Flash News

Zbulohet skema mashtruese online, AKSK apel qytetarëve: Si duhet të mbroheni

Imami Ahmed Kalaja rrezikon deri në 3 vite burgim, akuzohet për pengim të drejtësisë

Lëndë piroteknike pranë Universitetit Politeknik, policia sekuestron materialet dhe nis hetimet

Të shtëna në Allias, 31-vjeçari qëllohet nga komshiu, autori zhduket pas ngjarjes

Posta e mëngjesit/ Me 2 rreshta: Çfarë pati rëndësi dje në Shqipëri

KRYESORE

Gazetarët përballë COVID-19/ Armand Bajrami: Raportimi sfidë familjare. Më trondit ajo pakicë njerëzish që s`respektojnë masat

Politiko 15 Prill 2020, 21:02

Armand Bajrami është një nga gazetarët e njohur të terrenit në vend. Atë jemi mësuar ta shohim shpesh në ekranin e A2 CNN duke raportuar nga ngjarje të kronikës, gjykatat, komisariatet e policisë apo prokurori. E kemi parë edhe në studio televizive duke dhënë detaje nga ngjarje të ndryshme të kronikës në vendin tonë. Por, gjatë marsit dhe tani në prill, gazetari i A2 CNN ka ‘zhveshur’ xhaketën e gazetarit të kronikës, duke u përshtatur me realitetin e ri të krijuar nga COVID-19. Ai ka raportuar aktualitetin e pse jo ngjarje sociale. Politiko.al zhvilloi një intervistë me Mandin, siç kolegët e thërrasin shkurt, ku e kemi pyetur rreth ‘përshtatjes’ së tij me situatën.

Mandi tregon se në fillim ishte emocionalisht e vështirë, për shkak të ndryshimit të jetesës por edhe për frikën nga infektimi me COVID-19. Ai i gëzohet shumë solidaritetit qytetar në këtë periudhë, ndërsa tronditet nga ata që nuk zbatojnë rregullat e shtetrrethimit. Mandi vendos shumë 10-ta, ku në krye të listës qëndrojnë mjekët e më pas mësuesit. Ai tregon përjetimet familjare rreth situatës së krijuar, ndërsa thekson në fund se “COVID-19 duhet të jetë mësim” për shtetin, me qëllim forcimin e sistemit shëndetësor.

Si e ke përjetuar këtë periudhë, jeta mes COVID dhe normalitetit?

Ditët e para ishin emocionalisht të vështira. Ndryshimi i beftë i mënyrës së jetesës, i ndërveprimit social, por edhe druajtja nga infektimi me një virus të ri dhe agresiv dhe shqetësimi për familjarët më ngarkoi me një ndjesi të pakëndshme. Fatmirësisht, në fare pak ditë e kalova atë gjendje. Puna në newsroom dhe terren ka marrë rrjedhën e saj të zakontë. Diferencë bën rikonturimi i disa sjelljeve të zakonshme, në zbatim të respektimit të rregullave anti-covid. Nga ana tjetër, më mungojnë shumë shëtitjet në natyre, “arratisjet” nga Tirana, shtrëngimet e duarve me miqtë dhe përqafimet.

Çfarë të bën më shumë përshtypje, të trondit apo të gëzon?

Më gëzon solidariteti që kam parë këto ditë ndër qytetarë. Dëshira e disave për të ndihmuar me aq sa munden njerëzit në nevojë. Përpjekja e disa të tjerëve për të induktuar energji pozitive, apo për të motivuar dhe ndihmuar shpirtërisht të tjerët për t’ua bërë më të lehtë përballimin e siutuatës. Më trondit fakti që, ndonëse në pakicë, ka qytetarë të pa bindur, që nuk respektojnë rregullat e distancimit fizik apo të izolimit. Flas për kategorinë e personave që, ndonëse nuk e kanë të nevojshme, abuzojnë me orët e izolimit, grumbullohen, injorojnë rregullat, krenohen madje me faktin, pa u ndërgjegjësuar që bëhen rrezik jo vetëm për veten, por edhe për të tjerët.

