"Kosova s'mund ta shpërblejë Serbinë me territorin e saj", Vjosa Osmani thirrje deputetëve shqiptar: Votoni Rezolutën që dënon gjenocidin në Kosovë

Presidentja në detyrë e Kosovës, Vjosa Osmani në ditën e dytë të vizitës së saj në Shqipëri ka mbajtur fjalën në Kuvendin e Shqipërisë, gjatë së cilës u ndal në bashkëpunimin mes vendeve dhe gjenocidin serb në Kosovë.

Osmani foli për sfidat historike që kanë kaluar të dy shtetet, si dhe falenderoi popullin shqiptar për ndihmën dhënë shtetasve kosovarë gjatë luftës në Kosovë, duke rikujtuar humbjet e mëdha në njerëz.

 “Sot kur unë jam para jush duhet ta kujtojmë historinë tonë të kaluar. Këtu na solli sakrifica e një populli të tërë, përkushtimi për lirinë, gjaku i derdhur i 13 mijë civilëve të vrarë, shumica prej tyre gra, pleq e fëmijë, nga të cilët 1600 janë ende të pagjetur”, ka deklaruar Osmani.

Po ashtu, Osmani iu kërkoi deputetëve të parlamentit shqiptarë të votojnë projekt-rezolutën që dënon gjenocidin serb, duke shtuar se vetëm atëherë këto dhimbje dhe humbje jete do të dëgjohen edhe përtej Shqipërisë dhe Kosovës. 

Ndërkaq, referuar procesit të dialogut në mes të Kosovës dhe Serbisë, Osmani insistoi në njohjen e përbashëkt, duke shtuar se Kosova nuk mund ta dëmshperblejë Serbinë me territore, por që është kjo e fundit që duhet të kerkojë falje për krimet e luftës dhe politikën gjenocidale.

“Sot dialogu në mes të Kosovës dhe Serbisë është ende i pa mbyllur e ne jemi të vendosur që të dialogojmë vetëm për njohjen e ndërsjellë, duke respektuar integritetin territorial dhe sovranitetin e shtetit,  duke njohur dhe pranuar paprekshmërinë e territorit tonë, rregullimin kushtetues. Kosova nuk mund që ta shpërblejë më Serbinë me territorin e saj e as të bëj  koncesione të tjera, për politikën gjenocidale që Serbia kishte ndaj nesh. Serbia duhet të pendohet, të kërkojë falje, e të dënohet e jo më të shpërblehet”, tha Osmani

Pjesë nga fjala e Presidentes në detyrë e Kosovës, Vjosa Osmani, në Kuvendin e Shqipërisë:

“Faleminderit!

Jam shumë e lumtur që sot më është dhënë mundësia që nga Kuvendi i Shqipërisë tu drejtohem të zgjedhurve të popullit dhe bashkëkombësve të mia anë e mban botës. Është kënaqësi e veçantë që si përfaqësuese e Kosovës të mund të bëj këtë në shtetin e shqiptarëve, këtij kombi të lashtë i cili ka dhënë aq shumë për kulturën dhe qytetërimin perëndimor.

Është nder i madh që të ju drejtohem dhe të ju flas sikur njeriu familjes së vet me të cilën kanë ndarë aq shumë histori, këmbëngulje, dhimbje e mall të pasosur, por së cilës i ka dhuruar dhe ka marr po aq shumë dashuri.

Shqipëria është jo vetëm atdheu i bashkëvëllerve dhe bashkëmotrave tona, është ëndrra jonë e përbashkët, vatra që ëndërronim të jetonim dhe të cilën fatkeqësisht shumë prej nesh e takuan në acarin e luftës së ftohtë. E megjithatë, ajo u bë vatra jonë, shtëpia e shqiptarëve zemërbujarë që na mbajti gjallë ne, por edhe shpresën e përbashkët për liri. Ne ju jemi mirënjohës përjetë.

Sot kur unë gjendem para jush lidhjet shpirtërore po thellohen. Shqipëria dhe Kosova po ecin krah njëra-tjetrës. Sot duhet të kujtojmë të kaluarën e përbashkët, se këtu na solli sakrifica e një populli të tërë. Sot, do të flas me këtë gjë dhe do të kërkoj që historia e Kosovës të mbahet mend dhe të rikujtohet që t’ja njohim vlerën.

Pavarësia e Kosovës ka vulosur fatin tonë dhe të popujve në të gjithë Ballkanin. Historinë ne e kemi në krah. Këtë rrugëtim ne e bëmë me miqtë tanë. Qëndruan krah nesh që nga dita e parë e çlirimit. Si e para grua në detyrë, dua të thërras gratë që t’i ndjekin synimet e tyre e se ëndrrat mund të njehsohen. Një ditë të gjitha ato do të jenë aty ku duhet dhe ku e meritojnë.

Sikurse çdo shtet tjetër dhe Kosova dhe Shqipëri do të jenë aty ku e meritojnë kur 50 % të jetë aty ku duhet. Vullneti i Shqiptarëve të realizohet. Të kujtojmë 13 mijë të rënët për liri.

Dialogu i Serbisë është ende i pambyllur. Do dialogojmë vetëm për njehsimin. Kosova nuk mund ta shpërblejë Serbinë me territorin e saj. Serbia duhet të pendohet të kërkojë falje dhe të dënohet dhe jo të shpërblehet. Kjo duhet thënë me zë të lartë.

Thirrje Kuvendit që t’i bashkohet Kuvendit të Kosovës. Ne duhet t’i bashkojmë përpjekjet tona për viktimat që i shkaktoi Serbia. Drejtësi për fëmijët e vrarë, për motrat e nënat e dhunuara, Drejtësi! Kosovës nuk mund t’i kërkojë që të japë më shumë. Kosova ka dhënë më shumë se askush, ka dhënë mbi 1 mijë fëmijë.

Kemi detyrë kombëtare, por mbi të gjitha detyrë morale, që meqë punojmë për një hapje të kapitullit të ri, ta lexojmë dhe ta mësojmë kapitullin që qëndron para nesh, që t’i qëndrojmë pranë njëra-tjetrës, si dy motra. Ky kapitull na mësoi se Serbia nuk ka ndryshuar dhe duhet të jemi bashkë për të ndalur frymën e urrejtjes.”, tha Osmani.