Zbardhen detaje nga strategjia për të frenuar emigrantët shqiptarë, pse është sfidë për Rishi Sunak

Një ditë pasi kryeministri britanik Rishi Sunak prezantoi planin për ndalimin e emigracionit të paligjshëm me në fokus shqiptarët, “The Times” ka zbardhur të tjera detaje.

Sunak synon që të fitojë pikë dhe mbështetje nga britanikët, duke treguar se qeveria e tij po merret me çështje që kanë rëndësi për popullin anglez.

"Ne duhet t'u tregojmë njerëzve se ne jemi ende në krye dhe se ne ende mund të bëjmë gjëra," tha një konservator.

Më tej thuhet se frenimi i emigracion të paligjshëm është një nga dëshirat e britanikëve dhe konservatorët duhet ta realizojnë këtë për të marrë sërish mbështetjen e qytetarëve.

Rregullat e azilit rreth skllavërisë moderne do të forcohen dhe do të ketë legjislacion që do të përpiqet të reduktojë kërkesat gjyqësore kundër dëbimit.

Kishte gjithashtu një zotim për të eliminuar përdorimin e hoteleve për të strehuar azilkërkuesit. Sunak tha se qeveria po dërgonte një mesazh të qartë se "mjaft është mjaft".

Ai tha se njerëzit kishin "të drejtë të zemëroheshin" për dështimin e përsëritur për të trajtuar çështjen, por premtoi se këtë herë do të ishte ndryshe. “Kjo qeveri do të bëjë atë që duhet bërë,” tha ai.

Pyetja është nëse do të mjaftojnë këto masa. Një pjesë e strategjisë së Sunak, është të përshpejtojë dhe të pranojë në masë të madhe shumë prej atyre që presin që kërkesat e tyre për azil të shqyrtohen.

Një deputet konservator tha se ai kishte disa qindra azilkërkues në zonën e tij elektorale, të cilët ishin vendosur në hotele dhe të paaftë për të punuar ndërsa kërkesat e tyre përpunoheshin.

Duke i përpunuar me shpejtësi kërkesat e tyre dhe duke i lejuar ata të punojnë dhe të asimilohen në komunitete, qeveria shpreson që elementi më "vizual" i krizës do të eliminohet.

Ministrat e ardhshëm duan të shkurtojnë numrin e njerëzve që kalojnë Kanalin. Marrëveshja me Shqipërinë synon të zvogëlojë numrin e emigrantëve, të cilët përbëjnë 1/3 e totalit që kanë shkuar në Britani.

Sunak iu përkushtua sërish skemës së Ruandës për t'u marrë me këtë problem, por kjo është ende larg funksionimit. Ka pasur gjithashtu përparim të kufizuar në një marrëveshje migracioni me Bashkimin Evropian, për të cilin Britania e Madhe beson se është thelbësore për një zgjidhje afatgjatë të krizës së anijeve të vogla.

Realiteti është, siç pranoi Sunak, nuk ka asnjë mënyrë "të shpejtë dhe të lehtë" për të zgjidhur atë që është një problem kompleks dhe i shumëanshëm. Megjithatë Sunak tani ka vënë në rrezik besueshmërinë e tij politike duke bërë pikërisht këtë. Suksesi apo dështimi i tij do të përcaktojë nëse votuesit mendojnë se ai është në kontroll të ngjarjeve apo thjesht i goditur prej tyre.