Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

'Kazan' apo Media? Këto janë 12 pushimet nga puna, lëvizjet dhe konfliktet më të zhurmshme në median shqiptarë përgjatë 2017-s

Politiko 31 Dhjetor 2017, 18:20
'Kazan' apo Media? Këto janë 12 pushimet nga puna,

Viti 2017 do të mbahet mend edhe për disa nga lëvizjet më të bujshme në median shqiptare. Ne kemi renditur 12 prej lëvizjeve që janë komentuar më shumë dhe ato që kanë ndikuar në ndryshimin e linjës editoriale në gazeta dhe televizione të rëndësishme në vend.

12-Jonida Shehu largohet nga Top Channel

Jonida Shehu braktisi parpritur televizionin ‘Top Channel’. Ashtu siç u raportua në portale, shkak ishte bërë një gjobë e vendosur nga drejtuesit e emisionit ‘Pasdite’ që moderatorja nuk pranoi ta paguante.

11-Mimoza Picari largohet nga Ora News

Gazetarja Mimoza Picari, e cila ka një karrierë të gjatë në median shqiptare, u largua nga drejtimi i emisionit investigativ “Boom”, në Ora News. Arsyet e largimit nuk janë bërë publike.

10-Lufti Dervishi në RTSH me ‘Përballë’

Gazetari dhe profesori i Gazetarisë, Lufti Dervishi rikthehet në RTSH me emisionin “Përballë”. Që në sezonin e parë, Dervishi arriti të ketë në studio drejtuesit kryesorë të politikës shqiptare.

9-Marina Vjollca kalon te Tv Klan

Një lëvizje që është komentuar gjatë në 2017-n është largimi i Marina Vjollcës nga Top Channel. Bukuroshes bionde iu besua drejtimi i emisionit ‘Ces't La Vie', në Tv Klan.

8-Elona Meço te zyra e PD, zëvendësohet nga Merita Haklaj

Elona Meço prej vitesh kishte mbuluar Partinë Demokratike në Top Channel, por këtë vit, ajo vendosi të përfshihej në parti duke marrë postin e drejtoreshës së zyrës së shtypit. Vendin e Meços në ‘TCH’ e zuri një tjetër gazetare me eksperiencë, Merita Haklaj.

7-Hapet ‘Fax News’, Abilekaj drejtor

Në 2017-n, tregut mediatik shqiptar iu shtua një tjetër televizion, Fax News. Me pronar Kasem Hysenbelliun, ky televizion ka ndjekur një linjë editoriale kundër qeverisë, ndryshe nga shumë televizione të tjera në vend. Drejtor Ekzekutiv i ‘Fax News’ u emërua gazetari Enton Abilekaj.

6-Artur Zheji rikthehet me ‘360 gradë’

Artur Zheji u rikthye te publiku shqiptar me emisionin e tij ‘360 gradë’. Këtë vit, ky emision nisi transmetimin në Ora News duke siguruar menjëherë një audiencë besnike.

5-Tedi Blushi largohet nga ‘GSH’ dhe ‘BW’

Largimi i Tedi Blushit si zv/kryeredaktor i Gazetës Shqiptare dhe drejtor i Balkanweb u shoqërua me shumë zhurmë. Ai akuzoi pronarët e këtyre medieve se e kishin shkarkuar pa asnjë motiv. Pak ditë më vonë, Blushi emërohet në zyrën e shtypit të presidentit Ilir Meta.

4-Rikthimi dhe largimi i Adi Krastës nga ‘Top Channel’

Në janar të 2017-s, Adi Krasta do të rikthehej sërish në Top Channel. Ky rikthim tërhoqi vëmendje të madhe për shkak se televizioni në fjalë nuk ka pranuar më parë të rikthejë të larguarit, duke bërë një përjashtim me rastin e Krastës. Gjithsesi, bashkëpunimi me ‘TCH’ do të zgjaste vetëm një sezon dhe në gjysmën e dytë të vitit që po mbyllet, Krasta largohet për t’u shfaqur në muajin dhjetor në drejtim të Festivalit të Këngës në RTSH.

3-Alfred Lela largohet nga ‘Mapo’

Alfred Lela njoftoi në fillim të vitit se ishte larguar  nga detyra e drejtorit të Medias ‘Mapo’. Në disa prononcime, Lela shpjegoi se arsyeja e largimit ishte ndryshimi i linjës editoriale të gazetës nga botuesi Henri Çili. Ai kishte qenë me Mapon që në hapjen e saj në korrik 2010, kur e kishte filluar si zv/kryeredaktor. Tre muaj më vonë Lela hapi Politiko.al.

2-Armand Shkullaku largohet nga ‘ABC News’

Një tjetër lëvizje që shkaktoi shumë zhurmë ishte edhe largimi i Armand Shkullakut nga Abc News. Një televizion që kishte bërë opozitë të fortë kundër kryeministrit Edi Rama dhe kryebashkiakut Erion Veliaj, nuk do të kishte më në krye Shkullakun. Ky ishte një vendim i marrë nga pronari Aleksandër Frangaj.

1-Sokol Balla ‘divorc’ me Top Channel

Marrëdhënia shumëvjeçare e Sokol Ballës me Top Channel mund të konsiderohet pothuajse e përfunduar. Megjithatë, kur palët nuk kanë zyrtarizuar ende divorcin përfundimtar, i konfirmuar është lajmi se Sokol Balla nuk është më drejtor i Informacionit. Largimi i Ballës nga ky post hodhi dyshime për një ndryshim të linjës editoriale të televizionit, por ndonëse fërkimet e ‘TCH’ me kryeministrin Edi Rama nuk kanë munguar, marrëdhëniet me atë që shihet si pasuesin e tij, Erion Veliaj, po përjetojnë momentin më të mirë.  

Të fundit