Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Intervista/ E vetmja grua drejtuese në degët e PD, flet Mirlinda Çollaku: Leksion i fortë qytetarie, s’është e lehtë të jesh në politikë

Politiko 3 Dhjetor 2018, 13:02

Partia Demokratike ka përfunduar procesin e zgjedhjeve të krerëve lokalë të degëve të saj në të gjithë vendin. Mes drejtuesve ra në sy edhe zgjedhja e një gruaje, konkretisht në degën numër 2 në Tiranë.

Është fjala për Mirlinda Çollakun, e cila u shpall fituese me 113 vota përballë kreut të Departamentit të ish-te Përndjekurve Politikë, Edison Çela, i cili grumbulloi vetëm 84 vota, duke u renditur si e vetmja grua e shpallur fituese në të gjitha degët e PD në rang vendi.

Në një intervistë për politiko.al Mirlinda Çollaku tregon më shumë mbi angazhimin e saj në politikë dhe ndan emocionet e të qenurit e vetmja grua drejtuese në degët e Partisë Demokratike.

Sipas saj, nuk është aspak e lehtë të qenurit një grua në politikë, për shkak se lidhet edhe me një nivel të caktuar të emancipimit të shoqërisë. Megjithatë, ajo e shikon më shumë si një leksion të fortë qytetarie.

Çollaku shton se sfida e vetme e Partisë Demokratike është lufta me mafien e krimin e organizuar dhe për këtë fton të gjithë demokratët, qytetarët dhe intelektualët në një front të madh kundër asaj që ajo e cilëson ‘modeli i së keqes’.

Ju vini nga bota akademike, çfarë ju shtyu të angazhoheni në politikë?

Është e vërtetë që unë vij nga bota akademike. Kam mbaruar studimet në Bullgari në vitin 2001 për Filologji dhe Master në Sociolinguistikë. Më pas kam mbaruar në Tiranë për Drejtësi dhe e specializuar në të drejtat e pronësisë intelektuale. Prej shume vitesh drejtoj një Qendër ekspertize për të Drejtat e autorit. Jam rregullisht e përfshirë në projekte rajonale dhe evropiane të BE në cilësinë e ekspertes për të drejtat e autorit.

Për hir të së vërtetës, angazhimin tim në politikë e kam prej disa vitesh pranë Partisë Demokratike të degës 2 dhe ky angazhim vjen, ndoshta për hir të natyrës sime që nuk mund të qëndroj indiferente në rastet kur shoh, që mund të ndihmoj apo kontribuoj me diçka, por edhe si një zgjedhje natyrale, pasi vij nga një familje intelektualesh të cilët e kanë ndjerë drejtpërdrejt peshën e dhunën e regjimit te diktaturës komuniste, me familjarë të burgosur e internuar për mbi 20 vite.

Por padyshim, marrja e përgjegjësisë së drejtimit të degës 2 PD, është një hap angazhimi më themelor dhe i rëndësishëm. E kam pranuar pa hezitim këtë sfidë, pasi e konsideroj jetike për vendin angazhimin maksimal të elitës intelektuale, në kushtet e një emergjence kombëtare ku ndodhet sot vendi. Besoj më shumë se kurrë se, sot shoqëria shqiptare ka nevojë të bëjë ndarjen e qartë midis të mirës e të keqes dhe kujdes jo midis të majtës e të djathtës. Unë do isha e lumtur që të mund të kishim këtë betejë në Shqipëri, por fatkeqësisht sot e majta dhe PS është po kaq në hall sa çdo shqiptar i ndershëm, për shkak të kapjes së saj nga një organizatë kriminale siç është Rilindja. Unë kam një djalë 16 vjeç të cilin dua ta rris në këtë vend. Për të mirën e tij dhe të gjithë njerëzve të ndershëm të këtij vendi, të gjithë duhet sot të mos heshtim, por të rreshtohemi në një front të madh kundër të keqes, ashtu si dikur në vitin ‘92.

Jeni zgjedhur gruaja e vetme drejtuese në degët e PD, si ndiheni?

Po është e vërtetë dhe emocionet i kam pak të përziera për këtë fakt. Unë nuk jam shumë partizane e favorizimeve gjinore, siç janë kuotat gjinore, pasi vetë në jetë jam mësuar të futem në gara dhe më shumë se gjithçka besoj të gara, konkurrenca por kjo kur është e ndershme dhe bazohet tek aftësitë e individit. E megjithatë, pavarësisht kësaj, shoqëria shqiptare dhe sidomos jeta politike në vend është e dominuar nga burrat dhe të qenit grua në politikë nuk është shumë e lehtë, pasi lidhet edhe me një nivel të caktuar të emancipimit të shoqërisë. Jam vërtetë e impresionuar nga mbështetja që mora ditën e zgjedhjeve nga drejtuesit e degës 2 PD, pasi e konsideroj si një leksion të fortë qytetarie që, votuesit e degës ku lindi Partia Demokratike kanë dhënë me verdiktin e tyre.

Si e vlerësoni procesin e zgjedhjeve brenda PD dhe konkretisht në degën numër 2?

Jam shumë e kënaqur me mbarëvajtjen e të gjithë procesit. Kanë qenë 220 votues dhe kanë marre pjesë ne votim 197, çka është tregues i dëshirës, angazhimit, shpresës dhe vullnetit të demokratëve të degës 2 për ta fuqizuar fort atë.

Ajo pjesëmarrje dhe fryma e votimeve më kanë mbushur me shpresë e optimizëm, se ndryshimi do të jetë i shpejtë dhe tërësor për PD e degës 2 dhe të gjithë ata qe njohin strukturën zgjedhore në Shqipëri e pohojnë që, kur dega 2 PD ndryshon kjo është fryma që përcillet në të gjithë vendin.

Cilat janë sfidat dhe objektivat tuaja si drejtuese e re e PD në këtë zonë të Tiranës?

Dega 2 PD nga sot është në fushatë nga pikëpamja e organizimit dhe veprimit të strukturave në terren. Por mbi të gjitha, objektivi im për këtë degë është që të afrohen e te kontribuojnë së pari të gjithë demokratët të cilët janë shtylla kurrizore e PD, por krahas tyre do të kërkoj fort që të angazhohen edhe qytetarët e ndershëm të zonës, intelektualët, figura e personalitete që fatmirësisht kjo degë i ka me shumicë, pasi ashtu siç e thashë me sipër ne nuk kemi betejë politike me formacionet natyrale politike. Ne jemi në lufte me mafien e krimin e organizuar, i cili sot ka pushtetin dhe kontrollon çdo qelizë të shtetit. E kjo nuk është sfidë vetëm e Partisë Demokratike, por e çdo qytetari të ndershëm që refuzon këtë model të të keqes. E për këtë arsye është domosdoshmëri bashkimi I vullneteve të të gjithë qytetarëve të lirë të këtij vendi për tu bashkuar si në vitin 92, në një front të madh kundër kësaj të keqe që po shpopullon Shqipërinë. Kjo është dhe sfida ime dhe e demokratëve të degës 2 të PD.

Politiko.al