Zhdukja misterioze e biznesmenit italian në Pukë, mediat fqinje zbardhin itinerarin e Davide Pecorelli-t

Prej më shumë se 10 ditësh, një biznesmen italian rezulton i zhdukur në vendin tonë, në rrethana misterioze.

Ndonëse ngjarja nuk u raportua nga policia, sipërmarrësi italian Davide Pecorelli, ish arbitër futbolli dhe themelues i një qendre estetike në Sansepolcro është zhdukur që nga 6 janari.

Mësohet se 45-vjeçari u nis me makinën e tij të marrë me qira në Tiranë, por që u gjet plotësisht e djegur në natën midis 7 dhe 8 janarit në zonën e Pukës, në veri të Shqipërisë. Makina tip ‘Skoda Fabia’ u gjet në një zonë malire, afër kufirit me Kosovën, brenda së cilës u gjetën disa sende personale të biznesmenit italian edhe mbetje kockore. 

Burimet e policisë lokale thonë se, për rastin e "turistit të huaj", hetimet po vazhdojnë pa përjashtuar asgjë. 

‘La nazione’ shkruan se se partnerja shqiptare e Pecorellit, e cila jetonte bashkë me të në Valtiberina, këto ditë ka sjellë disa sende personale të sipërmarrësit në policinë shqiptare të dobishme për krahasimin e ADN-së.

Gruaja shqiptare, para një duzine punonjësesh të parukerive në pronësi të partnerit të saj në Itali, në qendrën tregtare të Valtiberinos, të mbledhura për t’i njoftuar zhdukjen e 45-vjeçarit, mësohe të ketë thënë: “Nuk e di nëse Davide është konfliktuar me dikë”.

Pse kishte ardhur Davide Pecorelli në Shqipëri? 

Në kohët e fundit ai ka mbërritur disa herë për t’u kujdesur për disa biznese, që kishin të bënin me tregtimin e lazerëve për qendrat e bukurisë dhe produktet e flokëve.

Mbi të gjitha, lazerët janë makineri veçanërisht të shtrenjta dhe me sa duket, vetëm midis Tiranës dhe Vlorës, Pecorelli po negocionte shitjen e tyre tek disa klientë të paidentifikuar.

Një përpjekje tregtare, e cila u bë e domosdoshme edhe pse, në Itali, duke marrë parasysh edhe pasojat që vijnë nga pandemia, gjërat në të vërtetë nuk po shkonin mirë.

Ish-gjyqtari, në fakt, kishte probleme si me hotelin me dy yje në Lama ashtu edhe me qendrat e bukurisë dhe dyqanet e flokëve të vendosura midis San Giustinos, Sansepolcros, Città di Castello dhe Corciano.

“Me pak fjalë, një situatë e komplikuar për t’u zgjidhur, por ai gjithmonë e kishte zakon të shikonte përpara dhe të provonte aventura të reja sipërmarrëse”, – vijon “La Nazione”.

Sipas burimeve të grupit hetimor shqiptar, në makinë janë gjentur një orë e djegur dhe dy kocka dhe një celular, por nuk është zbuluar trupi i dekompozuar nga djegia.

Deri në këtë fazë të hetimit, policia dhe Prokuroria e Pukës janë duke hetuar mbi rrethanat e zhdukjes së tregtarit Italian, i cili ka humbur kontaktet dhe gjurmët që prej datës 6 janar.