Aleatët e PD-së në një linjë për zgjedhjet vendore: Të garojmë me një kandidat të përbashkët

Aleatet e Partisë Demokratike si Fatmir Mediu i republikaneve, Agron Duka i Partisë Agrare Ambjentaliste dhe Dashamir Shehi i Lëvizjes për Zhvillim Kombëtar kërkojnë që i gjithë faktori opozitarë të dalë në zgjedhjet vendore të 2023-it me një kandidat të vetëm. Sipas tyre, kjo është e vetmja mënyrë për të fituar përballë Edi Ramës.

Aleatet e PD theksojnë se nëse nuk do të ketë një kandidat të përbashkët nga radhët e opozitës, atëherë pritet të ndodhë përsëri 6 marsi, kur mundësia që Rama të mbajë shumicën e bashkise, do të ishte shumë e madhe.

Mediu

Kreu i Partisë Republikane, Fatmir Mediu tha në një intervistë në MCN pak ditë më parë se ka dy rrugë për përcaktimin e kandidatëve, e para përmes zgjdhjeve të hapura që shkojnë përtej anëtarësisë së PD-së, dhe opsioni i dytë përmes një sondazhi nga një institucion i besueshëm. 

“Me z.Duka dhe z.Shehu takohemi në mënyrë periodike. Në 6 mars thamë që s’bëhemi pjesë e ndarjes dhe kërkuam zgjedhje të hapura, ku të përfshihen të dy palët. Opozita e ka detyrim të dalë me një kandidat. Si zgjidhet, përmes pazarit? Nuk mendoj se funksionon më kështu. Ka dy rrugë, ose me zgjedhje të hapura ku votojnë edhe qytetarët. Ka një shqetësim shiko se do vijnë socialistët të votojnë. Nëse PS manipulon një proces të brendshëm atëherë opozita është e paaftë të përballet në zgjedhjet lokale! E dyta mund të jetë një sondazh nga një institut kredibël, për të gjetur kandidatin më të mirë.  Ne diskutuam sot me kolegët.

E kemi bërë publik unë dhe z.Shehu në emër të Aleancës për Ndryshim. Do diskutojmë edhe me partitë e tjera, që janë në Parlament ose jo. Mos harroni që ka edhe parti të vogla që kanë ngelur jashtë Parlamentit si pasojë e sjelljes së partive të madha. Nëse ne vemë të ndarë në zgjedhje i kemi bërë një nder Edi Ramës. Ndarja në zgjedhjet e kryetarit të bashkisë është disfatë për qytetarin shqiptar. E rëndësishme është të mos ketë të përjashtuar. Ngritja e diskutimit duhet të bëhet në një nivel me teknik", u shpreh Mediu.

Sipas Mediut, opozita duhet t’u jap mundësinë kandidatëve jashtë politikës, duke theksuar se një profil qytetar mund ta mundë Veliajn në kryeqytet.

Duka

Kreu i Partisë Ambientaliste Agrare, Agron Duka thotë për Report Tv se opozita duhet të dalë me një kandidat të përbashkët për zgjedhjet vendore 2023. Duka tha se nëse nuk dilet me një kandidat të përbashkët rrezikon të përsëritet e njëjta situatë si në zgjedhjet e pjesshme të 6 marsit, ku të ndahet vota mes kandidatëve të opozitës.

“Mendimi është që nëse do dalin kandidatë nga primaret e Berishës, vetëm dhe jo me konsensusin gjithë opozitës, mund të rrezikojmë në përsëritje të situatës më 6 mars. Në rast të tillë do ndahet vota. Të bën të pamundur të fitosh përballë një kandidaturë të fortë të PS. Vetëm nëse bëhen primare të hapura, nëse zgjidhet një kandidaturë e vetme nga e gjithë opozita, përfshirë këtu edhe partitë e vogla, vetëm atëherë mund të kemi shpresa që të fitojmë zgjedhjet vendore”, tha Duka.

Nga ana tjetër, kryetari i Lëvizjes për Zhvillim Kombëtar, Dashamir Shehi, ka treguar formulën që i ka propozuar PD-së për bashkimin e opozitës.

Shehi

Në një intervistë për Euroneës Albania, Shehi u shpreh se janë dy elementë që ndihmojnë në bashkimin e opozitës, lufta kundër Edi Ramës dhe dalja me një kandidat në zgjedhjet lokale të vitit 2023.

“Unë pres që këto ditë të ndodhë një formulë bashkëpunimi. Unë për vete së bashku me disa kolegë të tjerë, i kemi propozuar PD një formulë. Dy elementë na bashkojnë, lufta ndaj kësaj qeverie, lufta kundër Edi Ramës dhe të zgjedhim një kandidat të përbashkët në zgjedhjet lokale.

Unë them të vendosëm një emërues  mbi të cilën të qëndrojnë të gjithë partitë. Unë them se kjo është e mjaftueshme nëse duam të luftojmë Ramën”- theksoi Shehi.

Meta: Opozita të dalë me kandidatë të përbashkët

Kryetari i Partisë së Lirisë, Ilir Meta thotë se opozita duhet të dalë me kandidatë të përbashkët në të gjitha bashkitë e vendit, për zgjedhjet e ardhshme lokale.

Në një deklaratë për mediat, Meta deklaroi se kjo është më e mira për opozitën, në kushtet kur vendi udhëhiqet nga mafia.

“Po. Opozita duhet të dalë në të gjithë Shqipërinë me kandidatë të përbashkët. Kjo është më e mira për situatën, për arsye se jem në kushtet e një shteti mafioz. Në kushtet e një shteti mafioz, opozita duhet të paraqitet sa më e bashkuar, sepse kuptohet në kushte të tjera, sa më shumë kandidatë, aq më mirë për qytetarët. Por nuk jemi në kushte normale, demokratike”, theksoi Meta.

Berisha

Kujtojmë se lryetari i Partisë Demokratike, Sali Berisha është pyetur më herët nga gazetarët nëse të gjithë si demokratë do të dalin me një kandidat të vetëm në zgjedhjet e ardhshme.

Ai tha se praktika është e përcaktuar, ku gjithçka do të bëhet përmes primareve.

Berisha paralajmëroi se do të niste puna për realizimin e primareve për zgjedhjet vendore, por u shty pasi u kërkua më shumë kohë nga anëtarët me argumentin se duhet më shumë kohë të studiojnë draftin.