Çfarë aftësish ka, dhe si lejohet një person si ky, të dalë në TV për kancerin e COVID-19

nga Endri Shabani

 

Konkurenca për reklama i vendos mediat dhe gazetarët në një presion të vazhdueshëm për audiencë. Numri i klikimeve apo grafikët e audiencës janë kthyer në instrumentin kryesor matës të punës së tyre, madje edhe të peshës së një gazetari apo emisioni.

Për pasojë gazetarët janë në kërkim të vazhdueshëm të diçkaje që tërheq vëmendjen tonë.

Fatkeqësisht vëmendjen tonë e tërheqin gjërat negative, të cilat zgjojnë instiktet bazë: si frika, ankthi dhe inati.

Prandaj media promovon vazhdimisht ngjarje si vdekje, vrasje, sëmundje, tragjedi, krim dhe sherr. Të gjitha këto na japin një ndjesi që bota është e pasigurt, por na mbajnë të lidhur te televizori (dhe të blejmë më shumë).

Nga ana tjetër, media përpiqet të na argëtojë, sepse jeta jonë është monotone, gjë që lidhet edhe me mënyren se si organizohet puna në një kohë dhe sistem si ky ku jetojmë.

Kështuqë, media e trajton gjithçka si spektakël: politikën, sëmundjen, ekonominë dhe problemet sociale. Të gjitha trajtohen në një mënyrë të shpejtë dhe sipërfaqësore, aq sa për të tërhequr vëmendjen, pa arritur të shpjegojnë asgjë me themel.

Rezultati pastaj është që në një pandemi si kjo, merr vëmendje qendrore një person si ky, i cili është e paqartë çfarë formimi ka, përveç aftësisë për të lexuar në Google.

Avantazhet e tij janë që thotë gjëra që të shokojnë, jep shpjegime të thjeshta për fenomene të komplikuara, dhe i lidh gjërat me fantazi duke u bërë interesant.

Ndërsa mjekët dhe shkencëtaret marrin rol sekondar. Ata vërtet kurojnë përditë pacientët në spital, apo studiojnë gjithë ditën viruset në laborator, por ata janë të mërzitshëm me informacionin që japin, dhe shpesh nuk i shpjegojnë dot fenomenet që janë ende duke u studiuar.

Problemi me këtë "shoqëri spektakli" nuk është kur ky thotë se zv/presidentja e Amerikës do të vdesë, që bota qeveriset nga zhapikët apo që ne do mbetemi pa internet. Deri në atë pikë, fantazitë e tij nuk i bëjnë dëm njeriu.

Problemi është kur ai futet në fushën shëndetësore dhe merr guximin t’u thotë të sëmurëve me kancer "mos bëni kimioterapi", apo të tjerëve "mos bëni vaksina". Atëherë ai kthehet në një rrezik për shëndetin publik.

Në këtë pikë, media e rrit audiencën e vet në kurriz të shëndetit tonë, sepse shumë njerëz vulnerabël psikologjikisht, i besojnë këto hajvanllëqe, dhe sillen në bazë të tyre.

Për shembull, një njeri që nuk beson se virusi ekziston, nuk përdor maskë, duke e përhapur virusin për vete dhe për të tjerët. Një njeri që nuk beson te vaksina nuk vaksinohet, duke ia zgjatur jetën kësaj pandemie, dhe duke rikthyer sëmundje që ishin zhdukur prej shekujsh. Gjithashtu, një njeri që nuk beson te kimioterapia nuk merr trajnimin e nevojshem duke rrezikuar jetën.

Unë kam njohur njerëz që kanë paguar nga 300 Euro për t’u shëruar nga Covid-19 te "mjekët popullorë", të cilët janë thjesht sharlatanë të promovuar nëpër emisione shumë të ndjekura televizive.

Duke e kuptuar presionin e gazetarëve për audiencë, mendoj që në një situatë si kjo që po kalojmë, ku përditë po humbasim njerëz që i duam, është e turpshme dhe e papranueshme që media dhe gazetarët të jenë indiferentë për pasojat e punës së tyre.

Një gjë e tillë nuk duhet të lejohet të vazhdojë kështu, as edhe një sekondë më tepër, dhe secili prej nesh ka një armë të fuqishme në dorë: telekomandën...