Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Karantina me 5 pyetje/ Stefan Çapaliku: Covid-19 nuk do ta ndryshojë botën…as faktin se jemi populli më fatkeq në Europë

Politiko 7 Prill 2020, 12:54

Karantina me 5 pyetje/ Stefan Çapaliku: Covid-19 nuk do ta ndryshojë

Shkrimtari Stefan Çapaliku, në një intervistë për Politiko.al, thotë se karantina nuk u sjell dobi atyre që shkruajnë duke qenë se ata janë përherë në karantinë. Shton se është pessimist për atë që e konsideron perceptimin e popullit shqiptar si më fatkeqi në Europë.

Si shkrimtar, padyshim, ka edhe sugjerime leximi.

Çfarë imagjinoje (të vinte në mend) kur dëgjoje fjalën ‘karantinë’ para se ti (dhe bota) të përballeshme me Covid-19?

Fjalën “karantinë” e kam dëgjuar në dy kontekste të ndryshme. Njëri ishte letrar dhe historik dhe kishte lidhje me disa lexime rreth historive mesjetare dhe veneciane, kurse konteksti i dytë ishte ai ushtarak dhe kishte lidhje me dënimet që jepeshin në ushtri apo zbore. Më vonë kur vizitova disa qytete, ish domene venedikase, si Dubrovniku përshembull, pashë me sytë e mi hapësira kolosale, rrethuar prej muresh të trasha dhe frëngjishë jo fort të ngushta, por të mbështjellë prej hekurash të shëndetshëm, që thirreshin quarantine, dhe kishin lidhje me numrin dyzet. Ndaj dhe kur u shpall karantina dhe u tha se do mbylleshim brenda veç për 14 ditë, kishte diçka që nuk shkonte për veshët e mi.

Cilat janë kufizimet më të mëdha që të ka sjellë karantina? A ka ndonjë plus?

Thonë se të bën mirë për të shkruar dhe për të lexuar, por në rastin tim nuk është e vertetë. Një shkrimtar është gjithmonë në karantinë. Ndryshimi i vetëm është se kalendarin dhe orarin e karantinës e vendosë vetë. Në momentin që ta vendosin të tjerët atëhere një rregjim i tillë zor se vlen për gjë tjetër më shumë sesa për të sistemuar albumet me fotografi, riklasifikuar librat në bibliotekë apo për të parë më me kujdes tavanin e dhomës së gjumit.

Si mendon se do të ndryshojë bota pas Covid-19?

Nuk mendoj se do të ndryshojë bota mbas Covid-19. Shpresoj vetëm të bjerë nepsi materialist i njerëzve, të rriten shprehitë e besimit dhe vemendja ndaj detajeve.

Çfarë të ka bërë përshtypje gjatë kësaj kohe të përballjes me Covid-19: çfarë të ka bërë më pesimist apo optimist?

Pesimizmi ka të bëjë me përceptimin e këtij populli si më fatkeqi në Europë. Sa herë që vendi ynë i afrohet një caku të ëndërruar, ndodh diçka jashtë vullnetit të tij që e zbyth, e tërheq nga mbrapa, ia ul entuziazmin. Kurse optimizmi në këtë kohë ka marrë shkas prej kujtimesh të trishtuara që vijnë nga eksperiancat e gjalla të njerëzve që kanë përjetuar burgjet e gjata apo internimet apo edhe nga leximet e letërsisë së zezë.

Si ka shkuar koha gjatë karantinës: mund të përshkruash ditën tipike në izolim? Cilët filma dhe libra do të sugjeroje për karantinën?

Që ditën më janë kujtuar dy vargje të Fishtës nga “Lahuta e Malcis” që thonë:

“Si qoftë hajri e baftë Zoti

Orën çuet po e ka Hoti”

Kurse sa i takon sugjerimeve për libra apo filma mendoj se është rasti t’i kthehemi atyre që i kemi pas shtyrë për një kohë më të mirë. Roberto Bolano apo Uwe Timm nga letërsia dhe Wim Wenders dhe Werner Herzog nga kinemaja.

©Politiko.al