Futi Kosovën në hartën e Serbisë, ‘gafa’ e Ramës shkakton ‘furtunë’ me reagime, raportim edhe në median serbe

Kryeministri Edi Rama postoi sot në profilin e tij në Facebook një video ku tregonte hartën e investimeve për sigurimin e furnizimit 24 orë me ujë në zonat rurale të vendit nga veriu në jug,

Ajo që ra në sy dhe ngjalli reagime të shumta ishte fakti se në hartën e publikuar Republika e Kosovës figuronte brenda territorit të Serbisë.

Reagimet kanë qenë të shumta, nga qytatarë që e quanin Ramën si  “mikun e Vuçiçit”. Një tjetër qytetar i kërkon llogari kryeministrit Rama, i cili i përgjigjet se ka qenë thjesht një gabim.

Disa orë më vonë kryeministri ka zëvendësuar videon me një tjetër, ku duket vetëm kufiri i Shqipërisë dhe jo kufijtë e vendeve të tjera të Ballkanit.

Reagime ka pasur edhe nga funksionarë në Kosovë, si zyrtari i LDK-së, Arben Gashi, i cili ka pyetur Ramën se ku është Kosova.

“I padashtun kryeministër, ku është Kosova?”, pyet Gashi.

Po ashtu, ka reaguar edhe ish-kryeministri i Shqipërisë Sali Berisha, që e quan një veprimin e Ramës një akt tradhëtie.

Një gjë e tillë nuk ka kaluar pa vëmendjen e mediave serbe. Media e Serbisë B92 nënvizon se pas këtij skandali me hartat, “Prishtina është në shok”. B92 citon gazetën Ekspress e cila ishte ndër të parat që raportoi lajmin, duke sqaruar sesi kryeministri shqiptar ‘zhduku’ Kosovën nga harta.