Flet në Politiko shtetasja ruse në Tiranë: Jam kundër luftës. Rusia nuk është Putin!

Ukraina u zgjua me bombardime mëngjesin e 24 shkurtit, ndërsa sirenat e alarmit u dëgjuan në rrugët e Kievit për herë të parë që nga Lufta e Dytë Botërore.

Forca ruse me urdhër te Presidentit Vladimir Putin kanë hyrë në Ukrainë dhe kanë bombarduar disa qytete të rëndësishme, me objektiv qendrat ushtarake.

Qindra viktima janë raportuar prej ditës së djeshme, ndërsa zhvillimet që vijnë prej andej kanë shokuar të gjithë botën.  

Megjithatë, ‘Rusia nuk është Putin’. Kështu e ka përmbledhur aktin e presidentit rus një shtetase nga Rusia e cila jeton në Tiranë prej 20 vitesh.

Ajo quhet Anna Kryemadhi, e martuar me një shqiptar dhe punon në Shqipëri si udhërrëfyese turistike. Në një intervistë për ‘Politiko’, Anna, e cila është nënë e 6 fëmijëve tregon si e ka përjetuar nisjen e luftës në Ukrainë. Ajo thotë se është e shqetësuar për miqtë e të afërmit e saj që jetojnë si në Ukrainë, ashtu edhe në Rusi.

Ashtu si shumë bashkëkombas të saj, por edhe qytetarë në mbarë globin, Anna është kategorikisht kundër luftës...

****

Sot shënohet dita e dytë e bombardimeve ruse në Ukrainë. Si u ndjetë kur mësuat për nisjen e luftës së paralajmëruar nga Putin?

Kur e lexova dje në mëngjes lajmin për nisjen e luftës dhe u dëshpërova shumë. Më rrodhën lotët nga ndjenja e hidhërimit dhe zemërimit që përjetova. Që prej ditës së djeshme, ndjek vazhdimisht të gjitha lajmet.

Madje, pasditen e djeshme unë isha prezent edhe në protestën që u zhvillua para ambasadës ruse. Edhe si qytetare dhe duke jetuar në këtë kontinent, si mund ta prisja ndryshe këtë lajm. Unë jam kundër luftës.

A keni miq dhe të afërm në Ukrainë dhe a keni komunikuar me ta?

Po, kam miq dhe të afër atje. Me disa prej tyre kam komunikuar. Me shoqen time të fëmijërisë në Kiv kam biseduar. Ajo po qante dhe ishte duke shkuar në metro, në vendstrehimin e përcaktuar për t’u mbledhur të gjithë banorët.

Një tjetër mikeshë e imja ishte duke udhëtuar me tren tek kufiri me Poloninë kur bisedova me të. Ndërkohë ka edhe të tjerë që po qëndrojnë në shtëpitë e tyre.

Po me të afërmit tuaj në Rusi keni komunikuar? Si ta kanë përshkruar gjendjen momentalisht?

Deri tani gjendja në Rusi nuk ka ndryshuar shumë. Megjithatë, kam mësuar se njerëzit po krijojnë radhë të gjata në banka dhe bankomate.Të afërmit e mi në Rusi janë të shqetësuar shumë dhe nuk e dinë se me çfarë do të përballen në vijim.          

Shumë qytetarë rusë dje u ngritën në protestë kundër nismës së Putin, ndonëse ishin paralajmëruar arrestime nga autoritetet në rast proteste. Si e vlerësoni?

Bravo u them që nuk kanë patur frikë.    

NATO dhe SHBA deklaruan se nuk do ndërhyjnë në Ukrainë. Cila është frika juaj më e madhe?

Unë kam familjen time, kam 6 fëmijë dhe frika ime më e madhe është që ky tmerr do të ketë pasoja për të gjithë botën. Por, shpresoj që ky të jetë paniku i momentit.

Si ndiheni ju si shtetase ruse që qeveria e kombit tuaj të ndërmarrë një veprim të tillë?

Nuk e di, Rusia nuk është Putin.

Apeli juaj?

JO luftës! në rusisht ne themi ‘НЕТ войне’.

Politiko.al/ S.Gj