Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Filip Çakulli, metamorfoza e një bashkëpunëtori të Sigurimit të Shtetit

Politiko 1 Prill 2026, 11:31

Politiko.al

Filip Çakulli, në kapërcyell të të 70-ave, bëri sërish shërbimin e fundit ndaj pushtetit, kur në cilësinë e drejtorit të Bordit të FK Partizani, mori në mbrojtje vëllain e kryeministrit, i cili de fakto është pronar i këtij klubi. Reagimi erdhi pas një deklarate të kreut të opozitës Sali Berisha, i cili u shpreh se në klubet e futbollit të kryeqytetit, dhe jo vetëm aty, po kryhet pastrim parash dhe fiksim ndeshjesh dhe kërkoi një hetim ndërkombëtar për këtë.

Në mënyrë të veçantë Berisha përmendi FK Partizani, ku drejtor është Olsi Rama dhe FK Dinamo, ku pronar figuron me 30 % Ergys Agasi, i cili së bashku me mikun e tij Orest Sota kontrollojnë një paketë prej 60%.

Sali Berisha nuk tha asgjë që nuk e dimë. Olsi Rama është pronar de fakto i FK Partizani. Por sëkëlldia e Çakullit të familjes kryeministrore ka qenë e madhe. Ky individ, kur vjen puna për të mbrojtur regjimet, qofshin totalitare apo hajdute, nuk ngurron të hidhet në zjarr, natyrisht duke përfituar.

CV e z. Çakulli, që është dhe pronar i Fiks Fare, është për t’u admiruar, sidomos në zanatin e shërbyesit të pushtetit. Që në rininë e hershme, kur ishte 26 vjeç, në vitin 1981, dhe punonte si gazetar në revistën “Hosteni”, dega Lushnjë, do rekrutohej nga Sigurimi i Shtetit për të bërë një recencë për një hartim të djalit të Abaz Kupit, Fatbardhit. Këtë hartim pinjolli i Kupit e kishte bërë kur ishte në gjimnaz në vitin 1965, me titull “Gëzuar Vitin e Ri”. Pasi Sigurimi i Shtetit kishte dështuar të siguronte dëshmi bindëse me anë të dëshmitarëve, prova u gjet te recensa e e Filipit me hosten. Provë definitive për dënimin me 12 vite burg të Fatbardh Kupit u bë akt-ekspertimi i shkruar nga Filip Çakulli, i etur për karrierë brenda regjimit.

“Megjithëse i pandehuri Fatbardh Kupi i mohon bisedat e ndryshme me karakter armiqësor që ka bërë me dëshmitarët e lartpërmendur, në periudha e kohë të ndryshme kundër pushtetit tonë popullor për minim e dobësimin e saj; qëllimi i tij kundërrevolucionar del qartë edhe nga hartimi i tij që ka bërë në gjimnaz në vitin 1965 me temë “Gëzuar Vitin e Ri”. Megjithëse i pandehuri pretendon se ky është një hartim pa përmbajtje politike, eksperti Filip Çakulli, gazetar, i cili ka bërë komentin për hartimin e tij, provon se në mënyrë alegorike shpreh “besim” dhe “shpresë” për të ardhmen kur thotë se “Dimri do të marrë të tatëpjetën me një stuhi të re. Dobia është përpjekja drejt të cilës ecim, shpirti që lakmon përpara, has në pengesa, bie, por gjen më në fund rrugën dhe arrin qëllime të nalta”. (Komenti i Filip Çakullit). Besimi është kauza për të cilën ai ka shërbyer dhe i ka kushtuar jetën, dimri që do të marrë të tatëpjetën me stuhi të re është pushteti popullor, i cili është dhe pengesa për të arritur qëllimet e larta. Se më lart provohet me pohimet e pjesshme të të pandehurit, i cili mundohet t’i shpëtojë përgjegjësisë penale me dëshminë e dëshmitarëve të lartpërmendur. Provë shkresore është akti i ekspertimit letrar-artistik dt. 11.11.1981, si dhe biografia e tij dt. 11.08.1981 dhe dëshmia e penalitetit dt. 25.11.1981”.

Filip Çakulli, metamorfoza e një bashkëpunëtori të

Pjese nga dosja

Pesë vjet pas këtij akti, i cili dënoi një njeri me 12 vite burg, Filipi do të vinte në Tiranë, ku do të punësohej te Gazeta Bashkimi, Zëri i Popullit, dhe kështu me radhë. Duhet theksuar se Filip Çakulli, edhe në zonën e Lushnjës ka qenë njeri i privilegjuar përgjatë kohës së komunizmit, pikërisht për shërbimin që i bënte regjimit të kohës.

Filipi nuk ka qenë vetëm një gazetar humoristik. Ai ka qenë vegël e sistemit të asaj kohe, një pushkë në dorën e atij regjimi kriminal, që me karikaturat apo fejtonet e tij shënjestronte njerëz, sidomos ata që persekutoheshin nga regjimi. Jo më kot Filipi, nga Dermishi i Sarandës, u zhvendos në Lushnjë, ku ndodhej dhe kampi më i madh i të përndjekurve. Një reviste që dilte vetëm një herë në javë nuk i duhej një gazetar që mbulonte vetëm një qytet të vogël, përpos faktit se ai përdorej atëherë, siç përdoret dhe sot, për të sulmuar kundërshtarët e regjimit.

Por, në rast se atëherë Filipi e bënte për ideal, sot e bën për para. Gjithsesi, morali është i njëjtë: ai që është mësuar të shërbejë dhe të lëpihet me kosto deri jetën e të tjerëve, pak rëndësi ka se për çfarë e bën. Është çështje karakteri dhe Filipi e përfaqëson denjësisht rolin e tij.

Vijon…

PS: Në serinë e shkrimeve për Çakullin në vijim do të mësoni edhe për evazionin fiskal të tij me “Fiks Fare”, dominimin së bashku me Olsi Ramën në biznesin e bixhozit, por edhe për viktimat që ka shkaktuar ai me gjobat që vendos në emisionin Fiks Fare.