Java në Gif: Kur Qeveria Rama e kupton 'Taken' pas 11 vjetësh

nga Ina Xhani  

Taken 4

Në 2008 Luc Beson dhe Robert Mark Kamen shkruajnë skenarin e një filmI, që më pas u ndoq nga dy të tjerë, për një ish-agjent të FBI që shkon të shpëtojë vajzën e rrëmbyer në Paris. Gjatë 90 minutave, ish-agjenti fluturon për në Paris, dëgjon për herë të parë për njëfarë Marko, thotë një frazë që kthehet në 'nonën e memeve,' vret nja 20 vetë (pa i kërkuar llogari kush), dhe shpëton vajzën. 11 vite më vonë, qeveria shqiptare i çon fjalë ish-agjentit të FBI-së se i ka prekë në sedër shqiptarët dhe e fton që të ‘rrëmbehet’ nga Shqipëria...gjetje e lezetshme... vetëm se është 11 vite me vonesë!!! Vetëm qeverisë i ka ngel ora te “Marko from Tropozha”!!!

Taken’s Nr 1 fan

Ministri i Turizmit, Blendi Klosi reagon pas protestës së opozitës para Parlamentit, ku u sulmua nga qytetarët pasi i provokoi duke u kaluar ngjitur, duke u shprehur se: “Mbase nuk është dita më e artë sot, pas asaj që ndodhi në Parlament, që të ftojmë Liamin e të vizitojë Shqipërinë. Mbase do të shohë skenën që më ndodhi mua dje, që është siç e xhiroi ai në film. Por ajo nuk është Shqipëria, është vetëm një minutë." Paskemi një fans të Neeson-it këtu. Hej Blendi, Neeson s'ka luajtur veç te Taken... shih ndonjë film tjetër.

Po flasim për të njëjtin Durrës???

Në emisionin ‘Dritare’ në News 24, Taulant Balla deklaroi se Vangjush Dako bërë një punë të shkëlquer për qytetin e Durrësit dhe meriton të rizgjidhet...

Po unë mezi e gjeta!!!

Kujtim Gjuzi, kryetar i Partisë Konservatore, i vënë në listat e kryetarit Lulzim Basha i 19-ti në Durrës, ka thënë për Top Channel se nuk ka arsye t’a lëshojë mandatin duke shtuar se tani është një nga drejtuesit më të lartë të grupit të ri opozitar. “Kemi patur dje një kontakt me këshilltarin më të lartë të zyrës së OSBE-së në Tiranë, i cili thotë se jemi të inkurajuar nga ambasadori që të mos e lëshojmë mandatin,” është shprehur Gjuzi. Me pak fjalë: "mua shyqyr që me erdhi rasti të pi kafe te bari i Parlamentit e ta parkoj makinën ku të dua, ju thoni li mandatin".

U habit kush?

Shqipëria renditet e fundit nga 35 shtete europiane në ‘Indeksin e Shëndetit Konsumator 2018’, të matur nga instituti suedez, Health Consumer Powerhouse.

Jo po ta dini...

“Do vazhdoj t’i jap të njëjtën shumë që u jap jo nga të ardhurat si deputet por nga të miat. Nuk dua që ato të vuajnë vendimin që kemi marrë ne për djegien e mandateve”, ka qenë përgjigja e ish-deputetit Agron Shehaj kur është pyetur se çfarë do të ndodhi me 6 vajzat nga Kukësi që ai ndihmonte me rrogën e tij si deputet.