Zbardhet atentati në Lezhë, identifikohen autorët, dyshohet hakmarrje

Drejtori i Drejtorisë Vendore të Policisë Lezhë, Arben Nasufi, ka dalë në një konferencë për mediat lidhur me zbardhjen e ngjarjes së rëndë të ndodhur një ditë më parë në fshatin Balldren, ku mbeti i vrarë çifti, Kreshnik dhe Gentiana Mujeci.

Sipas policisë, është bërë i mundur identifikimi i njërit prej automjeteve të përdorura në krim, tip “Audi A4”, si dhe identifikimi i autorëve të dyshuar.

Bëhet fjalë për shtetasit me iniciale A.M., 22 vjeç, F.M 36 vjec dhe R.M 28 vjeç.

“Nga persona të paidentifikuar është qëlluar me armë zjarri në drejtim të automjetit. Nga hetimet u identifikua një nga automjetet e përdorura dhe autorët, shtetasit A.M 22 vjeç, F.M. 36 vjeç dhe R.M. 23 vjeç të tre banues në Lezhë”, tha ai.

Nga hetimet paraprake rezulton se autorët u kanë prerë rrugën viktimave duke përdorur edhe një automjet tjetër, tip “Volkswagen”, pa targa, për të realizuar atentatin.

Policia dyshon se vrasja ka ndodhur për motive gjakmarrje, ndërsa pas identifikimit të autorëve janë intensifikuar kërkimet për kapjen e tyre.

“Nga veprimet e mëtejshme hetimore, vrasja ka ndodhur për gjakmarrje. Hetimet po vijojnë. Sa i përket autorëve. Pas identifikimit të tyre janë ushtruar kontrolle, por nuk është bërë e mundur gjetja e tyre. Ata janë shpallur në kërkim. Operacioni vijon në terren. Audi mbajti në vëzhgim viktimat”, tha ai.

Deri më tani, ata rezultojnë ende në arrati. Grupi hetimor vijon punën për dokumentimin e plotë të ngjarjes dhe zbardhjen e rrethanave të saj.

FJALA E DREJTORIT TE POLICISE LEZHE

Drejtori i Drejtorisë Vendore të Policisë Lezhë, Drejtues Arben Nasufi, konferencë në lidhje me zbardhjen e ngjarjes së ndodhur në fshatin Balldren, më datë 26.04.2026.

Përshëndetje,

Faleminderit për praninë tuaj sot, për të përcjellë te qytetarët, rezultatin e angazhimit maksimal të strukturave të Policisë, me qëllim zbardhjen e ngjarjes së ndodhur ditën e djeshme, në fshatin Balldren, ku mbetën të vrarë me armë zjarri, çifti i bashkëshortëve, shtetasit Kreshnik dhe Gentiana Mujeci.

Më datë 26.04.2026, rreth orës 14:50, në rrugën “Balldren-Torovicë”, nga shtetas të paidentifikuar është qëlluar me armë zjarri në drejtim të automjetit që drejtohej nga shtetasi Kreshnik Mujeci.

Me marrjen e njoftimit, në vendngjarje kanë mbërritur menjëherë shërbimet e Policisë dhe ato të emergjencës.

Për të hetuar dhe zbardhur ngjarjen, u ngrit një grup i posaçëm hetimor, me specialistë të Hetimit të Krimeve të Rënda të DVP Lezhë, Departamentit të Policisë Kriminale, si dhe ekspertët më të mirë kriminalistë, të cilët në drejtimin e Prokurorisë, kanë vijuar intensivisht veprimet hetimore në vendin e ngjarjes dhe një sërë veprimesh të tjera me metoda proaktive, në funksion të zbardhjes dhe dokumentimit të plotë ligjor të saj.

Hetimet kanë vijuar me këqyrjen dhe administrimin e të gjitha pamjeve filmike mbi intinerarin e lëvizjeve të viktimave dhe autorëve, analizimin e çdo prove materiale dhe si rezultat është identifikuar njëri prej automjeteve të përdorura nga autorët, i markës “Audi A4”.

Në vijim të hetimeve të thelluara dhe profesionale, analizimit të çdo prove që lidhej me ngjarjen, u bë i mundur identifikimi i autorëve të dyshuar, konkretisht i shtetasve:

-A. M., 22 vjeç, F. M., 36 vjeç dhe R. M., 23 vjeç, banues në Lezhë.

Nga dinamika e ngjarjes rezulton se automjeti tip “Audi A4” ka mbajtur në vëzhgim lëvizjen e shtetasit Kreshnik Mujeci. Më pas, një automjet tjetër, tip “Volkswagen”, pa targa, dyshohet se i ka prerë rrugën automjetit me të cilin udhëtonte shtetasi Kreshnik Mujeci, së bashku me bashkëshorten e tij, dhe shtetasit që ishin në automjet kanë qëlluar me breshëri armësh në drejtim të automjetit të tij.

Nga veprimet e mëtejshme hetimore dyshohet se vrasja ka ndodhur për arsye hakmarrjeje.

Hetimet vazhdojnë në mënyre intensive, në drejtimin e Prokurorisë, për dokumentimin e plotë ligjor të ngjarjes.

Përsa i përket autorëve, pas identifikimit të tyre, nga ana e strukturave policore janë ushtruar kontrolle në disa banesa dhe ambiente të tjera, por nuk është bërë e mundur gjetja e tyre. Këta shtetas janë shpallur në kërkim.

Operacioni vijon në terren, ku janë përshirë Forcat Speciale “RENEA”, Forcat Kombëtare të Sigurisë dhe strukturat operacionale të Drejtorisë Vendore të Policisë Lezhë, me qëllim lokalizmin dhe kapjen e tyre.

Gjithashtu, vijon puna për gjetjen dhe sekuestrimin e automjeteve dhe të armëve të zjarrit që janë përdorur për të kryer vrasjen.

Drejtoria Vendore e Policisë Lezhë është maksimalisht e angazhuar për garantimin e rendit dhe sigurisë, evidentimin dhe goditjen e paligjshmërive dhe në këtë kuadër fton qytetarët, që të besojnë dhe të mbështesin më shumë strukturat policore, duke denoncuar çdo rast të paligjshmërisë.