Javë e “nxehtë” e politikës: Nga shkarkimi i Metës, Kongresi i PS dhe zgjedhjet në PD

Kjo javë pritet të jetë e ‘nxehtë’ sa i përket zhvillimeve politike.

Të mërkurën, Kuvendi mblidhet në një seancë të jashtëzakonshme, për shkarkimin e presidentit Ilir Meta, tri ditë më vonë PS mbledh Kongresin më 12 qershor, ndërsa e diela mbyllet me zgjedhjet në PD për kreun e ri të opozitës.

Shkarkimi i Metës

Këtë të mërkurë, Kuvendi i Shqipërisë pritet të mbajë një seancë të jashtëzakonshme më 9 qershor, për shkarkimin e presidentit Ilir Meta.

Komisioni Hetimor ka konstatuar se Meta ka shkelur 16 nene të Kushtetutës përpara zgjedhjeve të përgjithshme të 25 prillit dhe se ai duhet të shkarkohet një vit përpara se t’i përfundojë mandati.

Hetimet janë kërkuar nga 49 ligjvënës të Partisë Socialiste në pushtet, të cilët kanë argumentuar se Meta nuk e ka përmbushur detyrën kushtetuese për garantimin e unitetit kombëtar përpara zgjedhjeve, duke anuar kah opozita.

Për shkarkimin e Metës duhen dy të tretat e votave dhe socialistët nuk i kanë numrat për ta arritur këtë prag.

Por, nëse ligjvënësit votojnë për largimin e Metës nga zyra, miratimin përfundimtar duhet ta japë Gjykata Kushtetuese e Shqipërisë brenda tre muajsh.

Meta thotë se Kuvendi është në një periudhë tranzicioni pas zgjedhjeve dhe për këtë arsye nuk ka të drejtë të kryejë veprimtari të tilla hetimore.

Kujtojmëë se gjatë fushatës, Meta u përfshi në një sërë replikash të ashpra dhe përplasje me Partinë Socialiste ku në fokus ishin zgjedhjet e 25 prillit. Presidenti u zotua se do të mundësonte votën e lirë të shqiptarëve që sipas tij do ti bashkoheshin në një referundum popullor. Deklaratat e Metës gjatë fushatës arritën majën e tensionit kur kreu i shtetit deklaroi se “do t’ju presim dorën atij që prek votën”, apo “bëni gati sfurqet dhe kosat”.

Këto deklarata përfshirë edhe përplasjen me ambasadoren Yuri Kim janë “dënimi” që sipas socialistëve Ilir Meta mori më 25 prill nga shqiptarët, duke i dhënë mandatin e tretë PS-së dhe për këtë Ilir Meta duhet të shkarkohet. Sipas tyre, ishin deklaratat e Ilir Metës që nxitën dhunë dhe provokuan vrasjen e Pjerin Xhuvanit në Elbasan.

PS mbledh Kongresin më 12 qershor

Tri ditë më pas, më 12 qershor, Partia Socialiste do të mbledhë Kongresin ku do të nisë një proces hapjeje dhe riorganizimi të saj.

Vendimi për mbledhjen e Kongresit u mor nga Asambleja Kombëtare e cila u drejtua nga sekretari i përgjithshëm Taulant Balla, pasi kryeministri Edi Rama nuk ishte i pranishëm sepse atë ditë nisi një vizitë zyrtare në Turqi.

“Kongresi do të autorizojë Kryetarin dhe Kryesinë e Partisë për ngritjen e menjëhershme të një Komisioni i Posaçëm Riorganizimi”, u shpreh Balla.

Ai do të pasohet nga një fushatë hapjeje dhe riorganizimi brenda PS-së që pritet të zgjasë një vit sipas kalendarit të miratuar sot nga Asambleja e PS-së.

Balla tha gjithashtu se gjatë kësaj periudhe do të nisin përgatitjet për zgjedhjet lokale që pritet të zhvillohen në 2023 dhe ato të përgjithshme në 2025.

Kongresi do të zhvillohet në 12 Qershor, ku do të kremtohet dhe 30-vjetori i krijimit të partisë. Po ashtu është miratuar dhe rendi i ditës së Kongresit, ku mësohet se do të ketë një historik të rrugëtimit të PS në 30 vite, dhe do të ketë një prezantim të vizionin “Shqipëria 2030” dhe programin qeverisës për mandatin e tretë.

Gara në PD

Një ditë më pas kjo javë e nxehtë politike mbyllet me një tjetër ngjarje të rëndësishme. Në 13 qershor, Partia Demokratike zgjedh kryetarin e ri, datë e propozuar nga Kryesia e cila e afron me pak më shumë se një muaj, këtë proces, i cili sipas statutit do të duhej të zhvillohej në muajin korrik. 

Në garë kundër kreut aktual Lulzim Basha janë edhe tre kandidatë: Fatbardh Kadilli, Agron Shehaj dhe Edith Harxhi.

Basha justifikon humbjen me masakrën zgjedhore, ndërsa kandidatët dhe një pjesë tjetër e demokratëve kanë kërkuar dorëheqjen e tij pas humbjes së zgjedhjeve.

Komisioni për zgjedhjen e kryetarit të ri të PD do të drejtohet nga Jemin Gjana dhe të drejtën e votës e kanë të gjithë anëtarët e partisë me të drejtë vote.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm