Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Kampionati i zgjedhjeve/ Çfarë ndikimi pati politika në futboll dhe ‘padroni’ që i mungoi Tiranës

Politiko 29 Maj 2017, 10:56

Kampionati i këtij viti në futbollin shqiptar do të mbahet mend për shumë ngjarje, që nga arbitrimi skandaloz, shpallja për herë të parë e klubit të Kukësit kampion, frenimi i Skënderbeut dhe rënia në një kategori më poshtë e Tiranës, klubi më me shumë tituj në Shqipëri.

Kreu i FSHF-së, Armand Duka ka qenë shumë i akuzuar përgjatë gjithë sezonit, se ishte ai që ka patur ndikimin më të madh në përcaktimin e fatit të kampionatit. Presidenti i Partizanit, Gazmend Demi vazhdon të lëshojë akuza dhe kritika ndaj Dukës.

Nuk mungojnë ata analistë sportiv që e konsiderojnë kampionatin e këtij viti si kampionatin e politikës apo të zgjedhjeve, dhe këtu duhet të ndalemi gjatë.

Në një kohë kur po mbyllej kampionati, politika kishte nisur fushatën elektorale për zgjedhjet e 2017-ës dhe në fushatë sportit i kushtohet një rëndësi e madhe për shkak të ndikimit që ka te elektorati, kryesisht te të rinjtë. Jo më kot në çdo katër vite dëgjojmë premtime për ndërtime stadiumesh, ngritje të akademive dhe investime marramendëse, pasi sporti dhe veçanërisht futbolli ka shumë vota që duhen mbledhur nga partitë.

Java e fundit e kampionatit vendosi përpara rrezikut për të rënë nga kategoria katër skuadra, tre prej tyre janë vetë historia e futbollit shqiptar.

Tirana, Vllaznia, Flamurtari dhe Laçi e panë veten duke luftuar për mbijetesë. Skuadra kurbinase ishte më komode në këtë situatë pasi luante ndeshjen e fundit në shtëpi dhe presidenti i klubit nuk kishte pranuar ofertat poshtë tavolinës për të zbritur një kategori më poshtë.

Tre ekipet e tjera bënë përpjekjet e fundit dhe ishte Tirana ajo që u rrëzua për herë të parë në histori në kategorinë inferiore.

Nëse politika nuk ka patur gisht në rrëzimin e Tiranës, atëherë minimalisht duhet të dyshojmë se ka patur ndikim në shpëtimin e skuadrave të tjera.

Flamurtari është një prej ekipeve me më shumë probleme në Shqipëri. Lojtarë që ankohen për pagat dhe përplasje të pafundme brenda skuadrës, e megjithatë arritën të rezistonin. Vlonjatët kishin një aleat të fortë në krahun e tyre, kryeministrin Edi Rama. Rama është kandidat për deputet në Vlorë, i zgjedhur aty në 2013-ën, ndërsa lista e 2017-ës kryesohet nga Damian Gjiknuri, ministër i Energjisë dhe një prej njerëzve më besnik të kryeministrit.

Vetë Rama u ka premtuar vlonjatëve ndërtimin e stadiumit të ri, i cili nuk do kishte kuptim me Flamurtarin në një kategori më poshtë. Çfarë do u premtonin Rama, Gjiknuri dhe kryebashkiaku Leli qytetarëve të Vlorës për sportin gjatë kësaj fushate nëse Flamurtari rrëzohej nga kategoria? Asgjë, do rrezikonin votat e tyre.

Të hidhemi te Vllazania. Këtu marrëveshja politike duket se është me bazë të gjerë. Klubi ka president bashkinë e Shkodrës që drejtohet nga demokratja Voltana Ademi, ndërsa lista e PS udhëhiqet nga ministri i Jashtëm Ditmir Bushati. Bushati ka qenë një nga ministrat më të sulmuar nga opozita dhe pavarësisht dy ndryshimeve rrënjësore në qeveri, ai nuk u prek, duke treguar për pozitat dhe lidhjet e forta që ka krijuar me kryeministrin Rama.

Ademi te PD dhe Bushati te PS nuk mund të pranonin kurrsesi rrëzimin e Vllaznisë, në një kohë kur stadium “Loro Boriçi” ka më pak se një vit që është inaguruar. Rrëzimi i Vllaznisë do të ishte goditje e madhe për fushatën e PS në Shkodër, e cila bazohet kryesisht te investimet në “Loro Boriçi” dhe teatri “Migjeni”.

Në këtë situatë, Tirana e gjeti veten pa një padron të fuqishëm politik. Kryebashkiaku i Tiranës, Erion Veliaj, i cili supozohej të ndihmonte bardheblutë, i braktisi ata. Fytyra e tij e qeshur kur në zyrën e bashkisë shtrëngonin duart Refik Halili nga Tirana dhe Gazmend Demi nga Partizani, për shfrytëzimin e përbashkët të stadiumit ‘Selman Stërmasi’, nuk u shfaq në stadium dhe në media kur klubi i kryeqytetit ndodhej në momentin më të vështirë në histori.

Pa folur gjatë për shpalljen e Kukësit kampion, aty ku presidenti i klubit, Safet Gjici kandidon për deputet në listën e PS, ky kampionat tregoi se nuk ishte thjesht përballje forcash në fushën e lojës. Dështimet e tij të bëjnë të dyshosh se kampionati u luajt në tribuna, aty ku javën e fundit u panë ministra dhe deputetë që bëjnë tifozllik vetëm në vite elektorale dhe fushatash.  

Rënia nga kategoria, Bamir Topi: Tirana u asgjesua; shpëtimi jo në duart e Ramës, Bashës dhe Berishës

 

Të fundit