Profili i shqiptarit të vrarë në Vjenë: ushtari që donte të bëhej mjek

Ian Horswill/ CEOMagazine

Viktima e parë e 20-vjeçarit Kujtim Fejzullai, i cili qëlloi për vdekje katër persona dhe plagosi 22 të tjerë në kryeqytetin e Austrisë, Vjenë, ishte një shqiptar mysliman si vetë Fejzullai.

Nexhip Vrenezi, 21 vjeç, u qëllua katër herë nga terroristi kur doli nga një pub për të pirë cigare. Ai sapo ishte kthyer në shtëpi nga një periudhë gjashtëmujore nw ushtrinë austriake dhe po planifikonte të ardhmen duke konsideruar mjekësinë si karrierë.

Ai e donte futbollin dhe kishte luajtur për klubin lokal FC Bisamberg.

 “Ju ishit një nga njerëzit më të mirë që kam njohur. Ju gjithmonë do të jeni pjesë e zemrës sime," thuhej në një letër lamtumire të shkruar me dorë për Vrenezin.

 "Ju ishit një person me zemër të mirë, ishit një nga të paktët që ishit vërtet besnik, ishit me humor, i çmendur, i shkujdesur, tamam një person i mirë!"

Ish-mësuesja e tij Helene Fuchs-Moser tha për BILD: Është kaq trishtuese. Jam e tronditur. Ende e kujtoj shumë mirë. Ai ishte një djalë i dashur, argëtues dhe i mirë. Dhe po, një musliman.

Ajo shtoi se ai lutej për paqe dhe kundërshtonte përdorimin e fesë së tij nga fondamentalistët.

Prindërit e Fejzullait janë shqiptarë, me origjinë nga Maqedonia e Veriut. Ka rreth 80,000 shqiptarë që jetojnë në Austri nga Kosova, Maqedonia e Veriut dhe Shqipëria.

Fejzullai u burgos në prill 2019 për 22 muaj sepse donte të udhëtonte në Siri për t'u bashkuar me ISIS. Atij iu dha lirim i parakohshëm në dhjetor sipas ligjit për të mitur pasi u gjykua i paaftë për të kryer një sulm terrorist.

Fejzullai postoi një fotografi në llogarinë e tij në Instagram përpara sulmit vdekjeprurës dhe i premtoi besnikëri udhëheqësit të ISIS, Abu Ibrahim al-Hashimi al-Qurashi. Ai gjithashtu dërgoi video të masakrës së Charlie Hebdo 2015, ku u panë 12 gazetarët e vrarë nga dy terroristë në zyrën e revistës franceze në Paris, dy personave, të cilët janë arrestuar nga policia austriake.

 

 

Të paktën 14 persona janë arrestuar në 18 bastisje ndërsa më shumë se 1.000 oficerë policie po hetojnë vrasjet. Policia po ndjek një burrë të moshuar, që mendohet të jetë hoxhë, i cili mund të ketë shtyrë Fejzullain të kryejë sulmin. Njeriu i gjatë dhe me mjekër bënte vizita natën vonë në apartamentin e katit të dytë të Fejzullait në periferi të Vjenës.

Fqinji Scherer Hermann i tha MailOnline se ai e pa Fejzullain "disa orë" para sulmit.

“Unë kurrë nuk kam menduar se diçka e tillë do të ndodhte me Kujtimin. Ai po ndihmonte një zonjë të moshuar te shkallët me çantat e pazarit”, tha ai.

Hermann tha se burri i gjatë, me mjekër që vizitonte Fejzullain "mbante gjithmonë një mantel të gjatë deri në kyçet e këmbëve".

“Ai vinte në banesë natën vonë, veçanërisht gjatë javëve të fundit. Ndonjëherë ai ishte me një grup burrash. Vinte gjithmonë në errësirë dhe kurrë nuk qëndronte gjatë. Mendova se gjithçka ishte shumë e dyshimtë pasi ai nuk donte të shihej. ”

Li Qiang, i cili zotëronte dy restorante në Vjenë, është i dyti nga katër personat e vrarë që janë identifikuar. 39-vjeçari ishte zhvendosur nga Kina jugore në Austri më shumë se 25 vjet më parë dhe emri i tij u bë i ditur nga ambasada e Kinës në Vjenë.

Një studente 24-vjeçare arti, Vanessa Preger-McGillivray, nga Mynihu, Gjermani, ishte viktima e tretë e identifikuar. Ajo u vra në restorantin Salzamt, ku punonte për të përballuar studimet e saj.

 

Përkthimi: Politiko.al