Nga humanizmi te shkenca, shqiptarët që lanë gjurmë dhe na bënë krenarë në 2025-ën

Viti 2025 solli histori suksesi, humanizmi dhe arritjesh të jashtëzakonshme nga shqiptarë jashtë kufijve.

Nga akte guximi në mes të zjarreve, te vlerësime ndërkombëtare në shkencë, siguri kibernetike, arsim dhe shërbim ndaj komunitetit, shqiptarët dëshmuan edhe një herë se dinë të spikasin dhe të lënë gjurmë kudo ku janë.

Shqiptari që sfidoi flakët në Greqi, në listën ikonike të BBC për 2025

Një nga momentet më prekëse të vitit u përjetësua gjatë zjarreve shkatërruese në Greqi. Një burrë shqiptar u fotografua teksa shpëtonte një dele nga flakët në zonën e Patrës, duke e transportuar mbi motor përmes tymit dhe zjarrit.
Fotografia, e realizuar nga fotoreporteri i Reuters, Thanasis Stavrakis, u përfshi nga BBC në listën e 12 fotografive më ikonike të vitit 2025, si simbol i humanitetit dhe solidaritetit në kohë fatkeqësish. Ngjarja ndodhi në gusht 2025 dhe u bë virale në mediat ndërkombëtare.

Joe Haliti, “Qytetar i Vitit 2025” në Houston

Shqiptari Joe Haliti u shpall “Qytetar i Vitit 2025” në Houston, duke u nderuar për bujarinë dhe përkushtimin e tij ndaj komunitetit. Haliti është i njohur për organizimin e vakteve falas gjatë festave si Krishtlindjet dhe Falënderimet, por edhe në periudha fatkeqësish natyrore.
Ai kishte arritur që në tetor 2020 objektivin për të shërbyer 50 mijë vakte falas gjatë pandemisë COVID-19, ndërsa synimi i tij i radhës është të arrijë shifrën e 100 mijë vakteve të dhuruara, duke e kthyer humanizmin në mision jete.

Dredhza Braina, “Cybersecurity Woman of the Year 2025”

Një tjetër emër që bëri krenar mbarë kombin është Dredhza Braina nga Kosova. Ajo u shpall “Cybersecurity Woman of the Year 2025” në kategorinë “Barrier Breaker”, gjatë një ceremonie të mbajtur në Shtetet e Bashkuara të Amerikës.
Ky çmim prestigjioz ndërkombëtar nderon gratë që kanë thyer barriera dhe kanë dhënë kontribut të jashtëzakonshëm në industrinë globale të sigurisë kibernetike, duke u kthyer në modele frymëzuese për brezat e rinj në teknologji dhe inovacion.

Majore Luljeta Mehmeti-Quigley, shqiptarja në Akademinë e FBI-së

Majore Luljeta Mehmeti-Quigley nga Kosova u diplomua me sukses nga Akademia Kombëtare e FBI-së, si pjesë e Sesionit të 296-të, në ceremoninë e zhvilluar në Quantico, Virxhinia.
Ajo është pjesë e një grupi elitar zyrtarësh të lartë të zbatimit të ligjit dhe ndër të paktët në historinë e Policisë së Kosovës që kanë përfunduar këtë program prestigjioz, duke shënuar një arritje historike për institucionet e sigurisë në rajon.

Orges Ibi, 17-vjeçari që shkroi histori në shkencë

Orges Ibi, 17-vjeç nga Korça, arriti një sukses historik duke u bërë shqiptari i parë që fiton medaljen e artë në Olimpiadën Botërore të Shkencave të Reja.
Ai mori pikët maksimale në një kompeticion të nivelit të lartë që përfshinte matematikë, kimi dhe kodim, ku konkurruan mbi 160 të rinj nga e gjithë bota, duke vendosur Shqipërinë në hartën e ekselencës shkencore globale.

Nikol Nelo, nxënësja më e mirë e vitit 2025 në Londër

Një tjetër histori frymëzuese vjen nga Londra. Shqiptarja Nikol Nelo u shpall nxënësja më e mirë e vitit 2025 në një nga institucionet më të njohura arsimore, “Shkolla e Ekonomisë”.
Falë këtij vlerësimi të jashtëzakonshëm, ajo fitoi një bursë të veçantë që i hap dyert për studime në pesë universitete nga më prestigjiozët në botë – një privilegj që u jepet vetëm nxënësve me rezultate dhe potencial të jashtëzakonshëm akademik.