Gazeta e majtë sulmon Ramën: E dije të kaluarën kriminale të Pjetrit në Itali

Gazeta e majtë Dita i ka kushtuar një editorial skandalit të kryebashkiakut në pritje të Shkodrës, Valdrin Pjetri që rezulton i dënuar për trafik droge në Itali.

Kritikat më të mëdha ia adreson kryeministrit Rama, për të cilin thotë se e ka “përkëdhelur” Pjetrin duke i ofruar poste të rëndësishme, nga drejtori i Hipotekës, Prefekt i qarkut dhe së fundmi postin e kandidatit për kryebashkiak. Gazeta shkruan se Rama kishte informacione për të kaluarën “e errët” të Pjetrit ndërkohë që shtron pyetjen se deri kur do të vijojë mbështetja e tij për “të fortët” dhe të inkriminuarit.

“Asnjëherë një përfaqësues i së majtës në Shkodër por jo vetëm aty nuk është gjendur në një pozitë të tillë.

Ajo që e ka dalluar PS-në nga partitë e tjera kanë qenë pikërisht disa vlera krejt të kundërta me këto që po shfaqen përditë e më qartë tek grupimi i Rilindjes”, shkruan Dita.

Editoriali i plotë:

Për disa kohë, Valdrin Pjetri ishte i përkëdheluri i Edi Ramës dhe i Rilindjes.

Në pak kohë ai kaloi përmes disa posteve të rëndësishme, dy nga të cilat, ai i drejtuesit të Hipotekës në Shkodër dhe prefekt i rrethit, ishin nga më të njohurat.

Ai u bë aq i rëndësishëm, sa që, pa asnjë lloj droje se mund të gabojë, shefi i qeverisë i ngarkoi atij detyrën e primarit politik të Shkodrës, duke qenë në të njëjtën kohë edhe kryetari i ardhshëm i Bashkisë.

Sot publiku mësoi se paralajmërimet fillimisht në media për një dënim të mundshëm të Valdrinit në Itali, janë të vërteta, ashtu si edhe përfshirja e tij në tregtimin e drogës.

Po sot, z.Rama lau shpejt e shpejt duart dhe fajin politik e moral e hodhi mbi shpatullat e Valdrinit, i cili, është e pabesueshme të jetë kaq miop, sa të besojë se gjëra të tilla mund të mbesnin të mbuluara.

E dinte ai dhe jo vetëm ai.

Nuk është hera e parë që Edi Rama, pasi emëron njerëz me precedentë të rëndë penalë apo kapet me presh në duar si te Unaza, e heqë nga vetja përgjegjësinë dhe e kalon si pa të keq diku tjetër.

Një shitje e shpejtë, për të shpëtuar veten; braktisje për të qenë përsëri në lojën e politikës; hedhje e qyrkut të fajit tek vetëm një pjesë e fajtorit dhe zbardhjen e certifikatës së pastërtisë tek vetja; mohimin e atij që kishte pranë për të rritur besueshmërinë ndaj vetes; gjithçka, gjithë autoritetin e shtetit, “babloku” narcist i Rilindjes mund ta flijojë brenda ditës, nëse kjo do duhet për të mos iu cënuar imazhi i tij.

Nuk e kupton që është vetëm çështje kohe që ai imazh publik të zhbëhet.

Sepse është i rremë.

Elvis Roshi ishte një shembull, të cilin menduam se nuk do të përsëritej. Pasi e mbrojti, e la të gjithë fajin në portën e kavajasit, duke bërë të leshtin që nuk paska ditur asgjë.

Vangjush Dako po ashtu. I mbrojtur me afsh dhe duke bërë krahasime shifrash se sa kishte fituar në kohën e Berishës, sa në kohën e Metës, sa në kohën e Ramës, pastaj u ftillua papritur vetëm pas vendimit të DASH.

Deputeti Prenga, e njëjta rrugë, trafik narkotikësh, dënime në shtetin fqinj, pastaj përvetësime pronash, pasuri e dyshimtë, shtëpi, vila, toka dhe, në fund, ndarja duke zhveshur qyrkun e fajit.

Nesër do ndodhë edhe me Qazim Sejdiun; tre mandatet e tij në Elbasan janë të mbushur me ngjarje bandash me njerëz shumë afër tij të përfshirë. E megjithatë vetëm Edi i gjatë nuk ka parë e as ka dëgjuar ende gjë. Vazhdoi e lëvdoi Qazimin gjatë gjithë fushatës, e pas pak kohësh do mbajë një tjetër fjalim publik ndarjeje, me fjalë të zgjedhura prej “të padituri”.

Do bjerë gjykimi edhe mbi Gjiknurin. Megaskandali i Unazës nuk është vetëm vepër e ish-ministrit, siç nuk janë miliardat e koncesioneve; të cilat na u premtua se do zhbëheshin, por Rilindja i dhjetëfishoi me emrin e ri PPP.

Asnjëherë PS nuk ka qenë kaq e inkriminuar.

Asnjëherë një përfaqësues i së majtës në Shkodër por jo vetëm aty nuk është gjendur në një pozitë të tillë.

Ajo që e ka dalluar PS-në nga partitë e tjera kanë qenë pikërisht disa vlera krejt të kundërta me këto që po shfaqen përditë e më qartë tek grupimi i Rilindjes.

Grupim, i cili, e ka kthyer partinë më institucionale  në Shqipëri nga parti të votës së brendshme dhe vendimeve kolegjiale të forumeve, në parti të urdhërave me ëhatsap dhe diktatit delirant të një individi; të kryetarit zot – shkop që shkarravit mbi shtetin dhe financat si me bojrat “te oxhaku i Adit”; që luan me institucionet dhe emërimet si me koshin e basketbollit që ka në zyrë.

Po, zoti Rama po, këtë herë ke plotësisht të drejtë: Valdrini nuk ka asnjë lidhje me PS-në.

As ti nuk ke.