Delegacioni i Komisionit të Venecias ka nisur një takim me opozitën jashtëparlamentare që në orën 08.15 minuta të ditës së dytë të vizitës së tyre në Tiranë.
Të pranishëm në takim asistojnë kreu i PD, Lulzim Basha, nënkryetari i LSI, Petrit Vasili, Sekretari i Përgjithshëm i PD, Gazmend Bardhi dhe ish deputeti i PD, Oerd Bylykbashi.
Delegacioni i Venecias po zhvillon takime informuese mbi procesin e ndjekur për emërimin e anëtarëve të Gjykatës Kushtetuese, një debat mjaft i ashpër mes presidencës dhe mazhorancës kryesisht gjatë vitit të shkuar.
Kujtojmë se Komisioni Hetimor i ngritur për shkarkimin e presidentit i dërgoi për opinion disa pyetje Komisionit të Venecias, e po ashtu edhe presidenti.
Një ditë më parë, delegacioni takoi kreun e Kuvendit, Gramoz Ruçi dhe anëtarët e Komisionit Hetimor të drejtuar nga Ulsi Manja.
Pas mbledhjes së informacioneve nga të gjitha palët, Komisioni i Venecias do të dalë me një raport gjatë seancës që pritet të mbahet në 20-21 mars.
Financuar Nga Bashkimi Europian
