Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Gazetarja kolumbiane, e rrëmbyer dhe dhunuar, merr çmimin e UNESCO ‘Guillermo Cano’

Politiko 3 Maj 2020, 08:00

Gazetarja kolumbiane, e rrëmbyer dhe dhunuar, merr çmimin e UNESCO

Gazetarja investigative kolumbiane, Jineth Bedoya Lima u shpall fituese e çmimit të UNESCO-s ‘Guillermo Cano’ 2020 që jepet çdo vit me rastin e Ditës Botërore të Lirisë së Shtypit. Ky ishte rekomandimi i një jurie të pavarur ndërkombëtare të profesionistëve të mediave, njoftoi UNESCO në një komunikatë për shtyp. Pjesë e kësaj jurie ishte edhe gazetari shqiptar, drejtori i Politiko.al, Alfred Lela.

Lindur në 1974, raportimi i Jineth Bedoya Lima është përqendruar në konfliktin e armatosur dhe procesin e paqes në Kolumbi dhe dhunën seksuale ndaj grave. Bedoya Lima ishte vetë viktimë e dhunës seksuale në vitin 2000 kur ajo u rrëmbye dhe u dhunua në lidhje me një hetim për trafikun e armëve që po zhvillonte për gazetën e përditshme ‘El Espectador’. Tre vjet më vonë, ndërsa punonte për të përditshmen El Tiempo, ajo u rrëmbye nga militantët e ish-Forcave të Armatosura Revolucionare të Kolumbisë (FARC).

"Guximi dhe angazhimi i Jineth Bedoya Lima, i ekspozuar dyfish ndaj rreziqeve të papranueshme si një grua dhe si gazetare, frymëzojnë respekt të thellë," tha Drejtori i Përgjithshëm i UNESCO-s Audrey Azoulay. "Ne kemi nevojë për punën e gazetarëve profesionistë dhe të pavarur."

"Pandemia e tanishme nënvizon rolin jetësor që luajnë gazetarët në sigurimin e të gjithëve për informacion të besueshëm, në disa raste jetësor, në situata të krizave," shtoi Azoulay. "Kjo tregon gjithashtu shumë rreziqe me të cilët gazetarët përballen kudo në botë në ushtrimin e profesionit të tyre."

"Në caktimin e Çmimit të Lirisë së Shtypit për Jineth Bedoya Lima, Juria njeh dhe mbështet guximin e saj të jashtëzakonshëm dhe angazhimin e palëkundur për të zbuluar çështje me rëndësi themelore për shoqërinë," deklaroi Giselle Khoury, Presidente e Jurisë. "Juria dëshiroi të bashkohet në denoncimin e fuqishëm të Bedoya Lima për dhunën në rritje kundër grave gazetare në Amerikën Latine dhe shumë pjesë të tjera të botës dhe përpjekjet e saj për të ndaluar këtë prirje alarmante globale."

Çmimi botëror për lirinë e shtypit UNESCO /Guillermo Cano jepet çdo vit me rastin e Ditës Botërore të Lirisë së Shtypit, që festohet në 3 maj. Ceremonia e ndarjes së çmimeve të këtij viti dhe konferenca kryesore për lirinë e shtypit e cila ishte planifikuar të zhvillohej në Hagë në bashkëpunim me Qeverinë e Hollandës do të shtyhet për shkak të krizës Covid-19.

Sidoqoftë, një seri veprimtarish dhe ngjarjesh do të mbahen në internet duke u përqëndruar në rëndësinë e lirisë së shtypit dhe punës së gazetarëve të pavarur për të siguruar qasje në informacione gjatë pandemisë, thuhet në komunikatën e UNESCO.

Çmimi prej 25,000 dollarësh vlerëson një person, organizatë ose institucion që ka dhënë një kontribut të jashtëzakonshëm në mbrojtjen ose promovimin e lirisë së shtypit, veçanërisht përballë rrezikut. Financohet nga fondacioni Guillermo Cano Isaza (Kolumbi), Fondacioni Helsingin Sanomat (Finlandë) dhe Namibia Media Trust dhe jepet çdo vit pas diskutimeve të një jurie të pavarur të gazetarëve të njohur nga të gjitha rajonet.