Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Koreja e Veriut detyron Japoninë të ndryshojë Kushtetutën, Shinzo Abe drejt shfuqizimit të Nenit 9 që iu diktua nga amerikanët në 1947

Politiko 23 Tetor 2017, 18:09

Koreja e Veriut detyron Japoninë të ndryshojë Kushtetutën,

Fitorja e ndjeshme e kryeministrit japonez, Shinzo Abe në zgjedhjet e parakohshme legjislative, të zhvilluara dje, do t’i mundësojë atij të fillojë një reformë të pashembullt të Kushtetutës pacifiste japoneze, nën sfondin e kërcënimeve në rritje nga Koreja e Veriut, por kjo procedurë është e gjatë dhe e ndërlikuar.

Përse Kushtetuta japoneze është pacifiste?

Kjo kartë themeltare është diktuar nga amerikanët pas humbjes së Japonisë në Luftën e Dytë Botërore.

Ajo u shpall nga Parlamenti japonez në vitin 1947 dhe nuk është modifikuar kurrë.

Neni 9, më i famshmi, përcakton që “Japonia heq dorë përgjithmonë nga lufta dhe përdorimi i forcës si mënyrë e rregullimit të konflikteve ndërkombëtare”.

Në kushtetutë thuhet gjithashtu se “nuk do të mbahen kurrë forca tokësore, detare dhe ajrore, apo potenciale të tjera luftarake”.

Megjithatë Japonia, që u bë një aleat besnik i SHBA-së gjatë Luftës së Ftohtë, krijoi forca ushtarake të quajtura “Forcat e vetëmbrojtjes”, që mund të ndërhyjnë vetëm nëse vendi sulmohet drejtpërdrejtë.

Përse Abe kërkon të ndryshojë Kushtetutën?

Shinzo Abe shpjegon se kërkon të modifikojë Kushtetutën për t’i dhënë një status të qartë Forcave të Vetëmbrojtjes duke ruajtur njëkohësisht parimin themeltar të pacifizmit si dhe të përcaktojë Gjendjen e Jashtëzakonshme.

Statusi i Forcave të Vetëmbrojtjes u bë edhe më shqetësues kur Abe arriti të kalojë në vitin 2015 disa ligje të kontestuara në vend, që i mundësojnë teorikisht këtyre trupave të mbështesin një aleat me operacione ushtarake jashtë vendit, ndonëse Japonia vetë nuk është sulmuar.

Në atë kohë Abe i justifikoi këto ligje me nevojën për t’u mbrojtur nga kërcënimet që vijnë nga Koreja Veriut dhe nga Kina që pretendon sovranitetin e disa ishujve dhe ujërave territoriale rreth tyre që janë aktualisht të Japonisë.

Çfarë mendojnë japonezët?

Por, opinioni publik është i ndarë mbi këtë çështje. Shumica e japonezëve vazhdojnë të ruajnë kujtimet e horrorit të bombave atomike të lëshuara nga amerikanët në Hiroshima dhe Nagasaki në gusht të vitit 1945, ushqejnë frymën e pacifizmit të Kushtetutës dhe nuk duan të prekin Nenin 9, sipas sondazheve.

Megjithatë, qarqet nacionaliste japoneze, me të cilat Shinzo Abe është shumë i afërt dhe që influenca e tyre është në rritje në vend, e shohin Nenin 9 si një relike turpëruese të humbjes së Perandorisë në vitin 1945 dhe gjykojnë se është koha për ta ndryshuar duke e përshtatur me realitetet e reja gjeopolitike.

Sipas një sondazhi të fundit nga një gazetë konservatore “Yomiuri Shimbun”, 35 për qind e personave të pyetur ishin pro modifikimit të Nenit 9, por 42 për qind ishin kundër.

Nëse sjellja që duhet të ketë Japonia përballë Koresë së Veriut ishte një nga temat kryesore të fushatës në legjislativet e fundit, shumica e votuesve nuk e shohin reformimin e Kushtetutës si një prioritet.

Si të ndryshohet Kushtetuta?

Një projekt amendamenti kushtetues duhet të arrijë një maxhorancë prej dy të tretave në të dyja dhomat e Parlamentit, që koalicioni në pushtet i Abesë e ka.

Por kjo nuk mjafton. Që të miratohet përfundimisht, një ndryshim kushtetues duhet të votohet nga një referendum, që e bën këtë reformim më të vështirë.

Nga ana tjetër, vetë përkrahësit e rishikimit kushtetues janë të ndarë mbi ndryshimet që duhet të sillen.

I ndërgjegjshëm për këto vështirësi Abe nuk u tregua i nxituar dje në mbrëmje për të punuar mbi këtë dosie shumë delikate, megjithatë shprehu dëshirën për të arritur një konsensus sa më të gjerë të jetë e mundur, që e kalon koalicionin qeveritar.