2022-shi i ambasadores Yuri Kim, viti i armiqësisë me opozitën dhe u njësimit me qeverinë

Ambasadorja e SHBA në Tiranë, Yuri Kim për disa muaj mbyll mandatin zyrtar në Tiranë.

Por, pavarësisht se kur ikën, në janar apo qershor, Yuri Kim nuk do të mbahet mend, as për ditën kur erdhi dhe as për muajin kur iku.

Ajo do të kujtohet, sa herë të shkruhet për ambasadorët e ShBA në Shqipëri, rolin, ndikimin dhe siluetën në politikën shqiptare, si diplomatja që u armiqësua me opozitën dhe u njësua me qeverinë, në vitet kur kjo e fundit zotëronte thuajse 100 për qind të pushtetit në vend.

Gjatë ushtrimit të detyrës, as këtë vit nuk kanë munguar përplasjet në distancë me politikanët. Pas shpalljes së Sali Berishës non grata nga DASH, Yuri Kim pati qëndrime të forta në publik për kryetarin e partisë demokratike, por nga ana tjetër, edhe ajo ka qenë shpesh në qendër të akuzave të opozitës shqiptare.

Kryedemokrati Sali Berisha e ka akuzuar atë si shkaktaren që po dëmton marrëdhëniet shqiptaro-amerikane dhe se ka vënë kundër tij deputetët e shtetit shqiptar.

Në një kohë kur në Gjykatën e Apelit nuk ka asnjë vendim se kujt i përket vula e partisë, Berisha ka drejtuar gishtin drejt diplomates amerikane, duke thënë se në bashkëpunim me kryeministrin Edi Rama po punojnë kundër PD-së.

Po ashtu, kryedemokrati e ka cillësuar atë se sillet si guvernatore në Shqipëri dhe se mbështet kryeministrin Edi Rama.

Yuri Kim ndërkohë i është përgjigjur se lufta kundër korrupsionit është një interes thelbësor i sigurisë kombëtare të SHBA-së dhe se ambasadorja është duke inkurajuar gjyqtarët dhe prokurorët të bëjnë punën e tyre.

Ndryshe nga shumë analistë e politikanë, pikërisht në konferencën e 100 vjetorit të marrëdhënieve shqiptaro-amerikane, ambasadorja deklaroi mbështetjen për nismën e Ballkanit të Hapur, ndonëse ajo është refuzuar nga Kosova dhe Mali i Zi deri tani.

Shefja e diplomacisë së Uashingtonit në 3 vite qëndrim në Tiranë ka pasur në fokus reformën në drejtësi.

Në daljet publike apo intervista televizive, ambasadorja ka theksuar rëndësinë e kësaj reforme për vendin që ajo përfaqëson.

Kush është Yuri Kim

Yuri Kim mbërriti në Tiranë si Ambasadorja e Shteteve të Bashkuara të Amerikës në Republikën e Shqipërisë në janar 2020. 

Ka qenë drejtoreshë e Çështjeve të Europës Jugore dhe ka mbuluar Turqinë, Greqinë, Qipron dhe më gjerë rajonin e Mesdheut Lindor; si drejtoreshë e Zyrës së Çështjeve Europiane të Sigurisë dhe ato Politiko-Ushtarake, ka mbuluar NATO-n dhe Organizatën për Siguri dhe Bashkëpunim në Europë (OSBE). Më parë ka qenë Shefe e Kabinetit e Zëvendës Sekretarit të Shtetit dhe drejtoreshë e Qendrës për Studimin e Administrimit të Diplomacisë.

Më herët në karrierën e saj, ka qenë Ndihmëse e Posaçme e Sekretarit të Shtetit Colin Poëell, si dhe Ndihmëse e Posaçme e Ndihmës Sekretarit të Shtetit për Çështjet e Azisë Lindore dhe Paqësorit. Mandatet e saj jashtë SHBA përfshijnë Turqinë, Irakun, Republikën e Koresë, Japoninë dhe Kinën. Yuri Kim ka një diplomë bachelor nga Universiteti i Pensilvanisë dhe një Master në Filozofi nga Universiteti i Kembrixhit.