Evakuimi i shqiptarëve nga Izraeli: MEPJ jep sqarim të pjesshëm, shumë pyetje mbeten pa përgjigje

Suela Gjidede

Pas përshkallëzimit të tensioneve mes Izraelit dhe Iranit, pati edhe qytetarë shqiptarë të cilët mbetën të bllokuar në zonën e konfliktit.

Ministria për Evropën dhe Punët e Jashtme njoftoi se ata tashmë janë evakuuar përmes një operacioni të suksesshëm. 

Në një përpjekje për të hedhur dritë mbi hapat e ndërmarra nga autoritetet shqiptare për evakuimin e tyre, Politiko.al kërkoi informacion nga Ministria për Evropën dhe Punët e Jashtme. Përgjigjja që morëm ngre më shumë pikëpyetje sesa jep sqarime.

Ministria bën të ditur se operacioni nisi menjëherë me shpërthimin e konfliktit dhe u zhvillua "sa më shpejt të jetë e mundur". Por nuk jepen data të qarta, numra të saktë të qytetarëve të përfshirë, apo harta logjistike e veprimeve.
Përmendet një bashkëpunim mes ambasadave shqiptare në Tel Aviv dhe Kajro, por mbetet e paqartë si funksionoi ky bashkëpunim në praktikë. Cilat ishin kanalet e komunikimit, apo kush mori vendimet përfundimtare?

Ministria thotë se udhëzimet për sigurinë janë ndarë me qytetarët nga Ambasada në Tel Aviv, por nuk përmendet nëse është siguruar transport i organizuar, shoqërim nga autoritetet.

Dy grupe qytetarësh janë evakuuar me sukses brenda 9 ditësh, sipas Ministrisë, por mungojnë të dhëna mbi numrin total të qytetarëve që kërkuan ndihmë dhe se sa ende mbeten në zonë.

Ministri Hasani jep më shumë detaje në rrjetet sociale, ndërsa MEPJ zyrtarisht mbetet e mjegullt 

Ndërsa përgjigjja zyrtare e Ministrisë për Evropën dhe Punët e Jashtme mbetet e përgjithshme dhe pa shumë detaje konkrete, Ministri i Jashtëm Igli Hasani ka qenë më i qartë në një deklaratë publike në rrjetet sociale.

Ai ka bërë të ditur se katër qytetarë shqiptarë janë evakuuar me sukses nga Izraeli – dy përmes Jordanisë dhe dy të tjerë përmes Egjiptit – dhe se operacioni është zhvilluar në bashkëpunim me autoritetet izraelite, jordaneze, egjiptiane dhe ambasadën austriake në Tel Aviv.

Hasani thekson se qytetarët ndodheshin në Izrael për arsye profesionale dhe familjare, dhe se institucionet shqiptare po ndjekin me përparësi çdo rast të ri që kërkon ndihmë.

Kjo deklaratë hedh më shumë dritë mbi rrugët e ndjekura për evakuim dhe aktorët ndërkombëtarë të përfshirë, por gjithsesi nuk zëvendëson nevojën për një raport më të detajuar institucional nga MEPJ.