Pak minuta më parë, Këshilli Kombëtar i Partisë Demokratike ka vendosur në mënyrë unanime për djegien e mandateve të deputetëve. Këshilli i është përgjigjur pozitivisht vendimit të marrë në Grupin Parlamentar dhe lajmi është i bërë i ditur jashtë selisë blu nga vet kryetari Lulzim Basha, i cili theksoi se djegia e mandateve do të ketë efekt të menjëhershëm.
Duke garantuar se PD do të jetë në krah të qytetarëve, Basha tha se nuk do të lejojë që në Shqipëri të vendoset një tjetër sistem diktatorial, pas atij të shembur 28 vite më parë.
“Kam nderin t’ju bëjë të ditur vendimin unanim të Këshillit për djegien e mandateve parlamentare me efekt të menjëhershëm. Në këtë 20 shkurt të vitit 2019, 28 vite mbas rrëzimit të simbolit të diktaturës më të egër që ka përjetuar Evropa, shqipëtarët të bashkuar si asnjëherë do të kenë në krahun e tyre PD, njerëzit tanë do të jenë në krah të qytetarëve si qytetarë të thjeshtë, për të vendosur që kurrë më në Shqipëri të mos vendoset një regjim tjetër diktatorial. Kurrë më që të drejtat e njeriut të mos shkelen rëndom siç ka ndodhur në këto 5 vite, që vendit t’i rikthehen zgjedhjet e lira dhe të ndershme dhe Parlamenti të mos jetë më strofull e krimit dhe e korrupsionit”, tha Basha.
Sipas Bashës, ky hap hidhet pasi është shteruar çdo hap tjetër për t’i rikthyer legjitimitetin institucioneve të kapura. Edhe pse e pranoi që ky vendim është i vështirë dhe i paprecedentë, kryedemokrati Basha tha se nëpërmjet tij synohet që çohet deri në fund beteja për vlerat evropiane.
“Ne hedhim këtë hap pasi kemi shteruar çdo hap tjetër për t’i rikthyer legjitimitetin institucioneve të kapura. Por pas urdhrit të sovranit më 16 shkurt, ne nuk kemi asnjë rrugë tjetër dhe zgjedhim me përgjegjësi të plotë t’i bindemi urdhrit të sovranit. Përmes këtij vendimi të vështirë dhe të paprecedentë ne synojmë të çojmë deri në fund betejën tonë për vlerat evropiane. Ne do ta hapim derën që na është mbyllur prej vitesh. Ajo derë është shpëtimi ynë. Por ajo derë do të hapet vetëm kur të ketë zgjedhje të lira dhe të ndershme”, u shpreh ai.
“Beteja jonë më e rëndësishme është që rinia shqiptare të marrë sa më parë në dorë fatin e vendit”, tha Basha.
Kreu i opozitës i bëri thirrje shqiptarëve që t’i bashkohen protestës së nesërme përpara Kuvendit, në orën 10:00.
“Ndaj ju ftoj që askush të mos mungojë në protestën e nesërme në orën 10:00, para Kuvendit të Shqipërisë, i cili një orë e më parë do t’i kthehet Shqipërisë dhe shqiptarëve. Zoti e bekoftë Shqipërinë, zoti i bekoftë shqiptarët. Fitore!”,- mbylli fjalimin Basha.
Partitë opozitare kanë marrë së fundmi vendimin për djegien e mandateve dhe kërkojnë krijimin e një qeverie tranzitore, e cila detyrë kryesore do të ketë organizimin e zgjedhjeve të lira dhe të ndershme. Opozita akuzon kryeministrin Edi Rama se nuk mund të organizojë zgjedhje të lira për shkak se është i kapur nga krimi dhe oligarkët.
Mazhoranca socialiste është përpjekur të nënvlerësojë këtë akt të deputetëve opozitarë, ndërkohë që kreu i Kuvendit, Gramoz Ruçi, vendosi sot që të anulojë seancën e nesërme plenare për shkak të protestës që do të zhvillohet aty.
Discussion about this post