Kosova dhe BE-ja nënshkruajnë një marrëveshje me vlerë mbi 62 milionë euro

Kosova edhe Bashkimi Europian kanë nënshkruar një marrëveshje më vlerë mbi 62 milionë euro. Kjo marrëveshje është pjesë e programit IPA 2022, që parasheh financimin e disa projekteve në fusha të ndryshme.

Zëvendëskryeministri i Kosovës, Besnik Bislimi dhe shefi i Zyrës së Bashkimit Evropian (BE) në Kosovë, Tomas Szunyog, kanë nënshkruar marrëveshjen financiare ndërmjet Kosovës dhe BE-së, për Programin vjetor IPA 2022.

Bazuar në këtë marrëveshje Kosova përfiton 62.25 milionë euro për projekte në fusha të ndryshme.

Në ceremoninë e nënshkrimit që është zhvilluar të premten në ndërtesën e Qeverisë së Kosovës në Prishtinë, Bislimi ka folur për fushat në të cilat do të përdoren këto mjete.

“Me nënshkrimin dhe hyrjen në fuqi të IPA 2022 Kosova po përfiton edhe 62.25 milionë euro nga Bashkimi Europian, të cilat do të zbatojnë një sërë projektesh, sikurse përkrahja për profesionet e lira në Kosovë, Instrumenti për përafrimin me standardet e Bashkimit Europian, përkrahje për mjedisin dhe energjinë e gjelbër, eficienca e energjisë, ekonomia qarkore dhe e mbeturinave, ujërat e zeza, zhvillimi i përgjithshëm socio-ekonomik, si dhe përkrahja për kthimin dhe integrimin e komuniteteve”.

Ai ka deklaruar se projektet do të bashkëfinancohen edhe nga buxheti i Kosovës në vlerë prej 4.7 milionë eurove dhe se marrëveshja do të sjellë edhe financime nga partnerë të tjerë bilateralë në vlerë prej 24.88 milionë eurove.

Gjithsej sipas tij kjo marrëveshje mundëson zbatim të fondeve në vlerë prej 91.83 milionë eurove.

Ai ka thënë se kjo është marrëveshja e tretë që Kosova po nënshkruan në kuadër të programeve IPA 3, brenda një periudhe të shkurtër.

“Deri më tani kanë hyrë në fuqi dy marrëveshje për IPA-3, marrëveshja , njëra për programin IPA 2021 dhe tjera për Programin IPA 2023, kjo e fundit e orientuar në mbështetje të sektorit të energjisë. Javën e kaluar në pranuam pagesën e parë nga Bashkimi Evropian në buxhetin tonë për IPA 2023 në vlerë 67.5 milionë euro, që përbën 90 për qind të shumës totale prej 75 milionë eurosh, po ashtu projektet për IPA 2021 tani janë në fazën kontraktuale nga Zyra e BE-së dhe partnerët zbatues për ato”.

Ndërkaq, shefi i Zyrës së Bashkimit Evropian (BE) në Kosovë, Tomas Szunyog, ka thënë se ka 15 vite që shohin se si në baza ditore, fondet që jepen nga BE-ja në kuadër të programit të paraanëtarësimit, ndikojnë në zhvillimin e Kosovës.

“Më këtë mbështetje që ka vlerën prej 62.25 milionë eurove, BE-ja jo vetëm që mbetet ofruesi më i madh i mbështetjes financiare, por më e rëndësishmja është se dëshmon që BE-ja është partnere strategjike dhe mike e Kosovës. Kjo asistencë dhe angazhimi ynë në Kosovës është për të mbështetur zhvillimin të të gjithëve në Kosovë”.

Ai ka thënë se këto fonde do të përdoren për prioritete të caktuara.

Ka përmendur në këtë rast kontributin për një shoqëri multietnike stabile e me një sistem të drejtësisë llogaridhënës, adresimin e nevojave urgjente të Kosovës, mbështetjen e projekteve për dekarbonizim dhe mbledhje të mbeturinave si dhe mbështetjen për projekte në fushën e arsimit.

BE-ja ka filluar ofrimin e financimit IPA për Kosovën që në vitin 2007. Programet IPA I dhe IPA II kanë mbuluar periudhën 2007-2020, duke përfshirë 14 Marrëveshje vjetore të Financimit me vlerë prej 1.2 miliardë euro.

Financimi IPA III që mbulon periudhën 2021- 2027 dhe Marrëveshjet vjetore të Financimit kanë filluar të zbatohen vitin e kaluar, me Marrëveshjen për vitin 2021 me vlerë 64 milionë euro dhe atë për vitin 2022, të dorëzuar sot, me vlerë 62 milionë euro./MONITOR