Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Gazetarët përballë Covid-19/ Klementina Cenkollari rrëfen momentin e vështirë: Kur mësova se kisha intervistuar një zyrtar të infektuar

Politiko 14 Prill 2020, 11:11

Gazetarët dhe punonjësit e medias po përballen me një sfidë të re, raportimi në kohën e një pandemie që ka ‘mbërthyer’ të gjithë planetin.

Klementina Cenkollari, gazetare e A2CNN rrëfen për politiko.al se si ka ndryshuar ritmi e një dite të zakonshme raportimi prej kësaj situate të pazakontë.

Gazetarja që prej vitesh ka mbuluar zhvillimet e politikës në vend, tregon vështirësitë mes raportimit të lajmit dhe informimit të teleshikuesve tashmë të izoluar, por edhe betejës për t’u mbrojtur në çdo moment nga ‘armiku i padukshëm’, për vete dhe familjen, ku e pret krahëhapur çdo ditë djali i saj i vogël.

Ju mbuloni zhvillimet e politikës prej vitesh në televizion, çfarë ka ndryshuar për ju si gazetare pandemia Covid 19?

Si në çdo drejtim tjetër, pandemia ka sjellë ndryshme edhe për ne mediat dhe gazetarët e terrenit.

Tashmë, nuk ka nga ato zhvillime politike me të cilat jemi mësuar t’i shohim çdo ditë, e për pasojë edhe puna ime është orientuar në trajtimin e çeshtjeve që lidhen me Covid 19.

Këtu në A2 jemi përpjekur të prekim çdo element që ndikon jetën e qytetarëve në këtë periudhë pandemie, për t'i dhënë informacion të dobishëm, e për t’ju gjendur me evidentimin e problematikave, pse jo edhe me trajimin e kronikave që lehtësojnë paksa ngarkesën që ka sjellë tek gjithësecili tek ne coronavirusi i ri.

Tashmë, në një ditë të zakonshme për ne edhe alkooli, maskat dhe dorezat janë bërë pjesë e pandashme e përditshmërisë sonë në punë.

Sa e vështirë ështe të punosh në kushtet e një pandemie, ku thuajse gjithçka është izoluar dhe karantinuar, perfshirë tanimë edhe politikën, sektorin që ju mbuloni prej vitesh?

Është e vështirë, aq më tepër kur punon në një televizion që kërkon të transmetojë me cilësi. Jam përpjekur t’i ndërthur të dyja, pra intervistat Live me aktorët e politikës, sikurse edhe përmes teknologjisë.

A janë të gatshëm politikanët gjatë kësaj periudhe t’ju përgjigjen për informacionet që ju u kërkoni?

Bazuar nga përvoja ime prej disa vitesh, rastet kur nuk marr përgjigje janë shumë të pakta. Mund të vonojë pak minuta, por përgjigja vjen përherë.

Madje, mund të them se në këtë periudhë, politikanët kanë qenë më të gatshëm për intervista apo informacione , sepse nuk bëhet fjalë për retorikë e debate politike, por për një betejë ku jemi të gjithë në një "anije", atë të fitores së betejës ndaj Koronavirus.

Si mendoni se ndikon një situatë si kjo e sotmja ne karrierën e nje gazetari?

Ka qenë një sfidë më vete edhe për median, pasi ky izolim si pasojë e nje virusi nuk ishte jetuar më parë. Mendoj se do ndihmojë në rritjen profesionale të gazetarëve, në domosdoshmërinë për ‘fact checking’ sepse veçanërisht media online ka përjetuar disa raste të ‘fake news’, e po ashtu besoj se dhënia e informacioneve praktike për shikuesit, do jetë githashtu një leksion i nxjerrë nga Covid.

Pa dyshim, Coronavirus afroi edhe më shumë të githë median me komunikimin virtual, të cilit unë i kam kushtuar edhe një kronikë. Me siguri, pas kësaj, ne gazetarët, do i përdorim edhe më shumë intervistat përmes Skype apo aplikacioneve të tjera, me ata aktorë që nuk kemi mundësi t’i intervistojmë përballë.

A keni frikë se mund të infektoheni duke qenë si zakonisht në terren?

Po. Nuk e mohoj dot. Veçanerisht në ditët e para, frika ishte më e madhe, por më pas kam arritur ta menaxhoj.

Nuk mund të mos e përmend edhe një moment të vështirë gjatë kësaj periudhe.

Bashkë me operatorin kemi intervistuar një prej zyrtareve, i cili rezultoi pozitiv me Covid-19. Ka qenë realisht një moment pasigurie, pasi mendoja se mund të isha infektuar, ndonëse nuk kisha simptoma.

Frika më e madhe ishte natyrisht për familjen time. Por, fatmirësisht, nuk kishte ndodhur dhe deri më tani kemi qenë të gjithë të sigurt.

Si po i menaxhoni veshtirësitë e të qenurit jo vetëm nje gazetare në terren, por edhe nënë e një djali të vogël?

Ka qenë një betejë e përditshme, momenti kur më duhet të ndahesha nga im bir dhe frika se ne cdo moment isha e ekspozuar ndaj virusit.

Kthimi në shtëpi është një moment tjetër i vështirë për ditën time. Im bir hap krahët të më përqafojë, por jam e privuar t’i rri pranë si zakonisht prej gjendjes ku ndodhemi. Besoj si për të gjithë, fillimisht më duhet të shkoj drejt dushit e më pas të kem mundësi ta ledhatoj atë.

Në fillim e kishte të vështirë ta kuptonte, por tanimë është ai, im bir, që në shumë raste më thotë: Mami, ik laj doçkat dhe përqafoje çunin se të kam xhan".

Realisht, kjo është pjesa më e vështirë me të cilën po përballem në këto “kohë lufte” që shpresoj ta kalojmë sa më shpejt.

Intervistoi S.Gj