Kujt do t`i vinit notën 10 në këtë emergjencë?

Nuk më mjafton vetëm një dhjetë. Përballja me Covid19 nxorri në pah anët më të mira dhe vlerat më të larta të bashkëqytetarëve tanë. Unë dua të vë shumë të tilla, por do të përmend vetëm disa. Dhjeta e parë padiskutim i takon mjekëve dhe stafit mbështetës në spitale, të cilët po tregojnë përkushtim dhe sakrificë. Një 10 për mësuesit, për punën e tyre të jashtëzakonshme dhe angazhimin madhor të vijimit të mësimit në distancë. Notën 10 nuk ua kursej as kolegëve të mi gazetarë për sakrificën e pashembullt. Nuk kanë ngurruar asnjë çast së ecuri në “tokë të minuar”, të ekspozuar ndaj virusit, por gjithmonë gati për të përmbushur misionin e informimit të publikut. Dhjetë për mua meriton çdo qytetar që në këtë situata ka ndihmuar, apo i është gjendur së paku një personi në nevojë. Dhjetë edhe për çdo punëdhënës, që ndonëse në vështirësi, ka gjetur mënyrën për të mos u ndërprerë marrëdhënien e punës apo burimin financiar të punonjësve të tij. Ndaj thashë që më duhen shumë dhjeta.

Si ndryshon jeta normale e raportimit para COVID-19 me këtë tani?

Për më shumë se një dekadë si gazetar i kronikës së zezë të gjitha raportimet e mia kanë pasur të bëjnë me krimin dhe drejtësinë. Ndërsa këto ditë, ashtu si edhe kolegët e mi në TV, i jemi përkushtuar raportimit mbi situatën COVID19. Përkohësisht dola nga “ujërat e mia”, duke raportuar për shqetësime të qytetarëve, problematika, situata dhe informacione të dobishme për publikun. Për hir të vërtetës, në ditët e para të pandemisë publiku nuk shfaqte interes për lajme jashtë kontekstit të koronavirusit.

Si e përjeton familja punën tënde të përditshme?

Unë dhe bashkëshortja ndajmë të njëjtin profesion dhe për këtë shkak edhe sfida e të raportuarit gjatë pandemisë ka qenë familjare. Kemi vijuar përditshmërinë tonë si pjesë e të njëjtit front. Shqetësim të shtuar lexojmë në sytë e prindërve, të cilët, per sigurinë e tyre, nuk i kemi vizituar që prej konfirmimit të rastit të parë me COVID në vend. Kemi shtuar numrin e telefonatave në ditë me ta dhe teksa qëndrojnë të izoluar në shtëpi, janë ndjekësit më besnikë të të gjitha raportimeve tona në ekran.

A është një moment reflektimi profesional dhe jetësor?

Patjetër që po. Kjo situatë shkaktoi dhe do të skalisë ndryshime të mëdha në mënyrën e funksionimit të medias. Ashtu si edhe tërmeti i fundvitit të shkuar në Shqipëri, pandemia tregoi edhe njëherë nevojën e madhe të mendimit të ekspertëve në TV. Ndërsa intervistat në distancë përmes aplikacioneve, shumë pak të aplikuara para pandemisë, besoj se edhe pas përfundimit të saj, do të jenë të zakonshme në çdo TV. Ndërsa reflektimi jetësor është ai më i rëndësishmi. Uroj që pas pandemisë njerëzit të jenë falenderues për çka kanë, të jenë më pranë familjeve të tyre dhe të vlerësojnë kënaqësitë e vogla të përditshmërisë. Nga ana tjetër, Covid19 duhet të jetë mësim për politika shtetërore rigoroze në forcimin e sistemit shëndetësor dhe për strategji efikase në raste ngjarjesh të pazakonta si coronaviurus.

Politiko.al