Sulmohet brenda një lokali gazetari i njohur shqiptar, tre të arrestuar

Gazetari kosovar Valon Syla është sulmuar ditën e djeshme nga tre persona teksa ndodhej brenda një lokali në zonën e “Bregut të Diellit” në Prishtinë.

Në një video të publikuar nga “Express”, shihen disa persona teksa dalin jashtë, dhe po ashtu Valon Syla, teksa futet i gjakosur brenda restorantit.

 “Unë kam qenë me Ilirin. E shihte në pasqyrë që dikush nga afër po mundohej të afrohej. Menduam se ishte Leo. Kur u afrova tek shkallët mu afrua një person, që mund ta identifikoj tani, por nuk e njoh. Ilir ishte duke parkuar kerrin. Aty brenda kanë qenë edhe disa gazetarë tjerë”, tregon ai.

“Ishte një djalë i ri rreth të 30-ave. Më tha ‘a po vjen dej qetu’. Si ja pashë mjekrën e dita që është fetar. Kishte mjekër dhe trenerka kështu dukej si shoumen. Edhe i dhunshëm. U mundova të vrapoj që të hapi derën dhe pastaj ata do largoheshin pari që mund të shihnin njerëz brenda dhe do frikësoheshin. Nuk u hap dera menjëherë. Pastaj më grushtuan. Edhe me pjesë metalike të orës. U mundova ta ruaj fytyrën. Ilir Mirena u ngut dhe largoi njërin, pastaj edhe tjerët dolën nga brenda. Ata ikën. Por mjaftoi që të më shkaktonin lëndime”, shtoi Syla.

Ndërkohë, ministri i brendshëm i Kosovës, Xhelal Sveçla ka bërë të ditur se tre të dyshuarit për sulmin fizik ndaj gazetarit dhe analistit Valon Syla, janë arrestuar sot.

Edhe Prokuroria Speciale me Policinë e Kosovës dje dolën me komunikatë të përbashkët lidhur me rastin e sulmit ndaj gazetarit.

Aty thuhet se ndaj tri personave që janë të dyshuar për sulmin, rëndon akuza për “nxitje të përçarjes dhe mosdurimit” si dhe nënvizohet fakti se rasti po hetohet nga Drejtoria Kundër Terrorizmit.

Të dyshuarit e identifikuar si K. Hasani dhe O. Hasani janë vëllezër, ndërsa i dyshuari i tretë L. Dervishi mësohet se jeton në Prishtinë.

NJOFTIMI I POLICISË SË KOSOVËS

Arrestohen tre persona të dyshuar për sulm fizik ndaj gazetarit Valon Syla

Prishtinë, 12 prill 2023 – Me urdhër të Prokurorisë Speciale të Republikës së Kosovës (PSRK), Policia e Kosovës, ka arrestuar tre persona të cilët kanë sulmuar gazetarin, Valon Syla.

Prokuroria Speciale njofton se pas një angazhimi intensiv të hetuesve të Policisë së Kosovës, përkatësisht Drejtorisë Kundër Terrorizmit, është arritur që të identifikohen tre (3) të dyshuarit, për rastin e sulmit fizik të datës 11.04.2023, ndaj gazetarit Valon Syla, arrestimi i të cilëve është realizuar sot me datë 12.04.2023.

Të arrestuarit janë personat e dyshuar me inicialet L.D, K.H dhe O.H. si dhe të njëjtit dyshohen se kanë kryer veprën penale ‘’Nxitje e përçarjes dhe mos durimit’’.

Tre të arrestuarit me urdhër të Prokurorit të Shtetit, do të dërgohen në mbajtje, si dhe brenda afateve ligjore do të kërkohet caktimi i masës së paraburgimit.