Përplasja për ‘Real Story’ në TCH/ Balla rikthen emisionin politik, ‘hakmerret’ redaktori i ‘Top Story’: Ç’gjoba premtove për t’u rikthyer?

Emisioni “Top Story” nuk do të shfaqet më në Top Channel përmes cikleve dokumentarësh investigative, siç jemi mësuar ta shohim tri vitet e fundit, por do të ketë drejtim të ri dhe me fokus trajtimin e temave të aktualitetit politik.

Ky fakt ka dalë në pah pas përplasjeve të bëra publike nga vetë Top Channel me disa përfaqësues të emisionit investigativ dhe ekipit ligjor të Top Channel.

Në një shkrim të publikuar në faqen e Top Channel thuhet se “redaktori i emisionit investigativ, Top Story dhe disa elemente të tjerë, u është ndërprerë marrëdhënia e punës, për shkak se janë gjetur në shkelje të kontratës së punës dhe në cenim të imazhit të televizionit. Ekipi ligjor i Top Channel është duke përgatitur dosjen përkatëse, për t’jua përcjellë autoriteteve, për të nxjerrë përgjegjësitë ligjore dhe dëmin që i është shkaktuar kompanisë nga këta individë, të cilët kanë përdorur profesionin dhe emisionin, si mjet gjobash dhe kërcënimesh, duke keqpërdorur edhe donacione të huaja.

Sot, këta individë ose më saktë njëri prej tyre, Endrit Habilaj, i cili ka akses në faqen e emisionit në Facebook, ka lëshuar një tjetër shpifje në drejtim të Top Channel.

Se mbrëmë është hequr një emision i tyri. Në fakt është hequr një material i cili ashtu si dy tre javët e fundit, ishte lënë për t’u transmetuar në mirëbesim dhe jashtë kontrollit editorial të Top Channel.

Por kur bordi shqyrtoi materialet dhe vuri re shkeljet e rënda etike dhe profesionale, mori vendimin e mos transmetimit të kësaj gjobe, vënë në emër të dy personave që dikur punonin në Top Channel, dhe jo në interes të së vërtetës”.

Nga ana tjetër, redaktori Habilaj ka reaguar në rrjetet sociale duke renditur me pika versionin e tij të konfliktit.

“E para, unë kam dhënë dorëheqjen në 28 shkurt 2022. Nga ajo ditë, nuk kam patur fare akses për emisionin Top Story.

- E dyta, emisioni “Oligarkët e Rilindjes Urbane”, është realizuar nga Esmeralda Keta, fituese e dy çmimeve të BE. Tema është realizuar fare pa ndërhyrjen time. Dhe kjo mund të provohet lehtësisht duke kontaktuar Esmeraldën. Emisioni është anulluar dje, në 30 Mars 2022.

- E treta, emisioni i Rilindjes Urbane, ishte raportuar tek Bashkimi Europian, një projekt që e fitoi nëpërmjet aplikimit tim dhe FES. Unë sot e kësaj dite, këtë temë nuk e kam parë.

- E katërta, një pyetje për Vjollca Hoxhën, a ke vënë gjobë ti ndaj Samir Manes, duke anulluar emisionin “Kadastra e Vlorës”?!

- E pesta, një pyetje për Sokol Ballën, a po i vë gjobë fabrikave të prodhimit të vezëve dhe çfarë gjobash i ke premtuar Vjollca Hoxhës, me ardhjen në Top Channel.

- E gjashta, zonja Hoxha, përse po i bie Kadastrës përditë, a ke kërkuar legalizimin e objektit Folie Marine dhe më pas ndërtimin e një kulle aty?

- E shtata, faqja e facebook, është krijuar nga ekipi i Top Story dhe me ardhjen e Sokol Ballës kjo faqe u kërkua ti kalohej atij. I sugjerojë të ngrejë një faqe vet, siç ka ngritur shumë gjëra.

- E teta, ekipi i Top Story, nuk është njoftuar për ndërrimin e emrit dhe që emisioni politik i Sokol Ballës do të merrte këtë emër”, shkruan Habilaj.

Sipas Top Channel, javën e ardhshme Top Story do rikthehet në orën 21:00 me emër të ri dhe nën drejtimin e gazetarit Sokol Balla.

Ky i fundit prej disa javësh është rikthyer në Top Channel si drejtor informacioni. Top Story ka qenë një emision politik që u drejtua fillimisht nga Sokol Balla, por me largimin e tij nga Top Channel në 2018, Top Story u kthye në një emision dokumentar, i llojit investigativ.

Pas pozicionimit te tij në ‘Vizion Plus’ dhe ‘News 24’, Balla drejtoi emisionin politik me një tjetër emër ‘Real Story’.