Investimi në Sazan nga dhëndri i Trump, Xhepa në Politiko: E vendos Shqipërinë në hartën e turizmit konkurrues

Eksperti i njohur i ekonomisë, Selami Xhepa ka komentuar në Politiko.al investimin 1 miliardë dollarësh në jug të Shqipërisë, të Jared Kushner, dhëndrit të ish-presidentin amerikan, Donald Trump.

Sipas Xhepës, nëse ky projekt do të realizohej në të ardhmen, Shqipëria do të pozicionohej në hartën e turizmit konkurrues në rajon. Sipas tij, kjo do ta bënte turizmin një sektor të qëndrueshëm në udhëheqjen e rritjes ekonomike.

“Është një projekt shumë me rëndësi për ekonominë e vendit, që valorizon një aset të fjetur deri më sot.

E vendos Shqipërinë në hartën e turizmit konkurrues në rajon dhe e bën turizmin një sektor të qëndrueshëm në udhëheqjen e rritjes ekonomike. Shkurt, do të ishte një lajm shumë pozitiv nëse ky projekt do të realizohej në të ardhmen”, tha Xhepa në Politiko.al.

I pyetur se çfarë domethënie ka për Shqipërinë dhe ekonominë e vendit, fakti që ky projekt vjen si nismë e kompanisë që zotërohet nga Jared Kushner, dhëndri i ish presidentit të SHBA-ve, Donald Trump, eksperti thotë se para lidhjeve politike, më e rëndësishme është që kontrata të mbrojë dhe respektojë interesin publik.

“Kushner është një investitori njohur tashmë, pavarësisht se është dhëndri i Trump. Lidhjet politike kanë sigurisht rendësi, por më me rëndësi është që kontrata të mbrojë dhe respektojë interesin publik më së pari”, deklaron Xhepa.

Por, sa mund të jetë numri i shqiptarëve që mund të punësohen në këtë projekt 1 miliardësh?

Xhepa nuk preferon të ndalet në detaje, deri në përfundim të projektit. “Detajet ekonomike është shpejt, pasi projekti është akoma në ‘concept phase’”, deklaron ai shkurtimisht.

Çfarë është ky projekt?

Kompania amerikane “Affinity Partners”, që zotërohet nga Jared Kushner, dhëndri i ish presidentit të SHBA-ve, Donald Trump, është në diskutime të avancuara për tre investime në zhvillimin e pronave në Ballkan që mund të kalojnë vlerën e 1 miliard dollarë, sipas Bloomberg.

Dy prej tyre janë në Shqipëri, në Sazan dhe Zvërnec dhe një në Serbi.

Firma e kapitalit privat me bazë në Majami planifikon të transformojë ishullin e Sazanit, që më parë ishte një bazë ushtarake, në një komunitet luksoz eko-resort të markës Aman, tha Kushner në një intervistë me Bloomberg Neës.

Në artikullin e Bloomberg janë publikuar dhe foto nga projekti i Sazanit që paraqet vila luksoze në pjesën shkëmbore të ishullit, dhe një qendër SPA po mbi shkëmb, me pamje nga deti, të hartuara nga studio “Genesis”.

Kush është Jared Kushner?

Kushner shërbeu si këshilltar i lartë në Shtëpinë e Bardhë, në periudhën 2017-2021, kur president i SHBA-së ishte Donald Trump.

Pas largimit nga posti qeveritar, ai themeloi kompaninë Affinity, e cila, sipas raportimeve të disa mediave amerikane, mban asete me vlerë mbi 3 miliardë dollarë.

Viteve të fundit, ai dhe bashkëshortja e tij, Ivanka Trump, vizituan dy herë Shqipërinë, ku u takuan edhe me kryeministrin Edi Rama.

Sipas një shkrimi në gazetën Neë York Times, planet e Kushnerit në Ballkan duket se kanë lindur pjesërisht përmes marrëdhënieve të ndërtuara gjatë kohës kur Trump ishte në detyrë./ S.Gj-Politiko.al/