Dikur këngëtar i "Ritmit të Rrugës", Memli Krasniqi zgjidhet kryetar i ri i PDK-së

Memli Krasniqi është zgjedhur kryetar i Partisë Demokratike të Kosovës. Ai ishte i vetmi te kjo forcë politike, i cili kishte shpallur kandidaturën për të marrë drejtimin e partisë, në Konventën e jashtëzakonshme zgjedhore të PDK-së të zhvilluar këtë të shtunë.

Krasniqi do të udhëheqë partinë për dy vjet, pasi dy vitet e para të mandatit të kryetarit i ka kryer Kadri Veseli, i cili dha dorëheqjen pas fletë-arrestit nga Gjykata e Hagës.

Pjesëmarrës në procesin e votimit kanë qenë 476 delegatë. Nga ta 7 ishin kundër e një votë ishte abstenim.

Pas zgjedhjes si kryetar, Krasniqi ka thënë se “do t’ua shpërblejë besimin delegatëve me punë e përkushtim”.

“Ju sot sapo më m’veshët me besimin që ua kërkova për të vazhduar rrugëtimin e përbashkët e për të çuar tutje rrugën në hapat e dy liderëve tonë Hashim Thaçit dhe Kadri Veselit, por edhe të Enver Hoxhaj... Përtej vetëm një mandati kërkova besimin tuaj dhe do t’ua shpërblejë me punë e përkushtim të pandalshëm, me bashkëpunim me secilin anëtar të PDK-së, pro edhe me gjithë ata qytetarë të vendit tonë që duan t’i bashkohen PDK-së për një të ardhme më të mirë por edhe për shtetin tonë”, ka deklaruar Krasniqi.

Kujtojmë se Memli Krasniqi ka qenë më herët këngëtar, ndërsa një nga këngët më të njohura të tij është "Ushtari i rrugës", ku ka qenë pjesë e grupit “Ritmi i rrugës".

Biografia e Memli Krasniqit:

Memli Krasniqi u lind në Mitrovicë më 25 janar 1980. Ai ka përfunduar studimet për Shkenca Politike dhe Administratë Publike në Fakultetin Filozofik të Universitetit të Prishtinës, ndërsa ka mbaruar magjistraturën në Marrëdhënie Ndërkombëtare në Shkollën Londineze për Ekonomi dhe Shkenca Politike (LSE).

Në vitet 1999 – 2000 ka punuar si gazetar për agjencinë amerikane të lajmeve Associated Press, ndërsa në vitin 2002 ka qenë Drejtor për Marrëdhënie me Publikun në Qendrën e Telemjekësisë së Kosovës.

Për shumë vite është marrë me muzikë dhe ka punuar në projekte të ndryshme muzikore, kryesisht si tekst-shkrues dhe si anëtar i grupit “Ritmi i Rrugës”.

Nga viti 2004 është angazhuar aktivisht në Partinë Demokratike të Kosovës (PDK), fillimisht duke drejtuar Qendrën për Studime Politike që ka funksionuar në kuadër të kabinetit të kryetarit të partisë, Hashim Thaçi.

Me krijimin e Kabinetit për Qeverisje të Mirë të PDK-së, Krasniqi është emëruar udhëheqës i Departamentit të Rinisë, ndërsa në tetor të vitit 2006 është zgjedhur Kryetar i Rinisë Demokratike të Kosovës – subjektit rinor të PDK-së që përfaqëson anëtarët e saj ndërmjet moshave 16 – 30 vjeç. Nga ky pozicion, ai ka qenë edhe anëtar i Kryesisë së PDK-së. Në shkurt të vitit 2013, Krasniqi është zgjedhur Nënkryetar i PDK-së për Çështje Organizative dhe të Rinisë.

Në zgjedhjet parlamentare të vitit 2007, Memli Krasniqi është zgjedhur deputet i Kuvendit të Kosovës dhe ka qenë anëtar i Komisionit Parlamentar për Arsim, Shkencë, Kulturë, Rini dhe Sport. Në tetor të vitit 2008 është emëruar Këshilltar Politik i Kryeministrit dhe Zëdhënës i Qeverisë.

Krasniqi është rizgjedhur deputet i Kuvendit të Kosovës në zgjedhjet parlamentare të vitit 2010, ndërsa është emëruar Ministër në Ministrinë për Kulturë, Rini dhe Sport në shkurt të vitit 2011.

Memli Krasniqi jeton në Prishtinë, me bashkëshorten Melizën dhe fëmijët Borën, Malin dhe Verën.