Hoti: Nuk jap dorëheqjen, zgjedhim presidentin ose shkojmë në zgjedhje

Kryeministri i Kosovës, Avdullah Hoti, ka reaguar pas aludimeve për dorëheqjen e tij, duke thënë se këto informacione nuk janë të vërteta.

Përmes një postimi në Facebook, Hoti shkruan se me veprimet e tij ka dëshmuar gatishmëri për të ofruar zgjidhje për çështjet e ngritura, duke zhbllokuar madje edhe proceset komplekse nëpër të cilat ka kaluar Kosova, siç ishte arritja e marrëveshjes së 4 shtatorit në Uashington, menaxhimi i pandemisë si dhe hartimi i paketës emergjente për rimëkëmbje ekonomike.

Ndër të tjera, ai thotë se në Kosovë janë dy opsione, të dakordohen për presidentin ose të shkohet në zgjedhje të reja.

Shkrimi i plotë:

Informacionet të cilat po qarkullojnë nëpër media për dorëheqjen time janë të pa vërteta.

Me veprimet e mia kam dëshmuar gatishmëri e përkushtim për të ofruar zgjidhje për të gjitha çështjet e ngritura, duke zhbllokuar madje edhe proceset komplekse nëpër të cilat ka kaluar vendi siç ishte vendimi për vazhdimin e dialogut me parime dhe arritja e marrëveshje së 4 shtatorit në Uashington, hartimi i pakos emergjente dhe asaj për rimëkëmbje ekonomike dhe masat konkrete në menaxhimin e pandemisë Covid -19.

Sa i përket zhvillimeve të fundit pas veprimeve të Dhomave të Specializuara dhe dorëheqjes së ish Presidentit Thaçi, e kam bërë të qartë se partitë parlamentare i kanë dy opsione, të gjejnë zgjidhje për çështjen e Presidentit ose të dakordohen për datën e zgjedhjeve. Por, asnjëherë në asnjë kontekst nuk e kam përmendur dorëheqjen si opsion.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm