Dikur e quajti hajdut e të paudhë, por sot Vangjel Tavo i bashkohet "grabitjes" së Ramës

Zgjedhjet në Bashkinë e Himarës, qysh në maj të vitit të shkuar u shoqëruan me përplasje, akuza që kryeministri Edi Rama nga fushata i drejtoi kandidatin të opozitës, Fredi Beleri. Ky i fundit sot, ndodhet në burg duke vuajtur dënimin për shit-blerje votash, akuzë e cila e çoi në pranga disa ditë para zgjedhjeve.

Mirëpo, arrestimi i Belerit erdhi pas një vorbulle sharjesh e akuzash që Rama i drejtoi.

Në pritje të zgjedhjeve të dyta që do të mbahen të dielën në Himarë, Rama është shfaqur krah kandidatit të tij për Himarën, Vangjel Tavos. Nga Himara, Rama nuk ka kursyer premtimet e tij elektorale, krah kandidatit socialist që dikur, e ka akuzuar për shit-blerje votash.

Duket se Tavo i ka harruar eurot që dikur thoshte se Rama shpërndante ose e kanë joshur.

Akuzat e Tavos më 27 prill 2021

Vangjel Tavo, i pari në listën e LSI-së në Gjirokastër, akuzoi Partinë Socialiste dhe kreun e saj Edi Rama, për shit-blerje të hapur votash dhe kushte të pabarabarta mes kandidatëve.

Sipas Tavos, për një votë Rama kishte ofruar deri në 500 euro.

"Ju kam shërbyer me të gjithë zemër dhe kjo ka qenë kënaqësia më e madhe në jetën time publike. Siç jeni dëshmitarë, kjo betejë që sapo kaloi ishte në kushte tërësisht të pabarabarta. Ky nuk është aspak justifikim, por një fakt dhe një realitet që u pa dhe nga vetë ju. Në këto kushte të pabarabarta rrjedhimisht fitorja elektorale ishte e vështirë për t’u arritur. Flitet për 500 euro, është rritur çmimi. Tashmë lekët e akumuluara nga hashashi vitet e kaluara e kanë bërë të vetën dhe do të harxhohen. Unë u them njerëzve që t’i marrin lekët se të vjedhura janë apo lekë droge, por votat t’i hedhin aty ku mendojnë. Lekët e vjedhura më mirë t’i kenë të varfrit se ata që i kanë", deklaronte asokohe ai.

Përplasja në prill të 2021-shit

Akuzave të Tavos, Rama iu përgjigj me gjuhën e tij të shthurur, zhargonin që e shoqëron gjithmonë kur një kundërshtar i drejtohet.

“Vangjo tepsixhiu i baba Likes dhe doktore Monës, kujton se do blejë përsëri vota me zarfe e presione greke në Dropull”, iu drejtua Rama.

Nga ana tjetër, Tavo e quajti të paudhë, pa dinjitet dhe të pamoralshëm.

"O i paudhë, o i pamoral, o i padinjitet, o i pafe! Je panikosur për humbjen e pritshme dhe po bredh nëpër varreza, duke gënjyer dhe të vdekurit, por koha e regjimit tënd ka mbaruar", u shpreh Tavo ndaj Ramës.

Tavo mohon akuzat ndaj Ramës

I pyetur nga Belind Këlliçi nga një studio televizive se pse vendosi të kandidojë krah atij që dikur e quajti “hajdut” të zgjedhjeve, Tavo pretendoi se po garonte për hir të Himarës dhe reivendosjes së normalitetit.

Biseda:

Këlliçi: Ju njoh personalisht dhe vlerësoj përvojën tuaj. Por, nuk mund ta mohoj se ka kohë që flitet kandidatura juaj. Në vitin 2021, ne kemi qenë bashkë në të njëjtin koalicion. Unë vijoj të mendoj se mandati juaj në vitin 2021 është grabitur.

Tavo: Jo nuk kemi qenë në një koalicion, kam kandiduar veç. Zoti Këlliçi, ma ktheni dot mbrapa 2021-shin?

Këlliçi: Ju keni thënë se u është grabitur mandati nga qeveria. Keni nominuar Edi Ramën si personin që e ka bërë. Janë paguar 500 euro për votë kundër kandidaturës tuaj. Çfarë ju shtyn sot të jeni kandidati i këtij kryeministri që ka blerë votën 500 euro kundër jush?

Tavo: Më ka shtyrë Himara dhe zgjidhja e problemeve, krizave dhe rivendosja e normalitetit. Jam i bindur që në muajt e parë të mandatit tim, Himara, ashtu si bashkitë e tjera do të jetë në normalitet të plotë, qytetarët do të marrin shërbim në mënyrë të barabartë dhe do të kenë përfaqësues që do ti përfaqësojë denjësisht, të majtë, të djathtë, ata që ndihen grekë dhe ata që nuk ndihen grekë.

Këlliçi: Çfarë ju shtyu të kandidoni për një person që ka blerë vota kundër jush?

Tavo: Kam pranuar për një arsye shumë madhore, në krahasim me një kandidim në Gjirokastër që ishte i teti në radhë për mua. Mendova se çështjet në Himarë janë shumë të rëndësishme dhe i kapërcejnë edhe problematikat që mund të jenë krijuar në të kaluarën.