“Mbikalimi pa lidhje”, kur edhe Google Maps s’e kupton çfarë kemi ndërtuar

POLITIKO.AL

Trafiku në Tiranë vijon të jetë një problematikë e theksuar, ku qytetarëve u duhen me orë të tëra jo vetëm për të hyrë në kryeqytet, por edhe për të lëvizur brenda tij duke shkaktuar kaos, zhurmë dhe bori pafund nga humbja e durimit duke qëndruar me orë të tëra në rrugë.

Miliona lekë janë investuar për ndërtimin e mbikalimit të ri pranë Fabrikës së Miellit, por rezultati ka qenë më shumë trafik sesa reduktimi i tij.

Në vend që të shkurtonte kohën e udhëtimit, projekti që u promovua si zgjidhje, duket se ka komplikuar edhe më shumë lëvizjen.

Në hartën më të përdorur në vend, “Google Maps”, ai shfaqet me emrin ironik: “Mbikalimi pa lidhje”  një përshkrim që, mesa duket, përputhet me realitetin në terren.

 

Investim i madh, rezultat i dyshimtë

Mbikalimi u hap tërësisht për qarkullim më 30 dhjetor 2024, si pjesë e rikonstruksionit të aksit hyrës në Tiranë. Qëllimi ishte të zhbllokohej fluksi i trafikut dhe të përmirësohej qarkullimi për mjetet dhe këmbësorët.

Por rezultati nuk ka qenë aspak ai që pritej. Përkundrazi, qytetarët herë pas here kanë raportuar kaos, mungesë sinjalistike dhe ndërprerje të rrugëve dytësore  duke e kthyer këtë vepër në një nyje të pakuptimtë qarkullimi.

Ndërkohë, autoritetet promovojnë me bujë përfundimin e Unazës së Madhe të Tiranës, e cila u hap zyrtarisht për qarkullim me prani të kryeministrit Edi Rama, zëvendëskryeministres Belinda Balluku dhe drejtorit të ARRSH-së, Gentian Xhuli.

Gjatë inspektimit të kësaj vepre infrastrukturore Zvkryeministrja Balluku theksoi:

“Të gjitha këto janë elementë urbanë për të facilituar të gjitha zonat e banuara. Kjo, pasi, edhe pse me të vërtetë këto janë rrugë shpejtësie të lartë, që do të krijojnë lidhjet me të gjitha autostradat e vendit, nga të gjitha drejtimet, që vijnë për t’u futur në kryeqytet, nga ana tjetër, këto janë rrugë brenda zonave të banuara. Nuk ka sesi këto rrugë të jenë të bllokuara, pa aksese për kalimtarët, pa gjelbërim dhe pa ndriçimet e duhura.

Këto janë projekte, të cilat, që në gjenezë të tyre, në bashkëpunim me Bashkitë e Tiranës dhe të Kamzës, ne i kemi të gjitha kërkesat, për të qenë rrugë me elementë lehtësues për të gjithë banorët e zonave përreth”.

Me një gjatësi 28.7 km dhe shpejtësi të projektuar 90 km/h, kjo unazë është shpallur si një zgjidhje për trafikun që vjen nga hyrjet kryesore në qytet.

Pjesë e projektit janë disa vepra arti, 4 kryqëzime në disnivel, 1 viadukt me gjatësi 420 m, 2 ura mbi lumin e Tiranës me gjatësi 280 dhe 130 m.

Kur investimi nuk sjell zgjidhje, por më shumë probleme, kujt i shërben vërtet kjo vepër?

Tenderi i dyfishtë për të njëjtin shërbim

Një tender i bërë në vitin 2022, në vitin 2023 i është dyfishuar vlera.  Para 2 vitesh (2023), Bashkia e Tiranës ka lajmëruar Agjencinë e Prokurimit Publik se ka në plan të bëjë një tender për të monitoruar trafikun në kryeqytet.

Objekti i procedurës së prokurimit është “ofrimi i shërbimit online për monitorimin e trafikut urban në Bashkinë e Tiranës”.

Fondi limit i kësaj procedure është 41.666.667 lekë, ose mbi 400 mijë euro. Procedura do të bëhej në muajin shtator, teksa bëhet fjalë për rrjet internet.

Mirëpo i njëjti tender ishte bërë nga kryebashkiaku Veliaj edhe një vit më parë (2022). Objekti është i njëjtë “ofrimi i shërbimit online për monitorimin e trafikut”.

 Në vitin 2022 tender kishte një vlerë sa gjysma e këtij aktuali, pra 200 mijë euro. Fitues është shpallur kompania “ALBTELECOM” me një vlerë 18.676.960 lekë.

Por as atëherë s'ka marr jetë pasi në 20-05-2024 është lidhur kontrata mes dy operatorëve konkurues “VODAFONE ALBANIA” SH.A dhe  “ONE ALBANIA” SH.A.

Afati kohor i ofrimit të shërbimit “Tabela 1 dhe 2, Situata Aktuale“, do të jetë për një periudhë kohore rreth 2 (dy) vjet / 731 (shtatëqind e tridhjetë e një ) ditë, duke filluar nga data e aktivizimit të shërbimit.

Afati kohor i ofrimit të shërbimit “Situata e Pritshme Tabela 2.1“, do të jetë për një periudhë kohore rreth 181 ditë (njëqind e tetëdhjetë e një) ditë, duke filluar nga data e aktivizimit të shërbimit.

Periudha e implementimit/aktivizimit të shërbimit për “Tabela 1 dhe 2, Situata Aktuale dhe Tabela 2.1 Situata e Pritshme“ do të jetë deri në 30 (tridhjetë) ditë nga data e nënshkrimit të kontratës. Faturimi do të fillojë në momentin që shërbimi do të jetë aktiv për secilën vendndodhje, brenda afatit 30 (tridhjetë) ditor.

Ndërkaq Qendra Kombëtare e Monitorimit të Trafikut ka nisur të funksionojë më 18 Prill 2025.

Qendra do të funksionojë me 122 operatorë, ku në këtë fazë fillestare të monitorimit janë lidhur me kamera 200 km e para, të cilat mbulojnë autostradat kryesore Tiranë – Durrës, Durrës – Rrogozhinë, Rrogozhinë – Fier, Fier – Vlorë, e ku synimi final është mbulimi i 3,650 km që janë aset i inventarit të Autoritetit Rrugor Shqiptar.

Pyetja mbetet: a do të shohim ndonjëherë rezultate konkrete nga këto miliona euro të investuara, apo gjithçka do të mbetet në letër dhe propagandë? /NETA FERO