’i shkoni deri në fund?

Ledisia Ujka: Me prova, me gjëra çfarë kemi mbledhur, me gjithçka çfarë ne dimë dhe çfarë kemi gjetur. Me shtete të tjera sepse do angazhojmë edhe shtetin italian sepse ai kishte nënshtetësi italiane. Edhe në shtetin amerikan meqë kemi parë që autoritetet e Shqipërisë, si policia, si prokuroria, si gjykata, askush nuk ka bërë asnjë gjë për të zbardhur këtë ngjarje.

Spartak Koka: Po si do ta hapni në shtetin italian? Do bëni kallëzim atje?

Ledisia Ujka: Ne kemi marrë të gjithë dosjen me provat për vrasjen e babit tim dhe e kemi dërguar për ta përkthyer dhe pastaj do të hapet si dosje dhe në Itali, në prokurorinë e Italisë.

Spartak Koka: Në cilin vend?

Ledisia Ujka: Në Varese ku ai ka pasur dhe rezidencë atje. Nga momenti që është bërë vrasja e babit deri sot, të gjithë na kanë thënë mos flasim, mos të themi çfarë konfliktesh kemi pasur, mos të japim detaje, nuk na ka dalë asnjë njeri zot. I kemi kërkuar edhe policisë, i kemi thënë që duam mbrojtje, sepse vetë policia në shumë raste na ka thënë që ju mund të jeni të kërcënuar, por mos e diskutoni dhe është më mirë që shumë gjëra t’i mbani për vete.

Spartak Koka: Çfarë shume keni dhënë si shpërblim dhe çfarë numri keni vendosur për kontakt?

Ledisia Ujka: Ne kemi vendosur shumën si familje dhe ofrojmë 25 mijë Euro për çdo persona që ka fakte konkrete dhe prova për të gjetur vrasësin e babit tim. Këto lekë janë lekë që shkojnë për shpirt të tij, për gjak të tij sepse ai ka punuar gjithë jetën dhe ne do bëjmë të pamundurën që të vendoset drejtësia për të.

Spartak Koka: Përse keni vendosur një numër tuajin familjar dhe jo të policisë?

Ledisia Ujka: Kemi vendosur numrin tonë sepse ne nuk kemi besim te policia. Policia na ka thënë që 99%, pas 2 javëve, ngjarja në shtet është e zgjidhur.