Nga akademikë te artistë dhe biznesmenë, kush ishin figurat që iu bashkuan Berishës në tryezën e opozitës

Kryetari i Partisë Demokratike, Sali Berisha zhvilloi ditën e sotme një tryezë të gjerë konsultimi me partitë opozitare, përfaqësues të shoqërisë civile dhe figura të njohura publike, të cilën e cilësoi si një moment kyç për të ardhmen politike dhe shoqërore të vendit.

Sipas Berishës, Shqipëria ndodhet në një nga fazat më kritike të historisë së tij moderne, çka e bën të domosdoshëm bashkimin e zërave qytetarë përballë asaj që ai e përshkroi si krizë të thellë institucionale dhe demokratike.

Në qendër të vëmendjes së kësaj tryeze ishin figura që nuk përfaqësojnë vetëm angazhimin politik tradicional, por edhe botën akademike, kulturore, ekonomike, sociale dhe aktivizmin qytetar.

Prania e tyre synoi të jepte mesazhin e një opozite gjithëpërfshirëse, që kërkon të artikulojë shqetësimet reale të shoqërisë shqiptare.

Mes pjesëmarrësve ishte Ilir Alimehmeti, ish-kandidat për deputet i PD-së në qarkun e Tiranës, i njohur për qëndrimet e tij publike mbi shëndetësinë dhe politikat sociale. Po ashtu, pjesë e tryezës ishte Flori Binaj, kandidat i pavarur për Bashkinë e Tiranës, i cili përfaqëson një profil kritik ndaj establishmentit politik dhe mbart mbështetje nga segmente qytetare jashtë partive tradicionale.

Nga bota akademike dhe e mendimit kritik morën pjesë Lush Susaj, profesor dhe publicist, analisti Shpend Gashi, si dhe Edmond Çata, doktor shkencash, të cilët kontribuuan në diskutime mbi krizën institucionale, shtetin e së drejtës dhe raportin e qytetarit me pushtetin.

Në tryezë ishte i pranishëm edhe profesori Ermal Hasimja, një nga zërat më aktivë në analizën politike dhe sociale të vendit.

Aktivizmi qytetar u përfaqësua nga Andi Tepelena, ndërsa bota e artit dhe kulturës kishte zëra të njohur si aktorja Adriana Tolka, aktori Neritan Liçaj .

Në tryezë morën pjesë gjithashtu sociologia Entela Binjaku, e cila trajtoi pasojat sociale të krizës politike, si dhe ekspertja e ekonomisë Meri Lika, që theksoi ndikimin e situatës aktuale në mirëqenien ekonomike të qytetarëve. Dimensioni fetar dhe moral u përfaqësua nga pastori Akil Pano, ndërsa zëri i biznesit erdhi përmes Nikollaq Neranxit, një emër i njohur në sipërmarrje dhe debatet publike mbi klimën ekonomike në vend.

Mesazhi i përcjellë ishte i qartë përmes kësa tryeze të thirrur nga Berisha, që kriza që po kalon vendi kërkon jo vetëm reagim politik, por edhe angazhim të drejtpërdrejtë të shoqërisë, intelektualëve dhe profesionistëve nga fusha të ndryshme.