Lëvizja e Ramës/ Pas konfliktit me Gjiknurin, sposton Dritan Lelin nga bashkia, i kërkon të kandidojë për deputet  

Kur na ndajnë edhe pak ditë nga dorëzimi i listave të kandidatëve për deputetë nga subjektet politike pjesëmarrëse në zgjedhjet e 25 prillit, mediat kanë nisur të ‘gërmojnë’ për surprizat që pritet të dalin prej tyre.

Në Vlorë pritet të ketë me shumë mundësi emra surprizë në listat e PS.

Burime të lapsi.al bëjnë me dije se kreu i bashkisë së Vlorës, Dritan Leli mund të japë dorëheqjen dhe të kandidojë për deputet.

Kjo lëvizje , sipas të njëjtave burime vjen për shkak të konflikteve që Leli ka patur jo vetëm me Ramën, i pranuar nga ky i fundit edhe publikisht, por edhe me Damian Gjiknurin, aktualisht drejtues i fushatës së PS për këtë qark.

Si duket, pakënaqësitë janë akumuluar deri në pikën që bashkëpunimi mes tij dhe Lelit është bërë i pamundur dhe është në ngërç total.

Si nisi sherri

Edi Rama nuk është përmbajtur në takimin e tetë muajve më parë me kryebashkiakun e Vlorës, Dritan Leli. Sipas të njëjtave burime, Kryeministri ka hedhur edhe tavolinën në nerva e sipër, në takimin urgjent të thirrur në Vlorë ku qe i pranishëm Leli dhe drejtorë të institucioneve lokale.

Madje, Rama kishte mbledhur gjithë drejtorët e PS Vlorë, si dhe kryetarin lokal të PS. Ai ka pyetur secilin me radhë se çfarë mendon per Lelin.

Pasi hedh tavolinën me duar i thotë Lelit: “Me nxive faqen në Vlorë, sondazhet më nxjerrin me 30%. Kam hedhur gjithë këto para në Vlorë dhe ti po më shkatërron gjithçka, të mora nga hiçi të bëra njeri.” 

Kryeministri i tregon edhe se çfarë i ka thënë Damian Gjiknuri.

“Unë me Lelin jam humbës në Vlorë, më ço ku të duash në një qark tjetër, jo në Vlorë me Dritan Lelin”  mësohet të jetë shprehur Gjiknuri.

Takimi është thirrur nga Rama pasi Dritan Leli ka refuzuar t’i përgjigjet ankesave të banorëve të Zvërnecit. Ka qenë pikërisht ky refuzim pika që derdhi gotën dhe që bëri Ramën ti bënte këtë gjyq kryebashkiakut në qytetin ku vetë është deputet. Rama ka kërcënuar Lelin me ndërprerje mandati.

Pakënaqësitë me Ramën

Në një intervistë për një televizion lokal në qytetin e Vlorës, Rama pati deklaruar në qershor të vitit të shkuar se kishte debatuar me Lelin, pasi sipas tij nuk kishte dëgjuar bizneset në Zvërnec  dhe kishte krijuar keqkuptime dhe pakënaqësi.

Pakënaqësi që në fakt janë ekspozuar edhe në vizitat e vazhdueshme të Ramës në Vlorë ku nuk kanë munguar asnjëherë kritikat publike ndaj Lelit.

“Ne kemi pasur një takim, kjo është e vërtetë, është e vërtetë që është bërë dhe në Zvërnec dhe ju e dini që shumë subjekte në atë zonë që kanë investuar. Si rezultat i një keqkuptimi është krijuar ideja se ato struktura do të prisheshin, dhe nga ana e Bashkisë ka munguar një komunikim efektiv, dhe një zgjidhje e menjëhershme nga Bashkia e Vlorës. Kemi pasur një debat konstruktiv dhe kemi vënë pikat mbi, për gjithçka që mund të kemi, për të përmirësuar.

Unë nuk jam i kënaqur me asnjë, dhe me punën time dhe kujtdo tjetër, përfshi dhe Dritanin në këtë rast, që duhet të punojë më shumë. Unë kam respekt për të, për shumë çka, por duhet të punojë akoma më shumë. Biseda është zhvilluar në mënyrë të hapur, në mënyrë të drejtpërdrejtë, dhe nga ana tjetër kam shumë besim që si rezultat i atij debati dhe konkluzioneve, të gjithë do të përmirësojmë punën për qytetin e Vlorës, ku është bërë një punë e jashtëzakonshme për transformimin, por ka ende shumë për të bërë”, tha Rama asokohe.

Kush vjen në vend të Lelit

Këto ditë, Rama i ka bërë Dritan Lelit një ofertë, të japë dorëheqjen nga Bashkia dhe të pranojë të futet si kandidat për deputet në listën e Vlorës, shkruan lapsi. Një lëvizje e tillë edhe justifikon mënjanimin e Dritan Lelit pa zhurmë nga Bashkia e Vlorës, edhe i krijon Gjiknurit terren për të punuar “i qetë” duke e shfrytëzuar plotësisht institucionin për fushatën e zgjedhjeve të 25 Prillit.

Nëse Leli jep dorëheqjen, drejtimin e institucionit e merr nënkryetari i Bashkisë së Vlorës, Afrim Qëndro, bashkëpunëtor i ngushtë i Damian Gjiknurit. që nga koha kur njëri ishte Ministrinë e Energjisë dhe të Infrastrukturës dhe tjetri drejtor i ARRSH-së.