Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OPINEWS

3 Fasadat e Ramës

Politiko 28 Maj 2024, 11:36

3 Fasadat e Ramës

Nga Lisander Hoxha

A ju kujtohet Edi Rama si Kryebashkiak i Tiranës, kur lyente fasadën e palleteve me bojë dhe thoshte se po e transformon Tiranën?
Sigurisht që nga pas pallatet ishin të rrënuara, me lagjet e pashtruara me asfalt dhe të zhveshura nga çdo grimcë estetike.
Por, nga përpara ama ishin të lyera ngjyra-ngjyra.
Kështu ua merrte mendjen njerëzisë, me bojra, xixa, propagandë, çorape me ngjyra dhe nje snobizëm i tepruar nga një fizik atipik për llojin dhe stilin që kishte zgjedhur.
Një tip me kostume jakë prifti që shiste teori inovatore përmes kontrastit të ngjyrave dhe figurave gjemometrike pa sens në fasadat e pallateve.
Ky tip kontravers nuk preokupohej se e shanin, tallnin apo nënvleresonin.
Ai e kishte të qartë në kokën e tij se çfarë kërkonte.
Sapo u be Kryebashkiak filloi të bënte jetë të dyfishtë.
Në publik bënte modernin, snobin, me një kulturë super telë kultivuar dhe pasditeve rrinte me grupin e horrave nën shijen e verës dhe pluhurit të bardhë, siç e përshkruante i ndieri Dritan Prifti.
Aty, pasditeve thurte edhe planin e tij për të realizuar pasionin e tij kryesor që ishte ndërtimi.
Me një skuadër hajdutësh prej urbanistësh dhe arkitektësh, i vuri syrin të gjitha pronave publike të Tiranës.
Nga Kinostudio, Profarma, Kinema 17 Nëntori, Parku i Liqenit Artificial, Garda e Republikës, Teatri Kombëtar, ish PD, etj.
Një pjesë arriti t'i nxirrte nga kurthi ligjor, duke i futur si zona ndërtimi të gjitha pronat që askush nuk i mendonte se mund të ndërtohej mbi to.
Herë pas here, me grupin mafioz të studios së tij të ndërtimit, shfaqte një plan francez, i cili, çuditërisht, ndryshonte të dhënat çdo 6 muaj.
Kështu filloi edhe mafia e ndërtimit në Tiranë.
Pas 2013, kur Rama ishte tashmë Kryeministër, doli me një teori të ngjashme me atë të Kryebashkiakut.
Rilindja Urbane ishte tashmë kryefjala e Ramës në mandatin e parë.
U shtruan pllaka në çdo rrethinë e provincë të vendit dhe u lyen me bojë të gjitha fasadat.
Tek e fundit, një popull që gënjehet një herë nga ngjyrat dhe xixat, e ha edhe dy herë të njëjtën fabul.
Tashmë, oreksi dhe pasioni i tij kryesor, ndërtimi, nuk mund të kishte vetëm përmasa lokale, por kombëtare.
Keshtu, Rama i vuri syrin për hotele dhe resorte vendeve më të paimagjinueshme të vendit tonë.
Madje, edhe zonat e mbrojtura me ligj për 30 vite, nuk përjashtoheshin nga oreksi i tij për të gllabëruar çdo gjë unike.
Kështu, Shqipëria u kthye në kantierin e epsheve të Ramës, duke grabitur me ligj çdo pronë publike apo private në emër të ndërtimit.
Sot, një qytetar që ka fatin e keq të ketë një pronë në një vend interesant, ose e dorëzon pronën, ose i merret me ligjin e shokëve strategjik.
Qytetari shpronësohet me çmim qesharak, ndërsa shoku strategji e merr pa para dhe pa taksa pronën gati për ndërtim.
Së dyti, nëse kërkon dikush të ndertojë mbi parqet natyrore apo historike, që as nuk imagjinohej ndërtimi për 30 vite, e bën lirisht me ligj këtë gjë.
