Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Kërcënimi i sigurisë kombëtare; Pse Qeveria nuk i konsideron ‘akte terrori’ sulmet në aeroport?

Politiko 10 Prill 2019, 13:51
Kërcënimi i sigurisë kombëtare; Pse Qeveria nuk i konsideron

Aeroporti ndërkombëtar ‘Nënë Tereza’ është institucion dhe infrastrukturë strategjike e sigurisë kombëtare në Shqipëri. Vëmendja që institucionet e sigurisë supozohet se i kushtojnë aeroportit është maksimale. Shumë pak vende dhe institucione brenda territorit të një shteti mund të jenë më të sigurta se aeroporti.

Por në vitet e fundit është dëshmuar se aeroporti i vetëm që funksionon në Shqipëri është në fakt vendi më pak i sigurtë.

Dy grabitje me armë janë kryer brenda pistës së avionëve në aeroportin ‘Nënë Tereza’ dhe në të dyja rastet, 2016 dhe 2019, Polica e Shtetit dhe Qeveria nuk i kanë konsideruar ‘akte terrori’. Grabitja e parë nuk shërbeu që Policia, Qeveria dhe kompania përgjegjëse të merrnin masa për rritjen e sigurisë në aeroport, duke pasuar me vjedhjen e 10 milionë eurove.

Por çfarë janë konsideruar vitet e fundit ‘akte terrori’ në Shqipëri? Që prej 2014-ës, Qeveria dhe Policia kanë folur për ‘akte terrori’ sa herë është kërcënuar siguria kombëtare, kryesisht në sektorin energjitik, por edhe në sulmin me tritol ndaj farmacisë së babait të ish-ministrit të Brendshëm, Saimir Tahiri.

Rastet kur Qeveria ka folur për ‘akte terroriste’:

Ish-ministri i Brendshëm, Saimir Tahiri për tritolin në shtyllën e interkonjeksionit Tiranë-Podgoricë. 4 janar 2014: “Ajo që është konsideruar si akt terrorist nuk është përfshirë në buletin sepse daton me 31 dhjetor. Është një ngjarje goxha e rëndë sepse na kthen në memorie atë që kemi jetuar në vitet 2000-2001 ndërkohë shënon aktin e parë terrorist që mesazhet politike janë të qarta. Është një akt terrorist i mirësynuar dhe i adresuar mirë. Do ftoja të gjithë të distancohen dhe ta dënojnë. Prisja që PD të dilte sot të distancohej dhe ta dënonte. Siç do prisja këtu edhe Sali Berishën të njoftonte policinë nëse ka informacione të veçanta për autorë të mundshëm. Mund t’ju siguroj që nga Policia e Shtetit do të trajtohet si akt terrorist. Janë akte terrorriste që cënojnë sigurinë kombëtare dhe do trajtohen si të tilla.”

Kryeministri Edi Rama për tritolin në farmacinë e Bashkim Tahirit. 10 shkurt 2015: “Akti terrorist ndaj familjes së ministrit të Brendshëm, kafshim monstrash që kanë marrë, po marrin dhe do të marrin atë që meritojnë: Dorën e shtetit në fyt deri në frymën e tyre të fundit!”

Zv ministri i Energjisë, Ilir Bejtja për tritolin në linjën e interkonjeksionit Tiranë-Prizren. 18 mars 2019: “Rrëzimi i shtyllës do të kërcënonte të linte gjithë vendin pa energji elektrike, pra do të kërcënonte sigurinë energjetike të Shqipërisë dhe në të njëjtën kohë sigurinë kombëtare. Është një akt, mund të konsiderohet jo vetëm i dhunshëm por edhe terrorist.”

Pra standardi i Qeverisë për të përcaktuar një ‘akt terrori’ është i qartë, në momentin kur një sulm kërcënon sigurinë kombëtare ai konsiderohet i tillë.

Shumë ekspertë në vitin 2016-të, por edhe për sulmin e ditës së djeshme, kanë theksuar se siguria kombëtare është kërcënuar hapur në aeroportin e Rinasit. Në korrik të 2016-ës, Gjovalin Loka, drejtor i Sigurisë në Policinë e Shtetit, do të deklaronte se në grabitjen e 3 milionë eurove brenda pistës së aeroportit u kërcënua siguria kombëtare, ndaj institucionet duhet të tregojnë më shumë përgjegjësi kur firmosnin kontrata koncesionare.

Tre vitë më pas, persona të armatosur me kallash dhe granata thyen sigurinë e aeroportit dhe për disa minuta bllokuan një avion të mbushur me pasagjerë për të grabitur 10 milionë euro.

Kjo ngjarje, sipas ish-ministres së Mbrojtjes, Mimi Kodheli, është rëndë por jo kërcënim i sigurisë kombëtare. “Cënimi i sigurisë kombëtare është fjalë e madhe, por ngjarja e Rinasit është e rëndë dhe duhet parë me seriozitet”, ka deklaruar ajo.

Por sipas strategjisë së sigurisë kombëtare të miratuar në vitin 2014-të, kur Kodheli ishte ministre e Mbrojtjes, theksohej se elementë kritikë të infrastrukturës aeroportuale mbetën të cenueshme, ndaj përgatitja për mbrojtjen e insfrastrukturës së re përbën investim të domosdoshëm për sigurinë e vendit.

“Elementë kritikë të infrastrukturës, të natyrës energjetike, informatike, e telekomunikimit, rrugore apo aeroportuale mbeten të cenueshme. Mbrojtja e inventarit aktual të kësaj infrastrukture dhe përgatitja për mbrojtjen e infrastrukturës së re nga aktet e vandalizmit, sabotazhit, terrorizmit dhe të pakujdesisë njerëzore përbën investim të domosdoshëm për sigurinë e vendit”, thuhet në dokumentin e Strategjisë së Sigurisë Kombëtare që gjendet në faqen e Ministrisë së Mbrojtjes të Shqipërisë.

Qeveria ‘i ka larë duart’ për këtë ngjarje të rëndë me një reagim të vetëm ministres së Transportit, Belinda Balluku, e cila shmangu ‘kërcënimin e sigurisë kombëtare’. Ajo tha se aeroporti është i kërcënuar edhe nga akte më të rënda se grabitja, por nuk i përcaktoi këto akte me një term të saktë.

“Sistemi i sigurisë ka rënë përsëri dhe përsëri grabitësit kanë mundur të hyjnë deri në pistë, duke provuar se në këto kushte aeroporti është i kërcënuar lehtësisht, deri edhe nga akte më të rënda se kaq. Shteti do të flasë qartë dhe do të veprojë me të gjithë fuqinë e detyrimit për të garantuar sigurinë dhe funksionimin normal të aeroportit të vetëm ndërkombëtar të vendit”, u shpreh ndër të tjera Balluku, ish-drejtuese e ‘Albcontrol’.

Ngjarja në aeroportin e Rinasit, më 9 prill, mund të konsiderohet fare mirë një ‘akt terrori’ nëse i referohemi precedentëve dhe deklaratave të Qeverisë për tritolet e vendosura në shtyllat e tensionit të lartë, deklaratës së drejtorit për Sigurinë në Policinë e Shtetit dhe dokumentit të Strategjisë së Sigurisë Kombëtare. Në aeroportin ‘Nënë Tereza’ u kërcënua hapur siguria kombëtare, por Qeveria e Edi Ramës vijon të refuzojë të flasë për ‘akt terrori’.

Politiko.al

Të fundit