Intervista për Politiko/ Cukali analizon problematikat e medias: Politika e saboton punën në 3 mënyra

Kryetari i Këshillit Shqiptar të Medias, Koloreto Cukali ka folur për problematikat e medias në Shqipëri, pasi raporte të ndryshme nga organizmat ndërkombëtare shkruajnë për përkeqësim të situatës,

Në një intervistë për Politiko, Cukali thotë se situate në media është shumë shqetësuese, si pasojë e mungesës së vullnetit politik për të zgjidhur problemet kryesore, konfliktin e interesit dhe lidhjet okulte politikë-biznes-pronarë.

Ai tha se ka media të ngritura pikërisht për interesat e pronarit apo politikës, ndërsa shtoi se Shqipëria ka gazetarë të mirë, por që nuk kanë hapësirë të kryejnë të pavarur veprimtarinë e tyre.

Sipas Cukalit, aksesi i gazetarëve për informacion është gjithmonë e në rënie. Referuar raportimeve për kërcënime ndaj punonjësve të mediat, ai tha se janë shumë më shumë nga çfarë bëhet publike. Më tej, analizoi edhe mënyrën sesi politika saboton punën e medias.

INTERVISTA E PLOTË:

Në raportin e fundit, KE vlerëson se Shqipëria nuk ka bërë përparim për lirinë e shprehjes, çfarë e ka penguar progresin?

Shqipëria nuk bën progres sepse nuk ka asnjë farë vullenti poliitk për të zgjidhur problemin kryesor të medias: konfliktin e interesit dhe lidhjet okulte politikë-biznes-pronarë të medias. Për sa kohë nuk do të zgjidhet ky ngërç, ne do kemi një media të kapur dhe të pa aftë për të zhvilluar punën e vet.

Sa shqetësuese i vlerësoni problematikat e medias në Shqipëri?

Situata në media është shumë shqetësuese. Së pari, ka shumë pak (për të mos thënë aspak) media që të kenë në qendër të punës së tyre interesin e publikut. Në shumicën e rasteve ato mbrojnë interesin e pronarit, partisë X, politikanit Y, Qeverisë ose Bashkisë. Ka media që janë ngritur pikërisht për këtë funksion. 

Shqipëria ka gazetarë të mirë e të pavarur, por pothuajse nuk ka media që t’u krijojnë hapësirën për të bërë punën e tyre sipas ndërgjegjes së tyre. 

Mendoni se ka presion nga politika dhe si e vlerësoni sjelljen ndaj gazetarëve?

Politika e saboton punën e mediave në 3 mënyra: së pari duke ushtruar presion përmes pronarëve e kryeredaktorëve të kapur. Së dyti, me sulme direkte, duke i denigruar për të ulur besimin tek mediat. Politikës i intereson që publiku informacionin ta marrë nga kanalet e propagandës e jo nga ato të medias së pavarur dhe mënyra më e mirë është denigrimi i punës së gazetarëve. Dhe e fundit, kur nuk ia del as me tëparën as me të dytën, pushteti ndërton rregullore e ligje që “të pabindurit” t’i ndëshkojë me gjoba, me mbyllje apo dhe burg, duke shmangur gjykatën shqiptare e duke u bërë vetë gjykatës. 

A e kanë gazetarët të lehtë të kenë akses për informacion apo situata është vështirësuar?

Aksesi vjen gjithmonë e në rënie. Po jetojmë në kohën kur institucionet shkelin rregullisht ligjin për të drejtën e informacionit e nuk mbajnë përgjegjësi. Ndërkohë, shtohen filtrat pengues për të marrë informacion, si Agjencia e Informimit.

Së fundmi, OSBE ka raportuar se gazetarët shqiptarë përballen me sulme fizike, kërcënime dhe ngacmime, si e komentoni?

Përtej asaj që raportohet, kërcënimet e sulmet ndaj gazetarëve janë shumë e shumë më tepër. Nuk ka gazetar shqiptar (reporter ose investigativ) që nuk ka marrë kërcënime të të tëra formave. Ndërkohë, asnjë rast kërcënimi nuk është zgjidhur nga organet e rendit e të Prokuroriës. Kjo i bën këto institucione në rastin më të mirë të paafta për të kryer funksionin e tyre në mbrojtje të gazetarëve e të qytetarëve, dhe në rastin më të keq, bashkëpunëtorë në këto krime./ Intervistoi: Joana Skenderi