U largua me mister nga qeveria 'Rama', Besa Shahini në garë për kryetare të Prishtinës

Ish-ministrja e Arsimit në Shqipëri, Besa Shahini, ka shpallur kandidaturën për kryetare të Prishtinës. 

Lajmin e ka bërë të ditur përmes një video në Facebook, ku thotë se Prishtinës i duhet një ndryshim ‘‘radikal në kahjen e zhvillimit’’, prandaj do të garojë në zgjedhjet lokale që mbahen këtë vit.

‘‘Para 4 viteve jam kthyer të jetoj në Prishtinë nga Tirana, në një qytet që e dua fortë, që e ka një potencial të jashtëzakonshëm i cili ka marr një kahje të gabuar në zhvillimin e vet. Prishtinës i duhet një ndryshim radikal në kahjen e zhvillimit. Unë dua të jem pjesë e këtij ndryshimi, ndaj në vjeshtë do të garoj për kryetare të Komunës në zgjedhjet lokale 2025. Ju ftoj të më bashkangjiteni të gjithë ju që i ndani shqetësimet e mia për qytetin dhje që keni sado pak energji që të përfshiheni në përpjekjen tonë të përbashkët për ndryshim’’, shprehet Shahini. 

Por, pse mbahet mend Besa Shahini në qeverinë Rama?

Shahini u emërua si ministre e Arsimit dhe Sportit në Shqipëri në fund të Dhjetorit 2018, kur Edi Rama u detyrua të shkarkonte nga ai post Lindita Nikollën pas protestave të studentëve.

Ashtu siç erdhi në krye të Ministrisë, ashtu edhe u largua në Shtator të vitit 2020 në mënyrë krejt misterioze.

Pak kohë më vonë, në një emision televiziv ajo e justifikoi largimin e saj nga ky post për arsye familjare.

Asokohe analizat politike theksuan motive e largimit të saj papritur nuk kanë lidhje me versionin zyrtar se ajo po largohet për motive martesore.

"Burime nga Partia Socialiste bëjnë me dije se ajo mbeti një mish i huaj në këtë parti: “Ajo po del në të njëjtën mënyrë sikurse u katapultua”, tha njëri prej tyre për Lapsi.al. Ajo nuk dëgjonte kërkënd për emërime në strukturat e arsimit në zonat e nxehta elektorale, ajo mbeti si një UFO mes rilindasve, ajo nuk i përgjigjej nevojave që partia kishte për arsimin, janë vërejtejet më të shumta kundër saj në selinë rozë.
“Ne nuk mund të mbajmë në mesin tonë një ministre që nuk ka të ruajtur në celularin e saj numrat e telefonit të Gramoz Ruçit dhe Taulant Ballës” tha një burim nga PS për Lapsi.al.
Edhe në selinë e kryeministrit zërat e pakënaqësisë janë të forta, sidomos pas refuzimit të Shahinit për të zbatuar orientimet e të gjithëpushtetshmit Engjëll Agaçi.
Por, mësohet se pika që e derdhi gotën ka qenë një replikë me Ramën në mbledhjen e qeverisë. Ndërkohë që me stilin e tij të bërë bajat, kryeministri e kishte qesëndisur me ironi Besën, kjo e fundit ia ka kthyer: “Zoti Kryeministër, ju nuk jeni këtu për të na stigmatizuar, nëse keni ndonjë vizion për problemin që po diskutojmë mund të na e thoni”, thuhet në një shkrim të Lapsi.al pak pas largimit të Shahinit. 

Besa ka spikatur në mosrealizimin e plotë të kërkesave të studentëve, protesta e të cilëve u shua brutalisht, nëpërmjet mekanizmave korruptues, përçarës, shantazhues e kërcënues të pushtetit. Jo vetëm kaq, por ajo ka ndihmuar në përkeqësimin e përfaqësueshmërisë së studentëve në zgjedhje, që ishte edhe një nga kërkesat kryesore të tyre.  

Por Besa ka shkëlqyer gjithashtu edhe me akte të tilla të paprecedenta si ai i vendimit për shkarkimin e ish-rektorit të Tiranës. Vendimi nuk u zbatua dot, por gjithsesi guximi i saj për të shkarkuar drejtuesin e një institucioni të pavarur, i cili, për më tepër, zgjidhet me votë (në një kohë kur vetë Besa ka ardhur në detyrë me emërim) ishte diçka që nuk kaloi në heshtje.