Listat/ Edlira Gjoni për Politiko: PS ka paketim të bukur me hile të vjetra, PD s’ka mbajtur ende shënime serioze për fushatën

Siç pritej, dy partitë kryesore në vend, PS dhe PD dorëzuan mbrëmjen e 8 marsit në limitet e afateve të përcaktuara nga KQZ listat shumëemërore për zgjedhjet e 25 prillit.

Lista prodhoi shumë surpriza. Shumë deputetë, ish-deputetë e ish-ministra u lanë jashtë listave, apo u renditën në zona të pasigurta, ndërsa bien në sy emra të rinj që pritet të ulen në Kuvendin e ri.

Por, si i shikon listat e dy partive kryesore në vend ekspertja e komunikimit, Edlira Gjoni. Në një intervistë për Politiko.al, Gjoni thotë se listat janë pasqyrë e varfërisë së vullnetit nga të të dyja palët për të bërë ndryshimin që vërtet pritej.

Gjoni komenton edhe strategjitë e zgjedhura nga liderët Rama dhe Basha për kryesimin e listave apo emrat surprizë të renditur në të dyja listat.  

Tashmë që jeni njohur me listat e kandidatëve për deputetë të dy partive, PS dhe PD. Cila prej tyre është më bindëse? 

Listat janë të dyja pasqyrë e varfërisë së vullnetit të të dy palëve për të bërë ndryshim që vërtet pritej. Ka kamuflim e paketim të bukur në listën e PS-së, me hilet e vjetra të vendosjes së zonjave në krye të listës, por është gënjeshtër elektorale që më shumë se kushdo e beson vetë PS.

Në vitin 2013 mori nga shoqëria civile Vasilika Hysin dhe e vendosi të parën në listën e Tiranës. Në 2017 e përsëriti stilin duke vendosur të parën Elona Gjebrenë. Sot asnjëra prej tyre nuk është në listë. Ama përqasja e kamufluar vijon, sepse sërish mori “yjet” e momentit, që nuk e kanë më emrin Hysi e Gjebrea, por Çomo e Bozo. 

Tej “shokimit” fillestar me 10 emra grash në krye të 12 listave, situata është dëshpëruese, me emra e përqasje të njëjta, por të veshur e maskuar ndryshe. 

Kreu i PD, Lulzim Basha i renditi drejtuesit e qarqeve në krye të listave, ndryshe nga Rama, i cili i pozicionoi në kufijtë e mandateve të pretenduara. Si e komentoni këtë strategji nga të dy partitë? 

E shoh më tepër si një zgjatim të arrogancës politike të së majtës, që luan edhe me të tjerët, edhe me veten për të bindur votuesin për statu-quonë e fitores. Por po ta shohësh me kujdes, drejtuesit e qarqeve janë në fakt në vendin e fundit të fituar në 2017-ën, pra jo të rrezikuar siç mund të ishin realisht.

Plus, me gjurmët që ka krijuar vetë PS me zgjedhjet e gabuara të saj në të kaluarën, nuk do ishte çudi sikur t’i dilnin sërish emra të dyshimtë që do detyrohen të lenë mandatin pa e filluar, e në vend të tyre të kërcejnë drejtuesit që gjoja janë të rrezikua. 

Kurse vendosja në krye të listave nga Basha vërteton tempin e kujdesshëm me të cilin PD ka vendosur të hyjë në garë, në pozicion të çuditshëm mbrojtës, ndërkohë që duhet të ishte e gjitha në sulm frontal për të përballur makinerinë gjigante të propagandës së majtë.  

Basha ka vendosur në krye drejtuesit e fushatës në qarqe, Rama ka vendosur gra e vajza. Lëvizje populiste që dihet ku çon ujë. Por ama tregon se PD ende nuk ka mbajtur shënime serioze për fushatën. 

Ish- ministri Ditmir Bushati u la jashtë listave, ndërsa ministri Pandeli Majko dhe ish-ministri i Brendshëm, Fatmir Xhafaj u listuan në vende jo të sigurta. Cili është komenti juaj për këtë renditje ? 

Ndëshkim i pastër nga ana e Ramës. Por edhe i përkohshëm po ashtu.

E ka vërtetuar se i mënjanon rreziqet, por nuk do të ishte çudi tí shihnim në pozicione të tjera nëse vërtet e fiton mandatin e tretë. (qoftë edhe përkohësisht).

Nga ana tjetër, nëse të tre janë në listën e mbyllur të Ramës, te dosja apo kutia e pakapshme ku ai ka vendosur edhe ish-kontribuuesit historikë të PS (Dade, Leskaj, Meksi), atëherë angazhimi politik i tre të lënëve jashtë, ngel këtu. 

A është risi zëvendësimi i 'xhaketave të vjetra' me të rinj, nëse i referohemi reagimeve për Luljeta Bozon, Najada Çomon? 

Është lëvizje populiste, e përsëritur e Ramës, që zgjedh “yllin” e momentit, kryesisht të gjinisë femërore, duke çuar një lume me debat e vëmendje që e sfumon po aq shpejt sa edhe e krijon. Nuk ftoi për shembull Piperon apo Bratajn.

Rama ka këshilltarë të klasit të parë në strategji e komunikim politik, e është edhe vetë vëzhgues e përfitues situatash. Asgjë e re në këtë drejtim, vec ironisë së përsëritur për ikjen e disa emrave për t’u lënë vendin kalamajve, që rezultuan moshë e tretë. 

PD po ashtu rezervoi emra surprizë në lista, si Flutura Açka, A. Gjekmarkaj? Si e komentoni kandidimin e këtyre figurave dhe ç'ndikim pritet të kenë? 

Vendimet e duhura. Mëkat që janë kandidatura të izoluara e jo model prurjesh masive, për të cilat PD ka kaq shumë nevojë. Veçanërisht zonja Açka i bën më shumë nder PD-së, sesa politika i bën asaj. Vlerë e shtuar në qarkun e duhur, sepse në Elbasan PD ka më shumë mundësi e kuptim ta bëjë fushatën të fortë.

Suela Furriku/ Politiko.al