Flash News

Kërcet arma në Durrës, plagoset një 30-vjeçar

Aksident në Rrugën e Arbrit, makina del nga rruga, dy të plagosur

Arrestimet te “Bankers Petrolium”, Prokuroria jep detaje: Deklaroi 11.7 mld lekë humbje, shteti nuk përfitoi asnjë të ardhur për 20 vite

Vdesin tragjikisht në aksident ylli i Liverpool, Diogo Jota dhe vëllai i tij

Posta e mëngjesit/ Me 2 rreshta: Çfarë pati rëndësi dje në Shqipëri

Kosova

Dialogu Kosovë-Serbi/ Ish-këshilltari i Trump: Me Trump mund të ketë njohje, korrigjimi i kufijve i mundur

Politiko 22 Janar 2025, 22:33

Dialogu Kosovë-Serbi/ Ish-këshilltari i Trump: Me Trump mund të

Ish-këshilltari i Trump për sigurinë në mandatin e parë, John Bolton, ka paralajmëruar se administrata Trump mund ta rikthejë në tryezë përparimin e dialogut Kosovë-Serbi.

Në një intervistë në A2 CNN, ai tha se gjatë mandatit të parë Trump kishte një interes të veçantë për të zgjidhur mosmarrëveshjet në Ballkan.

Ai nënvizoi rëndësinë e paqes dhe stabilitetit në Evropë, duke theksuar se konflikti në Ukrainë e bën këtë çështje edhe më të rëndësishme.

Ai tha se çdo zgjidhje duhet të jetë rezultat i marrëveshjes reciproke mes palëve.

"Mendoj se kjo është e mundur. Nëse ai do ta shihte këtë si diçka nga e cila mund të marrë merita, mendoj se do t’i kushtonte vëmendje menjëherë. Ky është një problem shumë kompleks, dhe kjo zakonisht nuk e tërheq atë, por mendoj se do të tërhiqet nga çështjet e sigurisë në Evropën Lindore në përgjithësi për shkak të luftës në Ukrainë. Gjatë fushatës, ai ka thënë se do t’i fuste Zelenskyn dhe Putinin në një dhomë dhe do ta zgjidhte brenda 24 orësh. Sigurisht, ai e kupton sot që kjo është e pamundur. Tani ka deklaruar se shpreson ta përfundojë brenda 6 muajsh. Por duke marrë parasysh një sërë faktorësh destabiliteti, përfshirë Moldavinë me Transnistrian, mosmarrëveshjet për tubacionet që vijnë nga Rusia dhe gazin natyror drejt disa vendeve të Evropës Qendrore dhe Lindore, mendoj se do të ketë përqendrim në rajonin si tërësi. Kjo më sugjeron se ky është një moment i mirë për të zgjidhur sa më shumë mosmarrëveshje të vjetra. Prandaj, një interes nga ana e Trump nuk është i pamundur, ndoshta që në fillim të administratës së tij", tha ai.

Bolton komentoi mbi idenë e dikurshme të shkëmbimit të territoreve midis Kosovës dhe Serbisë, duke e quajtur atë një opsion që mund të funksionojë vetëm me pëlqimin e të dyja palëve.

Ai sugjeroi se Trump mund ta rikthejë këtë propozim në tryezë, duke qenë se çështja është ende e pazgjidhur dhe mund të shihet si një mundësi për të fituar merita ndërkombëtare.

" Shikoni, ish-shefi im, James Baker, që ishte sekretar i shtetit gjatë administratës së George H. W. Bush, thoshte shpesh për Lindjen e Mesme se Shtetet e Bashkuara nuk mund të duan paqe më shumë sesa vetë palët. Natyrisht, çdo rregullim territorial duhet të ketë pëlqimin e plotë të të dyja palëve, Serbisë dhe Kosovës. Nëse njëra palë pranon dhe tjetra jo, atëherë nuk keni marrëveshje. Kjo është e vështirë. Kërkon vendosmëri politike nga të dyja palët dhe ka shkaktuar shqetësim në pjesë të tjera të Ballkanit. Disa thonë se nëse ka një rregullim territorial midis Serbisë dhe Kosovës, mund të ketë edhe në zona të tjera. Unë nuk mendoj se ky është një shqetësim legjitim. Siç thashë, çdo palë duhet të bjerë dakord përpara se të ndodhin rregullime territoriale. Dhe vetëm sepse ndodh midis Serbisë dhe Kosovës nuk do të thotë që duhet të ndodhë edhe diku tjetër. Kështu që mendoj se është mjaft e vështirë të arrihet një marrëveshje vetëm midis Serbisë dhe Kosovës, pa përfshirë gjithë Ballkanin dhe bërë gjërat më të komplikuara:, tha Bolton.