Kjo tabu konceptuale dhe antikushtetuese u rrëzua në Parlament nga oreksi i Edi Betonit.
Çdo mik strategjik i Ramës mund të ndertojë resortin e tij mes parqeve natyrore, zonave të mbrojtura, etj.
Kështu, ai plotëson egon e tij për të qenë pronari më i madh i ndërtimit në Shqipëri.
Nëse ju kujtohet, Rama merrte 20% për çdo leje ndërtimi që jepte.
Ai përfitonte 15% dhe 5% studio e mikut të tij të ngushtë, që e ka shoqëruar kudo në qeverisje sa si deputet, zëvendësministër, etj.
Edi Rama nuk ndryshon në stil dhe as në performancë.
Jepi dy gisht letër dhe një vulë dhe do të shkelë çdo normë e ligj vetem për të realizuar pasionin e tij për betonin.
Ai, edhe sikur administrator pallati po të zgjidhej, do të bënte një godinë në sheshin e pallatit, aty ku luajnë femijët, sapo t'i lyente me bojë shkallët dhe fasadën.
Kaq i parashikueshëm është, saqë të gjithë miqtë e tij të vjetër e përshkruajnë me vetëm pak fjalë....
Gjithësesi, rrugës ai edhe ka gabuar, ndaj duke qenë një njeri praktik është kacavjerrë pas ndonjë mundësie, që i është dhënë, duke përdorur korrupsionin dhe shpesh herë servilizmin për të shpëtuar.
Tipar kryesor i Ramës është këmbëngulja ekstreme për të realizuar qëllimet.
Siç priste në shi Fatos Nanon para Piazza, në Tiranë, për orë të tëra për t'i marrë vetëm një "po", ashtu ai me durim ndërton një strategji me ata qe u serviloset pa u merzitur, duke u dhënë edhe gjëra që ata nuk i kërkojnë vetëm për një aprovim publik.
Është aq i lexueshëm Edi Betoni, sa që nuk ia vlen të analizosh në thellësi.
Nisma e fundit antikorrupsion e Ramës është makiazhi i fundit që ai bën.
Njësoj me fasadën e pallateve dhe rilindjen urbane, i duhen disa ngjyra dhe xixa për të përhumbur vëmendjen e njerëzve nga bëmat e tij.
Frika e tij më e madhe është se një ditë mund t'i humbasë të gjitha dhe kjo frike e ka shoqëruar që prej ditës së parë në politikë.
Prej kësaj frike ai është detyruar të kapë çdo pushtet dhe sot është aq i fryrë saqë ngado që leviz, i pëllcet diçka nga mbipesha e skandaleve dhe mbipushteti.
Kështu i duhen disa rezoluta me xixa dhe ngjyra sa t'i japë goditjen përfundimtare drejtësisë.
Kështu mendon ai se do të mbretërojë i qetë mbi betonin e tij si pronari më i madh i ndërtimeve në Europë.
Atij tashme nuk i duhen as bashkëpunëtorët dhe as kundërshtarët.
Atij i duhet vetëm betoni, ndaj është gati të sakrifikojë shumë në emër të pasionit të tij.
Miq, kolegë socialist, biznesmenë, do i shohim të bëhen kurban në emër të fasadës së re "Antikorrupsion" të Edi Ramës.
Pas kësaj nisme fshihet edhe çibanja pa leje në oborrin e drejtesisë së re me njerëz të vjetër.
Kështu imagjinon Rama se do i mashtrojë shqiptarët tre herë me të njëjtën fabul.
Ajo që nuk llogarit dot ai është ajo që do i bëjë gropën politike.
Ndaj, më mirë le të flejë mbi dafinat e tij deri sa ëndrra t'i kthehet në mankth.
Xixat, ngjyrat dhe makiazhin fasadave do e ketë pasion për burgun e sigurisë së lartë, diku larg, por shumë larg prej këtu.